ANINGAASAQARNERMIKKUT ILUNGERSUNARTORSIORTUT
Kommuni atorfinitsitsisarnermik unitsitsivoq
Kommune Kujallermi aningaasaqarnikkut suli unikaallannerunissaq pisariaqarpoq.
- 2024-mut naatsorsuutaagallartut atuiallaarnermik takutitsipput, taamaammallu iliuutsit annertusarneqarnissaat pisariaqartoq, borgmester Stine Egede atorfinitsitsisarnernik unitsitsineq pillugu oqarpoq.
Assi: Leiff Josefsen
Kommune Kujalleq aningaasaqarnermigut ajornartorsiorpoq. Kommuni akileraarutinut A-nut 40 mio. kr-nik akiliinngitsoorsimasoq, ukioq manna siusinnerusukkut saqqummiunneqarpoq, taamaammallu annertuumik akiitsoqalersimalluni, kommunimmi karsiani aningaasat siunertanut allanut atorneqarsimasut amigaatigineqarput.
Kommuni upernaarli sipaarniutinik arlalinnik suliniuteqarpoq, taakkuli naammassimanngillat. Maannalu kommunip aningasaqarneq aaqqinniarlugu nutaamik iliuuseqarpoq.
Ukiut sinneranut atorfinitsitsisarnerit pisiortornerillu inatsisinik piumasaqaatigineqartunik pingaarutilinnik suliaqarnermut attuumassuteqanngitsut unitsikkallarneqarnissaat aalajangerneqartoq, Kommune Kujalleq nittartakkakkut quppernermini allappoq.
Atorfinitsitsinernilli unitsitsineq atorfinnut tamanut atuutinngilaq:
- Atorfiit ilaatinneqanngitsut tassaasinnaarput atorfiit inatsisitigut piumasaqaatigineqartut, soorlu ilinniartitsisut, meeqqerivinni isumattuinermullu immikkoortuni atorfinitsitsinerit, kommuni allappoq.
Atorfinitsitsisarnernik unitsitsigallarneq aningaasaqarnerup aaqqinnissaanut pisariaqartoq, borgmester Stine Egede (IA) nassuiaavoq:
- 2024-mut naatsorsuutissatut ilimagineqartut atuiallaarnernik takutitsipput, taamaammallu ima iliuuseqarnissaq pisariaqarpoq. Kommuni ilaatigut angalanerni, pisiortornerni killiliinikkut qaangiuttoortarnikkullu sukaterivoq, sukatereqqittoqartariaqartorli paasinarsivoq, Stine Egede oqarpoq.
