Polar Seafood Royal Greenlandilu Aasianni raajaleriffik annaanniarlugu oqaloqatigiillutik aaqqiissutissamik nassaassasut Aalisarnermut Naalakkersuisoq Peter Borg oqarpoq. Oqaloqatigiissimapput, kisianni aaqqiissutissamik nassaartoqarsinnaasimanngilaq, Bent Salling, Polar Seafoodimi pisortaq piginneqataasorlu Sermitsiamut ilisimatitsivoq.
Aalisarnermik inuussutissarsiuteqartut taakku marluk aaqqiissutissarsiniarnerminni ajornartorsiummik aaqqiisinnaanngitsut Sulisitsisut pisortaata Christian Keldsenip paasilluarsinnaavaa.
Polar Seafood Royal Greenlandilu Aasianni raajaleriffik annaanniarlugu oqaloqatigiillutik aaqqiissutissamik nassaassasut Aalisarnermut Naalakkersuisoq Peter Borg oqarpoq. Oqaloqatigiissimapput, kisianni aaqqiissutissamik nassaartoqarsinnaasimanngilaq, Bent Salling, Polar Seafoodimi pisortaq piginneqataasorlu Sermitsiamut ilisimatitsivoq.
Aalisarnermik inuussutissarsiuteqartut taakku marluk aaqqiissutissarsiniarnerminni ajornartorsiummik aaqqiisinnaanngitsut Sulisitsisut pisortaata Christian Keldsenip paasilluarsinnaavaa.
- Suliffeqarfiup aappaa niuerfinni atugassarititaasut naapertorlugit iliuuseqartarpoq, aappaalu suliffeqarfittut siunertani uniorlugu politikkikkut anguniakkanik aamma isumaginnittariaqarpoq. Suliffeqarfiit taakkua marluk suliassatik naammassilluarsinnaavaat, assigiinngitsumilli atugaqarunik isumaqatigiinngissuteqalersinnaapput, Christian Keldsen nassuiaavoq.
Patajaallisaaneq
- PSG-p maannakkut atukkani naapertorlugit 100 procentimik niuernikkut ingerlassaguni raajanik tunisassiornerminik Nuummut nuussinissaa akilersinnaassaaq. Taamaalilluni Aasianni tunisassiorfik matuneqassaaq. Naalakkersuisut akissutaat naapertorlugu appariarnermut pissutaasoq tunisat ikilinerannik taamaallaat pissuteqarpat, taava patajaallisaaneq malittaasinnaasut atorlugit eqqortumik aaqqiissutaasinnaassaaq. Taamaaliornikkut niuerfik inuillu allatigut piffissaq eqqorlugu iliuuseqanngikkunik suliffeeruttussaagaluartut illersorneqarsinnaapput, Sulisitsisut pisortaat naliliivoq.
Raajartassiissutit tamakkiisut ukiualuit ingerlaneranni 35 procentimik apparsimapput – 2022-mi 115.000 tonsinit ukioq manna 75.000 tonsinut, nunatsinnilu sisamanik raajaleriveqarpoq. Peter Borgip tamatumunnga atatillugu raajaleriviit akornanni raajarnianit nuannarineqalernissamut unammillernerup 2026-mi sakkortunerulernissaa naatsorsuutigineqarsinnaasoq aamma naliliutigaa.
Christian Keldsenip tamanna ima nassuiarpaa:
- Politikkikkut agguataarineq pineqarpat Polar Seafood Greenland ingerlaannassaguni raajanik 10.000 tonsinik pisassinneqartussaagaluartoq taamaallaat 6.000 tonsinik pisassinneqartarpat, tamanna biologinut tunngassuteqarnani politikkimulli tunngassuteqarpoq. Taamatut pisoqarpat Aasianni sulisut 116-it – taakkununngalu attuumassuteqartut suliffissarpassuit – qanoq pineqassanersut aamma suliassap taama pingaaruteqartigisup peerneqarnerata Aasiannut kingunerisinnaasai naliliiffigisariaqarput, Christian Keldsen erseqqissaavoq.
Pisimasut ilisimaneqarluartut
- Aalisarnermut inatsisissaq suliarineqartillugu tamanna eqqarsaatigineqareersimavoq. Tamat naalakkersueqataaneranni politikkikkut periarfissat, ingammik innuttaasut/qinersisartut suliffiinut inuuniarnerannullu tunngassuteqartut, tamarmik isumaliutigineqaqqaarnissaat kingunerilu naatsorsorneqartassasut innuttaasutut piumasarisinnaavarput. Taamaammat ukiuni marlunni ilisimaneqareersimasumut tunngatillugu maanna saqqummiunneqarsinnaasumik politikkikkut pilersaaruteqartoq ilimagisariaqarparput, Christian Keldsen oqarpoq.
Aalisarnermut naalakkersuisup Peter Borgip suliassaqarfik imaannaanngitsoq, „politikkikkut tunuliaqutaasunik ajornartorsiuteqangaartoq“, tigusimagaa Sulisitsisuni pisortap nassuerutigaa.
- Aasiannili raajaleriffimmi ajornartorsiummik aaqqiisinnaanera upperilluinnarparput, Christian Keldsen erseqqissaavoq.
