Keira Alexandra Kronvold: Qitornara tigoqqikkusuppara

Keira Alexandra Kronvold 38-nik ukiulik Thistedip napparsimmaviani sapaatip-akunnerani kingullermi tallimanngornerup unnuaani peqqissumik panittaarpoq. Erninerali naartunerup naggaserneranik nuannersuusussaagaluartoq Keiramut alianartumik aallartippoq.

Erninermi kingorna nalunaaquttap akunneri marluk minutsillu 15-it qaangiuttut meeraq inoorlaaq Thisted Kommunemi sullissisumut tunniuttariaqarpaa. Niviarsiaq pinngitsaaliissummik arsaarinnissutigineqarpoq qallunaanullu angajoqqaarsianut tunniunneqartussaalluni.

- Inniarnera akiugassaanngilaq. Uterteqqikkusuinnaraluarpara, Keira oqarpoq. Taassuma qallunaat kommuniini qanoq pisoqartarnera eqqumaffigineqarnerulersikkumallugu misigisani saqqummiunniarlugit aalajangerpoq. 

Kommunimit ikiorneqassasorisoq

Angajoqqaat piginnaasaannik misissueriaatsit eqqarsartaatsikkullu nalilersueriaatsit kalaallit kulturiannut oqaasiinullu nalimmassarneqanngitsut aallaavigalugit meeqqat kalaallinik angajoqqaallit 411-t maanna angerlarsimaffiup avataanut inissinneqarsimapput.

Inuttut pisinnaatitaaffiit pillugit Ilisimasaqarfiup immikkullu ilisimasallit arlallit nutaanik nalilersuinermik peqalernissaata tungaanut taakku nalilersueriaatsit atorunnaaqqullugit kommuninut kajumissaarutigaat. Kommunilli arlallit suli atorpaat - Thisted Kommune taakkununnga ilaavoq.

– Aliasoqaanga sianiitsutullu misigalunga. Ukiut qulit matuma siornatigut misissortinnissamut kommunimilu oqaloqatigiinnernut peqataanissamut qinnuigineqarama nalusimavara sumut akuersinerlunga. Oqalutseqanngilaq. Isumaqarpunga ikiorniaraannga, ikiorumanngilaanngali, Keira oqaluttuarpoq. Taanna panimminik ukiut qulit matuma siorna, taamani qulingiluanik ukiulimmik ernerminillu arfineq-pingasunik qaammatilimmik pinngitsaaliissummik arsaagaanikuuvoq. Maanna aamma paniminik inoorlaamik arsaagaavoq.

Angajoqqaatut piginnaasat naammanngitsut

Keira Alexandra Kronvold suliffeqarlunilu nammineq ineqarpoq. Imigassamik ikiaroornartumilluunniit atornerluisuunani. Thisted Kommunilli suliami naliliinera tunngavigalugu ”angajoqqaatut piginnaasai naammanngillat, misigissutsikkullu annertuumik ajornartorsiuteqarluni”. Taamatullu nalilerneqarneq paniata inunngorneranik arsaarinnittoqarnissaanik Meeqqanut Inuusuttunullu ataatsimiititaliami oktobarip aallartinnerani aalajangerneqarpoq. – Erninissannut sapaatip-akunneri kingulliit ajorluinnarpoq. Naama iluani aalaleraangat qilanaartarpunga, aammali pisussamut aggersumut aliasungaarlunga. Erninissanut ullualuinnanngortut napparsimmavimmut nassatassakka poortorpakka. Atisat, miluffiit, nangit, zinkimik taniut nuunooqqanullu qipeeqqat marluk. Aappaa inunngoruni qipissaa, aappaalu napparsimmavimmiit angerlaleruni atugassaa. Sajuppunga. Aappi, timera tamarmi sajuppoq. Allaannginnami kissaatinnut kingullerpaamut piareersartunga, Keira oqaluttuarpoq. 

Meeqqatsinnik arsaartorpaatigut 

Keirap ernineranut Mentor Immanuelimi siulittaasoq Karen Banke Pedersen, Keirap ikinngutaa Ivaana Hyllested Nielsen panialu Zoe peqatigalugit ilaapput. 

– Susoqarnissaa nalunagu peqataaneq sakkortuvoq. Uanga peqqissaasutut sulinikuuvunga, ernisussiortarnikooqalunga aammalu toqungallutik inunngortunut peqataanikuullunga. Unali allaavoq. Una meeraq anaanaaniit arsaarinnissutigineqarpoq, Karen Banke Pedersen oqarpoq. 

Taanna Københavnimi meeqqanik angerlarsimaffiup avataanut inissiisarnermut arfininngormat akerliussutsimik takutitsisoqarmat oqalugiartunut ilaavoq. 

– Keira pillugu napparsimmavimmi peqataavunga. Tassunga akueriuminarnerulaarniassammat, aammali sunnerterujussuarpunga. Aaqqissuussaanerup taama nillertiginera soqutigittaatsigineralu kamannarerujussuarpara. 

Meeqqatsinnik arsaartorpaatigut anaanaasullu imminiiginnartarlugit. 

Erniusoq nammineq tigugaa 

Keira Alexandra Kronvold novembarip arfineq-aappaanni unnuakkut marluk qaangilaaraa paniminik ernivoq.

– Ernisussiortut oqarfiginikuuakka anillappat nammineq tigorusullugu, taamaaliornissannullu akuerineqarpunga. Suut tamarmik pissusissamisut ingerlapput, kusanaqaarlu; tupinnartuliannguaq. Ingerlaannaq milutsippara. Paniga angajulleq Zoe saninni issiavoq Karenillu Ivaanallu pakkuppaannga. Minutsit qulit-15-it qaangiummata oqimaalutarneqarpoq uuttortarneqarlunilu, assaalu isigalugillu assilillugit pappiaqqamut naqinneqarput. Atisai toqqarpakka atinissaalu isumagalugu. Piffissami tassani allanit passunneqarnera akiorsinnaanngingajappara, Keira qiaatigaluni oqaluttuarpoq.

Ernineranit akunnerit marluk minutsillu 15-it qaangiuttullu Thisted kommunimi sullissisoq Keirap pania aallugu orniguppoq.

– Piffissami tassani sinippoq, uangalu qissaserpunga. Paniga paarilluaqqullugu arnaq oqarfigaara. Neriorsorpaanga. Kikkut tamarmik saninniipput. Zoep nukkani tigummivaa, uangalu nuunooqqanut qipik atornissaa isumagaara. Suut taskimiinnersut oqaluttuaraakka. Meeraq tigummagu aniartorlunilu suut tamaasa maluginiaqqissaarpakka. Anereersut matu nakkutiinnavippara. Annernaqaaq sunalu tamaat qimaannarusukkaluarpara. Angerlartinnanga misissorneqassasunga ernisussiortoq oqarpoq, aperaangalu arlaava angerlaakkusunneriga.

– Napparsimmavimmit anigatta ilaqutariit allat meerartik kissumiarlugu ingerlasut takusinnaavakka, nuannaarpaseqaat. Uangalu meerara nassarnagu arlaava kisiat paaralugu ingerlavunga, Keira qissaseqqitsigani oqarpoq. 

Kommunimit tapersersorneqanngitsoq

Keira napparsimmavimmit tallimanngormat ullaakkut nalunaaqutaq 06.30 angerlartinneqarpoq. Kommunimi sullissisuniit ilagineqanngilaq, ullunilu tulliuttuni aamma attaveqarfigineqarani.

– Karenip Mentor Immanuelimeersup Zoelu biilinik angerlaappaatigut. Uagutsinni ilagissanerlunga aperaanga, kisimiillungali siniffimmi nalanissara pisariaqartilluinnarpara. Aqaguani ullaakkut pilluaqqusisorpassuit allaqattaarput. Akinissaannik nukissaqanngilanga. Qanoq pisoqarsimanera nalunngilaat, kisianni taama sukkatigisumik pisoqarsimasoq ilisimanagu. Facebookikkut toqqaannartumik aallakaatitsillunga qanoq pisoqarsimanera oqaluttuaraara. Ilaquttakka aliasoqaat. Paniga tigoqqikkusuinnarpara. Eqqarsaatigisinnaasatuara tassaavoq sumiinnersoq tuppallersarneqarnersorlu.

Keira kalaallillu angajoqqaat allat pillugit Københavnimi Nuummilu akerliussutsimik takutitsisoqartoq paasigamiuk tupaallappoq. Aamma nunaqarfimmi Qeqertani taanna panialu pillugit naneruutinik ikitsisoqarsimammat.

– Inuit akerliussutsimik takutitsinerat neriuummik tunisivoq. Aammali nalunngilara piffissaq tulliuttoq ilungersunartussaasoq, Keira oqarpoq. Inissisimaffimminut atatillugu taama oqarpoq, aqutsisoqarfiup nalunaarutaa Sermitsiamit atuarneqartoq innersuussutigalugu. Tassani allassimavoq angajoqqaarsiat meeqqamut pingaarnertut paaqqutarinnittuussasut. Tassa Keirap naalungiarsuutimi ilaginera tamaat taakkussaapput milutsitsisut, atisaanik taarsersuisut, nangilersuisut saammarsaasullu.

Kalaaliuneq sunniuteqartoq

Meeqqap ilagisarnissaata taama killilersugaatiginera Keirap kalaaliunera pissutaaqataasoq oktobarip 24-ani allakkiami ilaatigut tunngavilersuutigineqarpoq.

”Keirap kalaallisut tunuliaqutaqarnini eqqaavaa, tassani kiinnap arlaatigut annikitsumik isikkunitsinnera attaveqaatitut atorneqarsinnaanera. Meerarli Danmarkimi peroriartortussaammat, Keira meeqqap inuiaqatigiinni naatsorsuutigineqartunut maleruagassanullu, qallunaat inuiaqatigiivini ingerlalluarnissamut pisariaqartunut, piareersarnissaanik ajornakusoortitsissasoq nalilerneqarpoq. Tamatumunnga ilanngullugu Keira ilisimassutsikkut ajornartorsiuteqarnera, pingaartumik meeqqap oqaatsitigut ilisimassutsikkullu ineriartortinnissaanut tunngatillugu, annikippallaamik periataarnermillu attaveqartarnera ilaavoq."

– Naalliutsitsineruvoq, Karen Banke Pedersen oqarpoq. Kalaallit sullissisut, tarnip pissusiinik ilisimasallit meeqqanullu tunngasunik suliaqarlutik angalasartut akuleruteqqaartinnagit qallunaat kommuunii meeqqanik kalaallinik angajoqqaalinnik arsaarinnissinnaanerat inerteqqutaasariaqaraluartoq taanna isumaqarpoq.

– Naalakkersuisut akuliutipallattariaqarput.

Keira eqqarsaatigalugu ullut takipput tujorminaqalutillu, unnuillu ajornerujuullutik.

– Inuit oqartarput akiuuttuaannarama nukittusunga. Misigaangali sanngiitsorujussuullunga seqummakuullungalu. Qitornara tigoqqikkusuinnarpara.

Keira Alexandra Kronvold panimmi inoorlaap sapaatip-akunneranut nalunaaquttap akunnera ataaseq ilagisarsinnaagaa akuerisaavoq. Marlunngornermi panini siullermeerluni tigummisinnaatitaavaa, kisianni nangilersoqqusaanagulu miluffittorteqqusaanngilaa. Keirap panimi najornerat tamaat kommunimi sullissisoq eqqaaniiginnavippoq.

Keira Alexandra Kronvold arlaleriarluni aperisimavoq panini tigoqqikkusukkuniuk qanoq iliortariaqarnerluni, tassungalu akissut ima nipeqarpoq: Tigoqqissinnaanngilat.

Thisted Kommunemi Meeqqanut Ilaqutariinnullu Ingerlatsivimmi pisortaq Lars Sloth aamma Danmarkimi Isumaginninnermut Ineqarnermullu Ministeri Sophie Hæstorp Sermitsiap arlalinnik apeqquteqarfigai. Anaanaasup meeqqaminik pinngitsaalisaalluni arsaarneqarsimasup qanoq iliorluni qitornani tigoqqissinnaaneraa ilaatigut apeqqutigaarput. Aamma meeraq kalaallinik angajoqqaaqarluni Danmarkimi peroriartorsin- naannginnera pillugu apeqquteqarluta. Aaqqissuisoqarfiup piffissarititaani akissuteqarfigine- qanngilagut.

Danmarkimi kommunip kalaaleq ernippat meeraanik pinngitsaaliissumik arsaarniaraa