Starlink pillugu suliami Peqqinnissaqarfik politiinut unnerluutigineqassanngilaq
Tasiilami Starlink pillugu suliami Peqqinnissaqarfik Nalunaarasuartaateqarnermi Aqutsisunit politiinut unnerluutigineqassanngilaq.
Tasiilami Starlink pillugu suliap takutippaa pisariaqassappat attaveqaatinut tunngasunik innuttaasunit suliffeqarfinnilluunnit suliarineqarsinnaanngitsunik Peqqinnissaqarfik suliaqarsinnaasoq.
Toqqorsivimmit assilisaq: Leiff Josefsen
Qarasaasialerinermik ingerlatsivik Inu:IT Tasiilami Starlink antennenik ikkussuillunilu ingerlatsisimasoq pasitsaanneqarmat, Nalunaarasuartaateqarnermi Aqutsisunit politiinut unnerluutigineqarpoq. Qaammatini arfinilinni misissuinerup kingorna Starlink antennenik atuinermut Peqqinnissaqarfik akisussaasuusoq Nalunaarasuartaateqarnermi Aqutsisut paasivaat, tamannalu pissutigalugu Peqqinnissaqarfik politiinut unnerluutigineqarsinnaanersoq apeqqutinngorpoq.
Attaveqaatit pillugit inatsit
- Naamik, Nalunaarasuartaateqarnermi Aqutsisuni pisortaq Kasper Juul-Nielsen Sermitsiamut naatsumik akivoq nangillunilu:
- Piumasaqaatit arlallit naammassineqarpata, attaveqaatit pillugit inatsimmi pisortat oqartussaasut aalajangersimasut attaveqaatit nalinginnaasut kikkunnut tamanut atugassat avaqqullugit attaveqaatinik pilersitsisinnaanissaat periarfissaavoq. Peqqinnissaqarfiup pisariaqartitai pissutigalugit pisortat attaveqaataat avaqqullugit aaqqiissutissamik pilersitsisoqarsinnaasoq naliliisoqarpoq. Taamaattumik Nalunaarasuartaateqarnermi Aqutsisut Peqqinnissaqarfik politiinut unnerluutigiumanngilaa, Kasper Juul-Nielsen erseqqissaavoq.
Aqutsisut pisortaat tamatumunnga atatillugu erseqqissaavoq „naalagaaffiup oqartussaaffii, kommunit Namminersorlutillu Oqartussat kisimik immikkut ittumik pisariaqartitsineq pissutigalugu kisermaassilluni attaveqaatit avaqqullugit attaveqaasersuutinik pilersitsisinnaasut. Oqartussaasulli taamaattunik pisariaqartitsisut attaveqaatit pilersinneqarnissaat pillugu aalajangiitinnatik Nalunaarasuartaateqarnermi Aqutsisunut attaveqaqqullugit kajumissaarneqarput, pisortat attaveqaasersuutinut attaveqaataannik atuinnginnissamut oqartussaasut pisariaqartitaat tunngavissaqarnersut naliliiffigineqarsinnaaqqullugu”.
Taamaattumik illoqarfinnik, nunaqarfinnik nunanillu allanik atassuteqalersitsisunik atortorissaarutinik (assersuutigalugu Starlinkimik) innuttaasut suliffeqarfiillu namminersortut inatsisitigut pilersitsisinnaassanngillat, aqutsisuni pisortaq oqarpoq.
Allanik politiinut nalunaarutiginnittoqanngitsoq
Naak inerteqqutaasumik Starlink antennenik atuisoqarsorinnittoqaraluartoq, Nalunaarasuartaateqarnermi Aqutsisut allanik politiinut unnerluutiginnissimanngitsut paasissutissiissutaavoq.
- Nalunaarasuartaateqarnermi Aqutsisut angalasarnerinut atatillugu tamanna ataavartumik nakkutigineqarpoq, Kasper Juul-Nielsen paasissutissiivoq.
