Siornatigut pisortaasimasut unnerluutigineqarnerat suli aalajangiiffigineqanngitsoq
Naak Københavnip politiivi Kommuneqarfik Sermersuumi aningaasatigut pinerluttoqarsimaneranik politiinut nalunaarutiginnissummik misissuinissamut ukiuni arlalinni periarfissaqarsimagaluartut, suliaq unnerluussisussaatitaasumit suli eqqartuussissuserisuunermut ingerlateqqinneqanngilaq.
Kommunaldirektøriusimasoq Lars Møller-Sørensen Hans Henrik Winther Johannsenilu unnerluutigineqassanerlutik suli utaqqisariaqarput
Toqqorsivimmiit assi: Leiff Josefsen
Kommunimi pisortaasimasoq Lars Møller-Sørensen aamma ingerlatsivimmi pisortaasimasoq Hans Henrik Winther Johannsen unnerluutigineqarnersut suli ilisimaneqanngilaq, naak pisortaasimasut taakku marluk illoqarfiit pingaarnersaata kommunianit atorfimmik atornerluisimasutut politiinut unnerluutigineqarmata ukiut pingasut sinnerlugit qaangiutereeraluartut.
Pasilliutit tunngavissaqanngitsut marluullutik Sermitsiamut siornatigut oqarnikuupput.
Suliaq Københavnip politiivinit misissuiffigineqarnikuuvoq, immikkullu unnerluussisussaatitaasoq Rashid F. Elkott Sermitsiaq.AG-mut ima oqarpoq:
- Suliaq suli eqqqartuussissuserisuunermut ingerlateqqinneqanngilaq. Eqqartuussineq nalunaarutigineqaqqammersoq paasissutissallu tamatumunnga tunngasut misissorpagut.
Suliaq immikkut unnerluussisup innersuussutigisaa tassaavoq ukioq manna januaarip 15-iani eqqartuussivimmi aalajangerneqartoq, tassani kommunimi pisortaasimasoq Lars Møller-Sørensen aamma partiimi siulittaasuusimasoq Lars Emil Johansen peqquserlussimasutut oqartussaassutsimillu atornerluisimasutut eqqartuunneqarput. Eqqartuussissut pinngitsoorani qaammatini arfinilinni pinerluuteqarsimasunut inissiisarfimmiittussanngortitsineq marluullutik suliassanngorteqqippaat
Isumaqatigiissut nalorninartoq
Kommunimut kiffartuussinernik arlalinnik ingerlatsinermik isumaqatigiissut qularnartoq pisimanngisaannartoq pillugu 2021-mi pisortaasimasut taakku marluk akileraartartut aningaasaataannik millionilinnik asiutsitsisimasut illoqarfiit pingaarnersaata kommunia isumaqarpoq.
Suliffeqarfimmik isumaqatigiissutigineqartumi kommunip sanaartornermut immikkoortortaqarfiani, Hans Henrik Winther Johannsenip pisortaaffigisaani, sulisut eqimattat kommunillu inissiaatileqatigiiffiani sulisut aqutsinerat pitsaassutsimillu qulakkeerinninneq pineqarpoq.
Kommunimi sulisut arlallit sullissinerit immikkoortortaqarfimmut tunniunneqartarsimasut pillugit ilisimasaqanngitsut, inatsisilerituullu naliliineri naapertorlugit akigitinneqartut qaffasippallaartut Sermitsiap siusinnerusukkut ilisimatitsissutigaa.
pisortaasimasunut marlunnut suliaq unnerluutiginnissutaassasoq imaluunniit unitsinneqassanersoq qaqugukkut aalajangerneqarsinnaanersoq immikkut unnerluussisussaatitaasoq Rashid F. Elkott Sermitsiamut naliliiumanngilaq.
