INUUSUTTUT ILINNIARFII
Meeqqat 18-it inorlugit ukiullit 620-it missaanniittut inatsisitigut ersernerluttumik inissisimapput
16-inik ukiulik inuusuttoq GUX-imut Sisimiuni aallarterlaaq maanna Rigshospitaalimi uninngavoq nakuuserfigineqarnermi kingorna ajoqusersimanerminik suliaritilluni. Sermitsiamit paasiniarparput suli imminnut oqartussaaffigilinngitsut, ilinniariartornerminnut atatillugu angajoqqaatik qimakkaangamikkit inatsisitigut illersugaanermikkut qanoq inissisimanersut.
Assilissamik ilusilersuisoq: TNT Nuuk
Maluginiagassaq! Meeqqanut inuusuttunullu naalakkersuisoqarfimmit akissutisiarput tunngavigalugu oqaaseqatigiit kingulliit ilannguppagut.
Kalaallit Nunaanni naatsorsueqqissaartarfiup kisitsisaatai kingulliit naapertorlugit 2023-mi meeqqat 18-it inorlugit ukiullit 536-it ilinniarnertuunngorniarfinnii (GUX) ilinniagaqarput kiisalu 84-it inuussutissarsiutinik ilinniarfinniillutik (erhvervsuddannelse).
Taamaalilluni meeqqat 18-it inorlugit ukiullit 620-it ilinniagaqartuupput. Taakkunannga qassit angajoqqaaminni najugaqartuunersut qassillu angajoqqaatik nunagisartillu qimallugu ilinniariartornerminnut atatillugu kollegiani najugaqartuunersut kisitsisaatigineqanngillat.
Nukappiaqqap 16-inik ukiullip, ilinniarnerminut atatillugu Sisimiuniittup sakkortuumik persuttarneqarneranut atatillugu, Sermitsiamit KTI GUX-ip rektoria Poul V. Jensen oqaloqatiginikuuarput, taassumalu oqaluttuarinikuuaa suli imminnut oqartussaaffigilinngitsut ilinniarfimmiinneranni imaluunniit kollegiamiinneranni taamaallaat akisussaaffigigitik. Tamatuma saniatiut kollegianiit anillutik illoqarfimmi sulerisarnitik pineqartut namminneq akisussaaffigigaat.
- Uagummi ulloq unnuarlu angerlarsimaffiunngilagut, rektori ilaatigut taama oqarpoq.
Angajoqqaatut akisussaaffik allanngorneq ajorpoq
Kisianni meeqqat suli inersimasunngorsimanngitsut pineqarmata, aamma meeqqat angajoqqaatik qimallugit ilinniariartorsimasut pineqarmata, Sermitsiamit paasiniarparput meeqqat pineqartut inatsisitigut qanoq illersugaanersut, aammalu kikkut taakkununnga akisussaasuunersut, ilinniarfimmi kollegiamilu kiisalu taakku avataanni.
Ilinniartitaanermut aqutsisoqarfimmit ilisimatinneqarpugut, meeqqanut 18-it inorlugit ukiulinnut ilinniartitaanerisa nalaani angajoqqaatut oqartussaaffiit allanngortinneqarneq ajortut.
Tamatuma saniatigut aqutsisoqarfik ilisimatitsivoq, ilinniarfiit aaqqissuussinernut, atuarfiup akisussaaffigisaanut, atuarfik isumannaallisaanermut akisussaassuseqarnissamullu pisussaaffeqartoq, aamma ilinniartut 18-it sinnerlugit ukioqalersimagaluarpataluunniit.
Matumani nukappiaqqap 16-inik ukiullip nalaassimasaanut tunngatillugu, forstanderi oqaluttuarpoq tikilluaqqusilluni fiistertitsisarnerit ukiut tamaasa ingerlanneqartartut KTI GUX-ip aaqqissugarinagillu akisussaaffiginngikkai, taamaammallu ilinniarfik akisussaasuunngitsoq.
Ilinniartut ineqarfii pillugit inatsimmi meeqqat 18-it ataallugit ukiullit pillugit aalajangersagaqanngilaq
Ilinniartitaanermut Aqutsisoqarfimmit ilanngullugu innersuunneqarpugut meeqqanut inuusuttunullu naalakkersuisoqarfimmut saaffiginnissinnaasugut paasiniarlugu meeqqat angajoqqaatik qimallugit ilinniariartorneranni angajoqqaatut oqartussaaffiup qanoq inissisimanera pillugu.
Ilinniartut ineqarfii pillugit inatsiseqarpoq, kisianni tassani allassimasoqanngilaq meeqqat inatsisitigut illersugaanermikkut qanoq inissisimanersut.
KTI GUX-imi Sisimiuni rektori oqaluttuarpoq kollegieqarfiit kollegieinspektørimik aqunneqartut, aamma ilinniartut atugarissaarnerannut isumannaatsuunissaannullu taakkunannga eqqumaffigineqartoq, kisianni taamaallaat meeqqat suli inersimasunngorsimanngitsut ineqarfimminniikkaangata.
Sermitsiamit meeqqanut inuusuttunullu naalakkersuisoqarfimmut paasiniaavugut, angajoqqaat/angajoqqaatut oqartussaaassusillit meeqqat angajoqqaatik qimallugit ilinniariartortarnerannut atatillugu, meeqqat inatsisitigut inissisimanerat illersugaanissaallu pillugu isumaqatigiissuteqarfigineqartarnersut.
Meeqqanut inuusuttunullu naalakkersuisoqarfimmit ilinniartitaanermut naalakkersuisoqarfimmut innersuunneqarpugut, sulissutigaarpullu tassannga oqaaseqartitsinissarput.
