Inuit innarluutillit sinniisuisa inatsisissatut siunnersuut akerlilerpaat
- Isumaqatigiissutigaarput, siunnersuut saqqummiunneqartoq inuit innarluutillit pillugit suliassaqarfimmi aaqqissuussaanikkut ajornartorsiutinik tunngaviusunik iluarsiisinnaanngitsoq. Inatsisitigut illersugaanermik pitsanngortitsissanngilaq imaluunniit Kalaallit Nunaanni inuit innarluutillit atugarisaannik pitsanngortitsisussaanani, inuit innarluutillit oqaaseqartartuat inuillu innarluutillit kattuffii tusagassiutinut nalunaarumminni ataatsimoorlutik oqaatigaat.
Naalakkersuisut har sendt lovforslag i høring for anden gang, men heller ikke denne gang stiller repræsentanter for de handicappede personer sig tilfreds med lovforslaget. De opfordrer til at forslaget til en ny handicaplov bliver taget ud af dagsordenen og der laves et helt nyt lovforslag, hvor de får mulighed for at have indflydelse for lovforslaget.
Assiliisoq: Leiff Josefsen
NIIK (Inuit innarluutillit kattuffiat), KNIPK (Inuit innarluutillit piginnaasakitsullu kattuffiat), Inooqat (Meeqqat innarluutillit piginnaasakitsullu angajoqqaavisa kattuffiat) aamma Inuit innarluutillit oqaaseqartartuat nutaamik tusarniaanermut akissutertik ataatsimoorlutik tunniuteqqammerpaat nutaamut siunnersuutimut Inatsisartut inatsisaannut tapersiinermut
inuit innarluutillit tunngasut nassiuppaat.
- Tusarniaanermi akissuteqaaterput eqqarsaatigalugu
inatsisissatut siunnersuutip isumaliutigeqqinneqarnissaa, kiisalu siunissami
inatsisissap Kalaallit Nunaata nunani tamalaani pisussaaffiinik kiisalu inuit
innarluutillit pivisumik pisariaqartitaanik isumaginninnissaanik
qulakkeerinninnissaq pillugit suleqatigiinnissaq Naalakkersuisunut aamma
Inatsisartunut kajumissaatigaarput, taakku ataatsimoorlutik kajumissaaripput.
Inatsisitigut isumallaallisaaneq atukkanillu pitsanngorsaaneq amigaataapput
Siunnersuummut nutaamut innarluutilinnut tapersiinermut inatsisissatut siunnersuummut saqqummiunneqartumut akerliusut erseqqissaatigaat ajornartorsiutit qitiusut pingaarutillillu aaqqinneqanngitsut:
-Inatsisitigut illersugaanermik
pitsanngortitsissanngilaq imaluunniit Kalaallit Nunaanni inuit innarluutillit
atugarisaannik pitsanngortitsisussaanani. Ukiut sisamaannaat qaangiupput
inatsit atuuttoq akuersissutigineqarmat. Takujuarpagut nalunaarusiat, atulersitsiniarnermik
ajornartorsiuteqartoqarneranik, inatsisitigut illersugaanermik
amigaateqartoqarneranik aamma inuit pisinnaatitaaffiinik unioqqutitsinermik
uppernarsaasut.
- Inatsisissatut siunnersuutip qulakkeersinnaanngilaa, inuit
innarluutillit ikiorneqarnissamut pisariaqartitsinitik pisinnaatitaaffigisatik
pissarsiarissagaat – ullumikkut pissarsiarineq ajoriikkatik. Inuit
innarluutillit tapersersorneqarnermik pisariaqartitaminnik pissarsineq ajorput.
Inatsisitigut illersugaanerisa aamma nammineerlutik inuunissaminnut
periarfissaasa kiisalu peqatigiinnermut peqataanissaasa tunngavia
qajannarsisinneqarpoq.
FN-ip Inunnut Innarluutilinnut Pisinnaatitaaffiinut Isumaqatigiissutaanut naammassinninngilaq
FN-ip Innarluutilinnut Pisinnaatitaaffiinut Isumaqatigiissutip 4-mi allaatigisaani pisariaqartinneqarpoq, inatsisinik, aqutsinermik allanillu iliuusissatut siunnersuutit tamarmik pisinnaatitaaffinnik ilisimaneqartunik atuutsitsilernissaat innarluutilinnik peqateqarluni, peqatigiiffiillu sinnerlugit oqaloqatigiissutigineqarnissaat peqataatitsinissarlu pisariaqartinneqarpoq.
- Ajoraluartumik takunngilarput, maannakkut
siunnersuummik FN-ip Inuit Innarluutillit Pisinnaatitaaffii pillugit
Isumaqatigiissutaani (UNCRPD), Kalaallit Nunaata malissallugu
pisussaaffigisaani piumasaqaatit imaluunniit siunertat eqqortinneqarnissai.
- Isumaqatigiissummi Artikel 4-mi erseqqissarneqarpoq, inatsisiliornikkut,
allaffissornikkut kiisalu pisinnaatitaaffiit akuerineqartut pillugit
iliuuseqarfiginissaatigut allatigut iliuuseqarniaraanni, inuit innarluutillit
kattuffii sinniisuusut aqqutigalugit peqqissaarussamik kiisalu
peqataatitsilluni ilaatitsisarnissap pingaaruteqassusaa.
Kajumissaarut: Oqallinnissamut inissaqartitsigitsi
Inuit innarluutillit oqaaseqartartuat, Anja Hynne Nielsen, siusinnerusukkut Sermitsiamut oqaluttuarnikuuvoq inatsisissatut siunnersuut suliarineqaqqaalermalli imassaanut ilusissaanullu tunngatillugu pingaartitaminnik Naalakkersuisunut saqqummiussisarsimanertik malitseqartinneqarsimanngimmat naammaginanngitsuusoq.
- Aalajangiisuuvoq, inuit innarluutillit taakkulu
kattuffiisa oqaloqatiginerisigut tusaannarnagit, politikkinik inatsisinillu,
toqqaannartumik inuunerannut sunniuteqartunik ilusilersuinermi
peqataatinneqarluinnarnissaat.
- Ernummatigaarput, inatsisissatut siunnersuutip aamma
tassani aningaasaliinerit systemimut, inuit innarluutillit pisariaqartitaannut
imaluunniit pisinnaatitaaffiinut isumaginninngitsumut tapersersuiinnarnissaa.
- Kalaallit Nunaanni inuit innarluutillit pillugit
suliassaqarfimmik piviusumik kivitsisinnaasumik aamma pitsanngorsaasinnaasumik,
pingaarnersiuinermik suliaqarnissamut attuumassuteqartut tamaasa
oqaloqatiginissaannut aamma kaffisoqatigiilluni ataatsimeeqatiginissaannut
piareersimavugut, Inuit innarluutillit oqaaseqartartuat, Anja Hynne Nielsen, KNIPK-mi siulittaasoq Thorkild Jeremiassen, NIIK-mi aamma Inooqammi siulittaasoq, Viggo Johansen peqatigiillutik avammut nalunaarput.
Meeqqanut inuusuttunullu Naalakkersuisoq, Aqqaluaq Biilmann Egede (IA) oqaaseqartinniarlugu Sermitsiamit sulissutigaarput.
