Immikkoortortaqarfimmi pisortanut nutaanut akisussaaffik Sermersuup tunniuppaa
Illoqarfiit pingaarnersaata kommunia aaqqissuussaanikkut allannguivoq, tassani Tasiilami Paamiunilu sumiiffimmi pisortat akisussaaffeqarnerulissallutik immikkoortortaqarfimmilu pisortanngussallutik.
Kommuneqarfik Sermersooq
Assiliisoq: Leiff Josefsen
Oktobarip aallaqqaataanit Tasiilami Paamiunilu aalajangiinerit amerlanerit namminneq aalajangiiffigineqartalissapput.
Tasiilami Paamiunilu immikkoortortaqarfimmi pisortat akisussaaffeqarnerulersinniarlugit tamanna Kommuneqarfik Sermersuumi aaqqissuussaanikkut allannguinerup siunertaraa.
Taakku maanna immikkoortortaqarfinni pisortatut atuutissapput:
- Taakkua immikkoortoqarfimminni illoqarfinni nunaqarfinnilu ingerlatsineq akisussaaffigilissavaat. Suliassanik arlalinnik allannguineq nassataqarpoq, ilaatigut ingerlatsinerup aserfallatsaaliinerullu iluani, taakkualu sumiiffinni aqutsisunut ingerlatinneqartussanngorput.
- Taamaaliornikkut aalajangiiniarneq sukkanerusumik pisinnaalissaaq, suliallu suliarinissaannut sumiiffimmiittut peqataatinneqalissallutik, tusagassiuutinut nalunaarummi kommuni allappoq.
Sumiiffinni aqutsinerup pitsanngorsarneqarnissaa allannguinermi anguniagaasoq, aammalu Nuup avataani illoqarfinni najugaqarfinnilu minnerni akisussaaffimmik annerusumik tunineqarnissaat siunertaasoq kommuni nangilluni allappoq, sumiiffinnilu missingersuutit ingerlatsinerlu akisussaaffeqarfiginerulissagaat kommuni nangilluni allappoq.
- Allannguutit ukua aallaavigalugit kommunitsinni sumiiffinni aqutsinerup pitsanngorsaaffigineqarnissaanut alloriarneq pingaarutilik alloriarfigissavarput. Innuttaasut pitsaanerpaamik kiffartuunneqarnissaat aalajangiinerillu taakkununnga qaninnerpaanissaat kissaatigaarput, borgmesteri Avaaraq Olsen (IA) oqarpoq.
Kommunit aaqqissuussaanerisa ingammik angissusiisa oqallisigineqarnerini, Kommuneqarfik Sermersooq taama nalunaaruteqarpoq.
Assersuutigalugu Avannaata Kommuniani demokratii pitsaanerusoq qulakkeerniarlugu kommuni immikkoortunut minnerusunut avinneqarnissaa, Avannaata Kommuniani kommunalbestyrelsip kissaatigaa.
Aamma innuttaasunik kommunimi sullissinermik naammaginninnermik misissuineq qanittukkut Naalakkersuisut saqqummiuppaat. Kommunimi sullissinermik naammaginninngitsut illoqarfiit annerusut avataanni amerlanerusut misissuinerup takutippaa, aamma najukkami pissutsinut tunngasut najukkaminnut qanittumi aalajangiiffigineqartarnerat innuttaasut nuna tamakkerlugu pingaartikkaat misissuinerup takutippaa.
