Qaqortumi suliffeqarfik 60North Greenland Kujataani aatsitassarsiornermik suliaqartunik sullissinermik, assersuutigalugu sulisunut ineqarfiliornermik qillerinermilluunniit, immikkut ilisimasaqarpoq.
– Naleqqanik, sumiiffinnik, uinganernik itissusermilluunniit nassitsikkutta taava umiarsuarmik attartornermik, qillerivimmik inuttanillu isumaginnissaagut, misissukkallu aatsitassarsiorfimmut tunniutissavagut, Malik Vahl Rasmussen oqarpoq, taannalu ataatani Rasmus Rasmussen 60North Greenlandimik 2014-imi aallartitsisoq kingoraarlugu 2025-mi maajimi ingerlatsivimmi pisortanngorpoq.
Qaqortumi suliffeqarfik 60North Greenland Kujataani aatsitassarsiornermik suliaqartunik sullissinermik, assersuutigalugu sulisunut ineqarfiliornermik qillerinermilluunniit, immikkut ilisimasaqarpoq.
– Naleqqanik, sumiiffinnik, uinganernik itissusermilluunniit nassitsikkutta taava umiarsuarmik attartornermik, qillerivimmik inuttanillu isumaginnissaagut, misissukkallu aatsitassarsiorfimmut tunniutissavagut, Malik Vahl Rasmussen oqarpoq, taannalu ataatani Rasmus Rasmussen 60North Greenlandimik 2014-imi aallartitsisoq kingoraarlugu 2025-mi maajimi ingerlatsivimmi pisortanngorpoq.
Sulisut 45-niit 100-nut
Suliffeqarfik ullumikkut 45-nik aalajangersimasumik sulisoqarpoq. Maannali aasamut sulisunut 100-nut suliasaqalereerput.
– Sulisut amerlanerpaartaat — immaqa 95 procentii- nunaqavissuupput. Soorunami aamma immikkut ilisimasallit, assersuutigalugu qillerisut, ikittut avataanit tikisittassavagut, tamatigulli nunaqavissumik suleqateqaqqullugit suliamillu qanoq naammassinnikkumaarnerminnik takutitsiqqullugit qinnuigisarpagut, taamaalilluni ilinniarfiusinnaassammat. Inuiaqatigiinni mikisuni suliffeqarfissuaqarneq akisussaaffiliisoq isumaqarpunga, Malik Vahl Rasmussen oqarpoq.
60North Greenlandimi pisortaq Malik Vahl Rasmussen (talerperleq) Tanbreezimilu pisortaq Greg Barnes Torontomi PDAC-imi nittarsaassinermi nittarsaaffimminni. Taakku Kalaallit Nunaanni aatsitassarsiornermik suliniuteqarnermi nunaqavissunik sulisoqarnissaq pingaarluinnartoq isumaqatigiissutigaat.
Assi: Trine Juncher Jørgensen
Inuiaqatigiinni akisussaaffeqarneq
Inuusuttut inuussutissarsiornermut peqataatinneqarnissaat Malik Vahl Rasmussenip pingaartingaarpaa.
– Qaqortumi inuussutissarsiornermik ilinniarfimmik kollegiamillu pilersitsisoqarsinnaappat, illoqarfimmilu inuusuttut kivitseqataaffigalugillu ikiorsinnaagutsigit, taava taamaaliorusulluinnarpugut. Pisussaaffinnut ilaasutut isigaara.
Tamatuma saniatigut 60North Greenland Qaqortumi suliffeqarfinnik allanik qanimut suleqateqarpoq.
– Illoqarfimmi suliffeqarfiit inuillu assigiinngitsut tamaasa ilisarisimavagut, ajornartorsiutillu nukingernartut piaartumik iliuuseqarfigisinnaavagut.
– Kivitseqataallutalu siunissaq ungasinnerusoq eqqarsaatiginiartarparput.
Tanbreez sullitani annerpaasoq
Australiamiut suliffeqarfiutaat Tanbreez, Killavaat Alannguanni piiaanissamut akuersissutaateqartoq 60North Greenlandimut suliarpassuarnik ukiut ingerlaneranni tunniussaqarsimasut ilagaat.
Tanbreez Killavaat Alannguanni, nunarsuarmi qaqutigoortunik savimineqarfiit annersaasa ilaanni, aatsitassarsiornissamut akuersissuteqarpoq.
Assi: Trine Juncher Jørgensen
– Malik mikisuuneraniilli ilisarisimavara, Tanbreezimi pisortaaneq Greg Barnes assani natermit meterip affaata missaani qutsitsigisumi aalatillugit oqarpoq.
– Kiffartuornerit Gregip piumasai tunniuttarpagut, suliallu taakku ukiuni 19-ini uagutsinnut pingaaruteqarsimaqaat. Ataataga ukiorpassuarni siullerni pisortaanikuuvoq, Tanbreezili sullitatsinni ullumikkumut suli annerpaavoq, Malik Vahl Rasmussen oqarpoq.
Najukkani suliffeqarfiit pingaarutilimmik ilisimasaqartut
60North Greenlandip nunaqavissunit piginneqataaffigineqarnera Tanbreezimut pingaaruteqarluinnarpoq, taakkualu sulisui sumiiffimmik ilisimasaqarlutillu anorimik silamillu paasinnittarput.
– Ajornarmat, nalorninarmat ulorianarmalluunniit iliuuseqartoqarsinnaanngitsoq ilaannikkut oqarfigineqartarpunga. Suliffeqarfiit najukkamiittut aatsitassarsiorfiit tusaaniartariaqartagaannik pingaarutilinnik ilisimasaqarlutillu paasisaqarput, Greg Barnes oqarpoq.
– Kujataani aatsitassarsiorneq pingaaruteqarluinnarpoq. Najukkami suliffeqarfinnut tamatsinnut pingaaruteqangaarpoq. Aalisarnerput annikilliartorpoq takornariallu aasakkuunerusoq tikerartarmata aatsitassarsioqatigiiffiit pisariaqartippagut, Malik Vahl Rasmussen oqarpoq.
