Politiit unammilligassaat pillugit misissuinermi paasisat politiit ilisarisinnaagaat
Politiit sulinerminni artukkerneqarnerminnik kingunerluuteqarsinnaanerat, Kalaallit Nunaanni Politiinit pinaveersaartinniarneqartarpoq.
Kalaallit politeerpassuit sulinerminni sakkortuunik misigisaqartarput.
Assi: Oscar Scott Carl
Kalaallit Nunaanni Politiit ilungersorput. Thin Blue Line Denmarkimit misissuinermi nutaami tamanna paasinarsivoq.
Taannalu Kalaallit Nunaanni Politiinit ilisarineqarluarsinnaavoq.
Politiiunermi sakkortuunik aqqusaagaqarsinnaasarneq sulinermut ilaasoq, taamaattoqartillugulu qaangiinnagassaanngitsumik sunniuteqarsinnaasartoq, politiit Sermitsiamut allakkatigut akissuteqarnerminni oqarput.
Misissuinermi aperineqartut quliugaangata qulingiluat minnerpaamik qaammammut ataasiarlutik marloriarlutilluunniit sakkortuumik misigisaqarsimapput, affaallu inuk nalunngisartik pineqartillugu suliaqarsinnaanatik misigisimagaluarlutik allat ikiuisinnaannginnerat pissutigalugu sulisariaqartarlutik.
- Kalaallit Nunaanni pinerlunnerit inunnut navianartorsiortitsisinnaasut, soorlu toqutsinerit, imminut toqunnerit, imminut toqoriaraluarnerit taamaaliornissamullu sioorasaarinerit, meeqqanut inersimasunullu kinguaassiuutitigut pinerlunnerit, pinngortitamilu pisut ilungersunartut Danmarkimut sanilliullugit amerlanerupput, Kalaallit Nunaanni Politiit allapput.
Kalaallit Nunaanni Politiini sulisut atugaat Danmarkimi politiini sulisunut nalinginnaasumik assersuunneqarsinnaapput. Pisulli ilaanni allaanerussuteqartoqarpoq. Tamaattumik Kalaallit Nunaanni Politiit Naalagaaffiup Politiivi suleqatigalugit sulinermi atugassarititat pitsanngorsarniarlugit pitsaanerusunillu iluaqutinik periarfissaqartinniarlugu immikkut iliuuseqarput.
Pineqartut ilisarisimasarnerat
Kalaallit Nunaanni Politiit pinerlineqartunut pinerluttunulluunniit nalunngisarinnittarnerat akulikittoq misissuinermi paasineqarpoq.
Politiit taanna ilumoornera uppernarsarpaat.
- Illoqarfiit nunaqarfiillu inissisimaffii innuttaasullu amerlassusii pissutigalugit politiit amerlanertigut illoqarfimmi peroriartornukuusarput, tassanilu innuttaasut suliffimminni naapitatik ilarpassui attaveqarfigisarlugit.
- Sumiiffinni mikinerusuni politiit tamanna aqqusaakulasinnaasarpaat, taamaattoqarneranillu sulinerminni ilungersornerunerannik kinguneqarsinnaasarluni.
Taamaattumik Kalaallit Nunaanni Politiit aamma politiit ilungersornersia kingunerisinnaasaat pinaveersaartinniartarpaat. Naalagaaffimmi Politiit Tarnip pissusaannik ilisimasalimmik oqaloqateqartarfiat ilaatigut suleqatiginerisigut tamaattoqartarluni.
Thin Blue Line Denmarkip Kalaallit Nunaanni suliniuteqarnerulernera Politiit isumalluarfigaat.
- Taakku namminneq suliniuteqarnermikkut politiit sulisuminnik tapersersuinissaannik aaqqissuussamut tapersiillutik qanigisaasunik sulisuusimasunillu tapersersuisinnaapput.
