Siumup Naleraq 40.000 koruuninik tunivaa
Taamaalilluni uppernarsarneqarpoq Siumut partiitut aningaasaataanik atuisariaqarsimasoq Naleraq 40.000 koruuninik tunillugu, illuatungeriit isumaqatigiissuteqarsimanngitsuuppata suliaq eqqartuussivilersuutaasinnaagaluartoq taamaalilluni isumaqatigiissuteqarnikkut naammassineqarpoq.
Assiliisoq (toqqorsivimmit): Leiff Josefsen
Partiip Naleqqap 2024-mut naatsorsuutai Sermitsiamit takuagut.
Taakkunani naatsorsuutini ersarissumik allassimavoq illuatungeriit Siumut aamma Naleraq isumaqatigiissuteqarsimasut Naleqqap eqqartuussissuserisunut aningaasartuutaanut tunngasut Siumup akilissagai. Taannalu tassa isumaqarpoq Siumup 40.000 koruunit Nalerarmut akililiutigisariaqarsimagai.
- Tusagassiorfiit aqqutigalugit saqqummiunneqareersutut, tamanut ammasumik annertuumik unnerluutiginnittoqartarsimavoq, tamatumalu malitsigisaanik Naleqqami Inatsisartuni ilaasortaatitagut illersorniarlugit eqqartuussissuserisunik sullinneqarnermut aningaasartuutinik akiliisariaqarsimavugut.
- Ersarissumillu inerniliunneqarpoq unnerluutigineqartut tunngavissaqanngitsut, taamaattumillu Inatsisartuni siulittaasoqarfimmit aamma nalunaarutigineqarpoq suliaq ingerlateqqinneqassanngitsoq, partiip naatsorsuutaani nalunaarusiami allassimavoq.
Illuatungeriit taakku marluk isumaqatigiissuteqannginneranni, tamanut ammasumik maluginiarnartumillu pisoqarpoq, minnerunngitsumik inuit attaveqaqatigiittarfiini Inatsisartuni 2024-mi upernaakkut ataatsimiinnerisa nalaani, tassani aamma aalisarnermut inatsisissap suliarineqarnerata nalaani Inatsisartunilu inaarutaasumik taasissutigineqarneranik kinguneqartussami.
Inuttut privatimik oqaloqatigiinnermik isertorluni immiussineq
Siullermik tamanut ammasumik isertuussamik immiussaq siaruarneqarpoq, tassanilu Inatsisartuni ilaasortaq, Jens Napãtôk` oqaloqatiginnittoq inuttaata sianiginngisaanik immiunneqarsimavoq, aalisarnermik ingerlatseqatigiiffiup Polar Seafood-ip, sinniisaaneragaasumik immiunneqarsimavoq.
Tamatuma kingorna Siumut Inatsisartuni siulittaasoqarfianut suliassamik nassiussivoq Napãtôk-ip nipangiussisimasussaatitaanermik pisussaaffimminik unioqqutitsisoqarsimaneranik pasilliinermik imaqartumik, tamannalu maajip aallartinnerani 2024-mi pivoq, kisianni Inatsisartut siulittaasoqarfianni, suliassamik ingerlariaqqinnissamut tunngavissaqanngitsoq kingusinnerusukkut inernilerneqarluni.
Kingorna paasineqarpoq Siumup taamanikkut siulittaasua aamma aningaasaqarnermut akileraartarnermullu Naalakkersuisuni ilaasortap, Erik Jensenip, Jens Napãtôk` najugaqarfimmi inuttut privatimik oqaloqatiginnittoq isertortumik videoliorsimagaa.
Kingorna, Inatsisartuni aalisarnermut inatsisissatut siunnersuutip aappassaaneerneqarnissaa ingerlanneqarnerani, isertortumik videoliarineqarsimasoq taanna Siumup atorpaa Inatsisartut ataatsimiinnerannik unikaallatsitsinissamik noqqaanermini, partiip Jens Napãtôk`-ip nipangiussisimasussaatitaanermut unioqqutitsisimaneranik naammagittaalliuuteqarsimanera pissutigalugu.
Inatsisartuni oqallinneq unitsinneqareersoq Inatsisartuni siulittaasup oqaatigaa siulittaasoqarfimmi Napãtôk`-imut suliassamik aallartitsinissamut pissutissaqanngitsut.
Kingorna Jens Napãtôk` isertortumik immiunneqarsimanini pillugu politiinut nalunaarutiginnippoq maajip naanerani 2024-mi.
Taamaakkaluartoq illuatungeriit isumaqatigiissummik atsioqatigiipput, tassanilu Siumut Naleqqamut eqqartuussissuserisumut aningaasartuutigisimasaanut matussutissanik 40.000 koruuninik akiliivoq.
Pele Broberg: Suliassaq suli naammassinngilaq
Naleqqap siulittaasua, Pele Broberg Sermitsiamut oqarpoq, illuatungeriit isumaqatigiissuteqarsimagaluarpataluunniit suliassaq suli naammassinngitsoq, imatut paasillugu Inatsisartut siulittaasoqarfiata Inatsisartunut ilaasortanik illersuinnginnera pillugu Inatsisartuni siulittaasoqarfiup assigiimmik Inatsisartuni ilaasortanik illersuisussaatitaanini tamatigoortussaatitaaninilu naapertorlugu sulinersoq, aammalu Inatsisartuni ilaasortat tamarmik assigiimmik pineqarnersut, naalakkersuisooqatigiillu partiivi sinnerlugit kisimik illersugaanersut apeqqusernarmat nakkutigineqartariaqarmallu:
- Siumup Napãtôk` pillugu pasilliineranut atatillugu Inatsisartuni siulittaasoqarfimmut aggersarneqarpugut killisiorneqarlutalu, tassanilu aamma inatsisitigut illersugaanissaq qulakkeerniarlugu eqqartuussissuserisumik peqateqarnissatsinnik qulakkeerinnittariaqarluta, tamannalu advokatimik ikiortissarsiornermik kinguneqarpoq, aammalu ilisimaneqareersutut Jens Napãtôk` pasilliutigineqartunut pinngitsuutinneqarpoq.
- Suliap takutippaa Inatsisartuni siulittaasoqarfik Inatsisartuni ilaasortat ataasiakkaat illersornissaannut suliassaminnik naammassinnissinnaasimanngitsoq, tamannalu pissutigalugu partiitut siulliulluta iliuuseqartariaqarsimavugut. Kisianni suliap aamma takutippaa Inatsisartuni siulittaasoqarfiup Siumup Inatsisartuni ilaasortamik saassussinera unitsissimasariaqaraluaraa, tamannalu siulittaasoqarfiup suliarinngilaa. Siumummi naammagittaalliuteqartariaqartutut misigisisimasimaguni, taava aqqutit eqqortut atorlugit ingerlasariaqaraluarpoq, Inatsisartut oqaluttarfiat atorlugu eqqunngitsumik tunngavilimmik pasinarsaanani nikanarsaananilu, Pele Broberg (N) oqarpoq.
Pele Broberg taamaalilluni isumaqarpoq Inatsisartut siulittaasoqarfiata ilaasortat illersornissaannut suliassartik naammassinngikkaa, aammalu erseqqissaavoq Inatsisartuni siulittaasoqarfiup Siumut unitsissimasariaqaraluaraa, Inatsisartummi ataatsimiittarfiat eqqartuussiviunngimmat.
- Uggornaraluartumik Inatsisartut siulittaasoqarfiata qanoq sulinera mianersuuttariaqalerparput, siulittaasoqarfiup naligiissumik inatsisillu naapertorlugit suliaminik ingerlatsinersoq nakkutigisariaqarparput, taamaattumik suliap naammassineqannginneranik uagut isumarpugut, tassa naapertuilluanngitsumik pisoqaqqissinnaaneranut eqqartuussissuserisulersornissaq pisariaqaqqilissappat sillimaffigisariaqassavarput, Pele Broberg (N) oqarpoq.
Suliaq Siumumi suli ingerlavoq
Suliaq matumani pineqartoq maanna Naleqqap tungaanit matuneqareeraluartoq, taamaattoq suli Siumumi suli ingerlavoq. Maannami eqqartuussissuserisut ikiortigalugit suli qulaajarneqarpoq Erik Jensen nammineq inuttut aningaasartuutit pineqartut matussusissanerai imaluunniit Siumup akiligassaq ilumut akiligassarissaneraa, ilaatigut partiip aqutsisui nutaat suliamik ingerlatseqqittussat suli naammassinngimmassuk, tamanna Siumup allattoqarfiata uppernarsarpaa.
Siumut partiip 2024-mut naatsorsuutai partiip ataatsimeersuarnerani saqqummiussinnaasimanngilai. Nassuiaatigineqarpoq avataaniit sunniutit, partiip sunniuteqarfigisinnaanngisai pissutaallutik naatsorsuutit suli saqqummiunneqarsinnaanngitsut.
