Sermersooq iliuuseqartoq, massa Namminersorlutik Oqartussat akissuteqarsiisut

Qui aserfallassimaqisoq Tasiilap ilaani Talittartarpimmumiittoq naalagaaffeqatigiinni pingasuusuni nunat marluk, tassa Kalaallit Nunaat Savalimmiullu sivisuumik akerleriissutaannut aaqqissutaaratarsinnaavoq. 

Qui aappaluttoq qimminut nerukkaatissaasiviusimasoq ukiorpassuanngortunili atorneqanngitsoq, Kommuneqarfik Sermersuup nittartakkamini sapaatip akunnerini makkunani piginittussarsiorpaa. 

Piginnittussarsiornermut piffissaliussap kingorna, qui taanna iluarsartuunneqassanersoq ingitserneqassanersorluunniit kommunip aalajangissavaa, tamannalu piginnittussarsiorneq qanoq angusaqarfiunersoq apeqqutaalluni piginnittoq peqataasoralugu peqataasorinaguluunniit pissalluni. Kommunip qui taanna Inatsisartut sanaartorneq pillugu inatsisaat 2010-meersoq tunngavigalugu piginnittussarsiorpaa, illuutillillu pigisatik qanga sananeqarsimanersut apeqqutaatinnagu illersorneqarsinnaasumik pissusissamisoortumillu aserfallatsaaliortassagaat inatsimmi tassani piumasarineqarpoq. Taassuma saniatigut containerit umiatsiaaqqallu qimaannakkat biilillu normoqanngitsut, Sermersuup aamma piginnittussarsiorpai. Inatsisartut avatangiisit innarlitsaaliorneqarnissaannik inatsisaat tunngavigalugu taamaaliorpoq, qimaannakkallu taakkua kommunip sivikinnerpaamik qaammatit pingasut ingerlaneranni piginnittussarsinngippagit eqqagassanngortissinnaagai inatsimmi tassani allaqqavoq. 

– Illunik inuerunnikunik aserfallassimasunillu ingitseriuartarlutalu iluarsartuussiuartarpugut, Sanarfinermut Avatangiisinullu Ingerlatsivimmi pisortaq Søren Sohn Krog Pedersen Sermitsiamut oqarpoq. Ingitserinermut iluarsartuussinermullu aningaasat pisariaqartinneqartut kommunip missingersuutaani immikkoortunut assigiinngitsunut immikkoortinneqartarput, tassanilu tunngavineqartut pingasuupput. 1) Illut ima aserfallassimatigippat, allaat navianartorsiortitsisinnaalluni. 2) Illoqarfinni nunaqarfinnilu kusanarsaaneq. 3) Nutaanik sanaartornissamut inissaqartitsiniarneq. 

Illunik inuerunnikunik ingitseriniarneq iluarsartuussiniarnerlu imaannaaneq ajukkajuppoq, illumummi ingitseriaannarmut iluarsartugassaaqisumulluunniit piginittussarsiorneq ajornakusoorsinnaasarmat, kommuni suliani taamaattuni aalajangernissamut taamaalilluni inatsisitigut tunngavissaqalertarpoq. 

Suliaq uninngaannalertoq 

Tasiilami quimut Nuummilu umiatsiaaqqanut qimaannakkanut piginnittussarsiornermik suliaq Savalimmiormiut aalisariutaasa umiarsualiveqarfigisimasaat tassa Kangerluarsoruseq pillugu suliamut eqqaanartorujussuuvoq. Tassa Kangerluarsorutsimi Nuummiit kujammut 50 kilometerinik ungasitsigisumiittumi avatangiisinik saliisoqarumaartoq, Savalimmiut lagmandiata Aksel V. Johannesenip Naalagaaffeqatigiit Qeqertarsuatsiaat eqqaanni rubinisiorfimmi 2016-imi apriilimi ataatsimiinneranni neriorsuutigaa. 

– Illut qimaannakkat uagutsinnut Savalimmiormiunut kanngunarsaataapput, qimatsinnagumi saleeqqaarnikuunnginnatta, Aksel V. Johannesen oqarpoq. Avatangiisinik saliinissamik isumaqatigiissut Savalimmiuni lagmandimit Naalakkersuisullu siulittaasuannit 2016-imi apriilip 28-ani atsiorneqarpoq sulili naammassineqarnani, Kangerluarsorutsimi illut sanaartukkallu allat kikkunnit pigineqarnerat nalornissutaanerat pissutaalluni. 

Oqaluttuassartaa naatsumik: Savalimmiut suliffeqarfiutaat Nordafar A/S akiliisinnaajunnaarluni 1989-imi nalunaarmat, illuutai, sanaartugaatai allat atortorissaarutaalu Nunatta Eqqartuussisuuneqarfiani 1 ½ millionit koruunilersillugit 1990-imi oktobarip 19-iani tunineqarput. Færingehavn Aps-imit Nuummi allaffeqartumit pigineqalerpoq, suliffeqarfilli taanna aningaasatigut ajutoorluni suliaminik unitsitsilluni 1994-imi juulip 19-iani nammineerluni nalunaarpoq. Suliaq tamatuma kingorna uninngaannalerpoq. 

Kina piginnittuunersoq paasiniassallugu, Pinngortitamut Avatangiisinullu tunngasuni Naalakkersuisoqarfiup Tórshavnimi 2016-imi novembarip 29-ani neriorsuutigaa. Suliami Eqqartuussissuserisoqarfik Paulsen/Keldsen suliamik taassuminnga paasissaanngitsuusumik 2017-imi februaarimi qulaajaasussanngortinneqarpoq, Kangerluarsorutsimilli kikkut piginnittuunersut aalajangersumik aamma oqaatigisinnaasimanagu. Taamaammat Eqqartuussissuserisoqarfiup Namminersorlutik Oqartussat Kangerluarsorutsimi illut sanaartukkallu allat Kommuneqarfik Sermersuup Inatsisartut inatsisaat tunngavigalugit piginittussarsiorsimaneratulli iliornissaanik innersuuppai. Sulili maannamut taamaaliunngillat. 

Pisortat ukiuni arfinilinni nipangersimasut 

Namminersorlutik Oqartussat Kangerluarsorutsimik piginnittussarsiornissamik eqqartuussissuserisoqarfimmit innersuunneqarnertik sooq malissimannginneraat, Sermitsiamit Pinngortitamut Avatangiisinullu tunngasuni Naalakkersuisoqarfimmut ukiuni kingullerni pingasuni apeqqutigisarparput. 

Savalimmiormiut 2019-imi januaarip 30-ani allakkaminnut Kangerluarsorutsimi illut, nuna erngullu mingutsinneqarsimanissaannik misissuisitseqqusinermut tunngasunut akissiigitsik, Naalakkersuisoqarfimmit akissutigineqartarpoq. Kangerluarsorutsimi illut Savalimmiuni naalakkersuisunit pigineqarnatik inuinnarmit maanna pigineqarmata, suliaq taanna imaannaanngilluinnartuusoq, Lagmandip allaffeqarfiani pisortaq Pól Rosenmeyer Wolles Sermitsiamut oqarpoq: 

– Savalimmiuni naalakkersuisut nunami allami inuinnaat pigisaannik saliinissamut inatsisitigut tunngavissaqanngillat. 

Nunatsinni piginnittussarsiorneq avatangiisinillu mingutsitsisoqarsimaneranik misissuisitseqqusineq imminnut atassuteqarpasinngillat, kingunerili tassa ersaripput: Tassa Nuummi Tórshavnimilu pisortat suliaq Kangerluarsorutsimut tunngasoq allaffissornikkut 2019-ip kingornali attaveqatigiissutigeqqinngilaat. 

Politikkikkut ukiuni arfinilinni nipangiusimaneqartoq 

Suliaq taanna Naalagaaffeqatigiit avannarpasinnerusumiittuni politikkikkut ukiuni arfinilinni aamma nipangiusimaneqarpoq. 

Naalakkersuisuni siulittaasuusimasup Kim Kielsenip lagmandimik Aksel V. Johannesenimik saliinissamut 2016-imi isumaqatigiissuteqartup, lagmandinngortoq Bárður á Steig Nielsen saliinissaq pillugu 2019-imi oqaloqatigaa. Kangerluarsoruseq Naalakkersuisut siulittaasuata Naalakkersuisoqarfiata Nuummiittup Lagmandillu allaffeqarfiata Tórshavnimiittup akornanni tamatuma kingornali eqqartorneqaqqinngilaq. Suliaq taanna Savalimmiut lagmandiannut Naalagaaffeqatigiit 2021-p 2025-illu akornanni sisamariarlutik ataatsimiinneranni sooq saqqummiussimannginneraa, Múte B. Egedemut Naalakkersuisuni siorna siulittaasuunerani Sermitsiamit apeqqutigaarput. Apeqquterpulli suli maannamut akinikuunngilaa. Suliaq taanna Aksel V. Johannesenimut tassa saliinissamik 2016-imi neriorsuuteqartumut Savalimmiunilu maanna aamma lagmandiusumut sooq saqqummiussimannginneraa, Naalakkersuisuni maanna siulittaasumut Jens-Frederik Nielsenimut Naalagaaffeqatigiit Savalimmiuni juunimi ataatsimiinnerisa kingorna Sermitsiamit aamma apeqqutigaarput. Tamannali pillugu arrlaleriarluta attavigisaraluarlutigu, apeqquterput suli maannamut akinikuunngilaa. 

Sapaatit akunneranut ataasiarluni angallassisartoq

Kangerluarsorutsimi illut aserfallassimaqinerat Kommuneqarfik Sermersuup takornarialerisullu ugguutigisorujussuuaat, isumaqaramimmi takornariarfissaqqilluinnartuusoq. 

Greenland Cruises Aps takornariaqaruttortarfiup nalliunnerani sapaatip akunneranut ataasiarluni arlaleriarluniluunniit, Nuummiit Kangerluarsorutsimut angallassisarpoq. 

– Kangerluarsorutsimut arlaatigut attuumassuteqarlutik tusaamasarsorlutilluunniit takornariariarusuttut ilarpassui Kalaallit Nunaanneersuusarput, Savalimmiuneersuusarput Danmarkimeersuusarlutilluunniit, Greenland Cruises Aps-imi pisortaq Ivik Knudsen-Ostermann Sermitsiamut oqarpoq. Takornariat Kangerluarsorutsimut ikaarunneranniit akunnialunni qimaqqasarpavut, aserfallassimaqisulli akornatigooqqunaveeqqusarpagut. 

– Kangerluarsoruseq nungutinneqavissappat, taava tassunga angallassissarunnaartussaassaagut. Illulli sanaartukkallu allat ingitsinngikkaluarlugit igalaamerngit aseqqukut kikiaallu manngertornisut katersorneqartuugaluarunik soqutiginnittoqarnerulissasoq isumaqarpunga. Takornariat taamaalillutik Kangerluarsorutsip oqaluttuassartaa isumannaatsumik malugisinnaanngussavaat, Ivik Knudsen-Ostermann oqarpoq. 

Nuummit Kangerluarsorutsimut ikaarnertalimmik akunnerni tallimani angallanneqarneq 1.500 koruuneqarpoq.