KAK: Nunatta unammisartui nunani allani unamminermi atisartaarput
Hummelip Kalaallit Nunaata isikkamik arsaalluni nunanut allanut unammisartuisa, nunani allani unamminerminni tujuuluarassai saqqummersippai. Qalipaatit tungujuaartut nunatta sermersuata qalipaataanut assersuunneqarput.
Nunanut allanut unammisartut nunani allani unamminerminni atisaat tungujortut qaamasuupput, nunatta sermersuanut aammali pingaartitatsinnut assersuunneqartutut suliaasimallutik.
Foto: KAK
KAK HUMMELILU PILLUGIT
KAK-ip juulimi hummelimik suleqatigiinneq pissanganartoq aallartippaa, Kalaallit Nunaanni arsarnerup ineriartortinneqarneranut nukittorsaanissaq siunertaralugu.
Isumaqatigiissut KAK-ip Kalaallit Nunaanni nunarsuarmilu timersuutit annersaat ineriartortinneqarnissaanut iluaqutigissavaa.
Hummel KAK-ip nunanut allanut unammisartuisa atisassaannik suliaqartuuvoq.
Nunanut allanut unammisartut nunanut allanut unammisarnermi atisassaat nutaat, sermersuup qalipaataanik qalipaateqartinneqartut, nunatta kulturianut anersaakkullu nukittuneranut assersuunneqartut, saqqummersinneqarput.
Hummel tusagassiuutinut nalunaarummi taama allappoq.
- Kalaallit Nunaata sermersua alutornangaartoq, kulturia pisuujusoq nunallu inuisa ataqatigiilluarnerat, atisat ersersissavaat.
Ilusilersuinermi inuiaqatigiit pinngortitap unammillernartortaanik nalaataqartaraluarlutik ataatsimoornerannut oqariartuuteqarpoq, Hummel allappoq.
- Nunanut allanut unammisartut atisaat nutaaq oqaluttuarisaanermik oqaluttuarinnittussatut ilusilersorneqarpoq – nukittunermik, sapiissuseqarnermik ataatsimoornermillu oqaluttuartalimmik. Kinaasugut inuttullu sunik pingaartitaqarnersugut takutippaa. Unammisartut atisaq taanna atigaangamikku nunatsinnut assersuutaannaanngillat, aammali naleqartitatsinnut takorluukkatsinnullu assersuutaapput, Kenneth Kleist, Kalaallit Arsaattartut Kattuffianni siulittaasoq oqarpoq.
Nunanut allanut unammisartut atisaat aammaarlugu saqqummersinneqartoq
Hummel decembarimi nunanut allanut unammisartut tujuuluat aappalaartumik qaqortumillu qalipaateqartoq saqqummersippaa. Decembarimi 2024-mi saqqummerseqqaarneqareersullu, tujuuluaraq piumaneqarluarmat Hummel aammaarluni sanaartoqqittariaqarsimavoq.
