Pisisartoq oqaluttuarpoq: Aningaasat naleqanngillat

Bino Jørgensen Nuummiit 900 kilometerinik avannarpasitsigisumi Upernavimmi najugaqarpoq.

Unnukkorsiutinuinnaq 500 koruunit sinnerlugit akiliisarneq Binomut nalinginnaasuuvoq.

Ilaqutariillu sapaatisiorluarniarlutik kissarsuutikkut naatitalerlugu siatsissagunik, tamanna minnerpaamik qaammat sioqqulluguli pilersaarusiorneqartariaqarpoq.

Binop peqataaffigerusutaminik bingortoqarnissaa takugaangamiuk, pilerinera erngertumik tammaqqittarpoq. Tamatigut.

- Meeqqama iffiartornissaat orniginerusarpara, Bino Jørgensen oqaluttuarpoq.

Niuertarfiit: Akitsuinerit pisariaqarluinnarput

Naak aningaasanik ileqqaarniartaraluarluni, naallu ilinniagaqarlunilu aqutsisutut suliffeqaraluarluni, naammattunik aningaasanik atugassaqarnissaq ajornangajavittarpoq. Pissutsit taamaattuaannarnikuupput. Tamanna ulluinnarsiutigaa.

- Maani inuuniarneq akisuupilussuuvoq. Aningaasat naleqanngillat, taanna oqaluttuarpoq, ulluinnarnilu nioqqutissat pisariaqartitat akii ukiuni kingullerni annertoorujussuarmik qaffassimanerat oqaatigaa.

- Qangatut pisiniarsinnaajunnaarnikuuvunga. Akit qaffannerat aningaasarsiallu malinnaannginnerat malugisinnaavara. Assersuutigalugu yoghurti liiteri ullumikkut 40 koruunit sinnerlugit akeqarpoq. Maani inuuniarneq akisoqaaq, Bino Jørgensen, ueqartoq inersimasunillu sisamanik meeraqartoq oqarpoq.

- Uiga ullut 14-ikkaarlugit aningaasarsisarpoq, ilinniagaqanngilaq. Qujanartumik aningaasarsisarmat, uangami qaammammusiakka akit taamak qaffasitsigineranni naammanngerujussuarmata ueqanngitsuuguma qanoq iliorsimassagaluarnerpunga. Angajoqqaat kisimiittut qanoq iliortarnersut takorloorsinnaanngivippara, taanna oqaluttuarpoq.

Nioqqutissat soorlu punneq, manniit allallu ulluinnarni pisariaqartitat pisiniarfimmi nunguttarnerat Upernavimmi nalinginnaasuuvoq.

- Nioqqutissat ilaat timmisartumik assartorneqaraangamik ulluinnarni akiminnit qaffasereeqisunit akisunerujussuusarput, illoqarfimmilu pisiniarfik ataasiinnaavoq, taamaammat unammillerteqannginnamik qaqutikkuinnaq neqerooruteqartarput, Bino Jørgensen oqaluttuarpoq.

KNI-mi pisortaaneq nassuiaavoq: Sinneqartoorutit nungupput

- Eqqanaarsanngikkaanni maani inuuniarneq ajornartorujussuuvoq. Sakkortoqaaq inuuniarnerlu artornaqaaq. Aammaarlungali ilaqutariit mikisunik meerallit qanoq inuuneqarnerat takorloorsinnaanngilaraluunniit, Bino Jørgensen oqarpoq.

Taamaammallu saniatigut pissarsiumallutik aappariit sunngiffimminni piniartarput. Piniariarnerilli tamaasa pisaqarneq ajorput.

- Sunngiffimmi piniartartunut pisassat ikittuaraapput, benziinallu akia aamma qaffappoq, taanna oqarpoq.

- Ullut tamaasa ilungersorlunga sulisarpunga, akissarsigaangamalu toortagarlu toorlugu, taava ilaanni aqaguinnartoq aningaasarsiakka nungoreertarput, Bino Jørgensen oqarpoq, taanna imigassartorneq ajorlunilu pujortartanngilaq.

Akerliussutsimik takutitsinissaq pilersaarutaasoq

Kærgården oqaluuserineqaqisoq ilumut danskit koruuniinik 60-it inorlugit akeqarnersoq takujumallugu Nuup qeqqani Brugsenimukarpunga. Ingerlaqqillunga immussuaq aserortigaq mozzarella 58,95 koruuninik akilik sanioqquppara. Mamakujuttullu siusinnersukkut takusakka 240 gramit 80,95 koruuneqarput.

Tassa punnersiguma, immussuarsillunga mamakujuttunillu pisillunga, taava 199,95 koruunit akiliutigissavakka. Akillu taakku Aviaja Fontainip, Ilisimatusarfimmi nutserisunngorniarluni ilinniartup, naammagilerpai. Taamaammat akit qaffasippallaarnerujussuat pillugu akerliussutsimik takutitsinissaq maanna pilersaarusiorpaa. Heinz Ketchupip akia marloriaatinngungajavissimasoq takugamiuk akerliussutsimik takutitserusuummerpoq.

Seernartoq 15 koruunit missaannik akeqartartoq maanna 39,95 koruuneqarpoq, taanna nassuiaavoq.

Jens-Frederik akitsuineq pillugu: Aalajangerneq nuanniitsoq

- Sapaatit akunneri marluk matuma siorna pisiniarama tamanna maluginiarpara. Upperisassaanngingajappoq, kukkusoqarsimassasorlu eqqarsarpunga, maannali akit qaffaqqeriikatapput, Aviaja Fontain oqaluttuarpoq.

Ilinniartut, SIK malillugu akissarsiallit, soraarnerussutisiallit inuuniarnermikkullu artorsaateqartut akerliussutsimik takutitsissapput.

- Tusarneqarnissarput pisariaqartipparput. Akit qaffanneri aningaasarsiatsinnut naleqqutinngillat. Nalimmassaasoqartariaqarpoq. Aningaasat ullumikkut naleqanngillat, Aviaja Fontain oqarpoq.

Nioqqutissalli ulluinnarni pisariaqartut akii Aviajap kisiisa eqqarsaatiginngilai.

- Ukiup aallartinnerani ineqarnermut akiliutitta 214 koruuninik qaffannerat assersuutigisinnaavara, innallagiap orsussallu akii aamma qaffapput. Ajornakusoornartorujussuuvoq, ingammik ilinniartuulluni, Aviaja Fontain oqaluttuarpoq, taassumalu akerliussutsimik takutitsinissaq suli ullulinngilaa.