21-nik ukiulik kalaallit passiini kukkunermik nassaartoq

21-nik ukiullip Ellen Yrsa Andresenip kalaallit taamalu aamma savalimmiormiut danskillu passiini kukkusumik nassaarnera itsarnisarsiuut akornanni akuerineqarlunilu nersualaarneqarpoq. Aallaqqaataaniilli aallarteriarta. Ellen Yrsa Andersenip Atuarfik Mathias Storchimi atuareerluni ullut ilaanni anaanani, ukiut aqqanillit matuma siorna Ilulissani katersugaasivimmi pisortaasimasoq pulaarpaa. Tamatuma saniatigut takornariat niaqqup saarnginik qaqqami illoqarfiup eqqaani pisuttuarnerminni ilivitoqqamit nassaarisimasaminnik tunniussipput. Pisut taakku marluk ataatsimut isigalugit Ellenip inuusuttuaraanermini sammisartagaanut inersimasunngornermilu ilinniagassamik toqqaaneranut aalajangiisuupput. – Maannakkut piujunnaarsimasut taama qanitsigisumut takunerannik misigisaq nuannerluinnarpoq, Ellen Yrsa Andersen Sermitsiamut oqarpoq. Itsarnisarsiornermik soqutiginninneq qanga pisimasut pillugit TV-kkut aallakaatitassianit, atuanngiffeqarnermi katersugaasivinnut takuniaanernit juullimullu orpiup ataani atuakkanik puiagassaqarnermit nakussatsinneqarsimavoq. Pingaartumik vikingit nalaanni qallunaatsiaat Kalaallit Nunaaniinnerat takorluuinermut nakussassaataavoq. Vikingit runit atorlugit allattarsimapput, Ellen Yrsa Andresenillu taakku allariaatsit, ilaatigut piffissami sivisuumi Oqaatsuniinnermigut, ukiuni kingullerni ilisimatusarfigisimavai. - Vikingit ukiut 1.000-it matuma siorna eqqarsaatigisagaat paasisaqarfigisaratsigit ujaqqani runinik allasimasut oqaatsinut ullutsinni paasisinnaasatsinnut nutserlugit soqutiginarpoq, Ellen Yrsa Andresen oqarpoq. Itsarnisarsiuut qallunaatsiaqarnerata nalaani runinik allassimasullik assigiinngitsut 100-nit amerlanerusut, ilaatigut Upernaviup avannaata tungaani qeqertaaqqami Kingittorsuarmit ujaqqatut taaneqartoq, Kalaallit Nunaanni nassaarisimavaat.

Ateq Thyra kukkusumik allanneqarsimasoq

Naalagaaffeqatigiit nutaamik isikkoqartumik 2022-mi passeqalerput, tassanilu ujaqqamit Jellingemeersumit, aamma Danmarkip kuisinermut uppernarsaataanik taaneqartartumit, titartakkat atorneqarput. Quppernerni assiliartatut quppernerillu sinnerini nalunaaqutsiutitut. Ellen Yrsa Andresenip passimi tunuliaqutitut assiliartaliussani runinik allassimasut ujaqqamit Jellingemeersumit, Harald Blåtandip angajoqqaani Gorm den Gamle dronning Thyramullu napparsimasaaneersumi, tigusat atuaqqissaarsimavai. Kisianni arraa. Passini nutaani atip Thyrap allanneqarnerani ajortoqartoq. Runinik allariaatsimi siullermi naqinnerit ukiut saviminermik sakkoqalerfiit nalaaneersut 24-iupput; vikingit naqinneri 700-kkunni atorneqarsimasut 16-inik naqinnertaqarput. Passimi 2022-meersumi allattaasitoqaq allattaasitaarlu ataatsimoortillugit atermik Thyramik allattoqarsimavoq. Ellen Yrsa Andreasenip kukkuneq nassaani nalunaarutigisimavaa, tamannalu ullumikkut itsarnisarsiuunit katersugaasivinnilu sulisunit akuerineqarpoq. Eqqissiinnarilli. Passi kukkuneqaraluartoq suli atorsinnaavoq, suliaqartuniilli akuerineqarnera qiimmassaataavoq sammisaq pillugu misissueqqinnissamik kajumilersitsisoq. Ellen Yrsa Andresen ullumikkut Ilulissani akunnittarfimmi Hotel Hvide Falkimi sulisarpoq, kisiannili Københavnip ilisimatusarfiani itsarnisarsiuutut ilisimatusarusuppoq. - Immaqa ullut ilaanni Ilulissani ukiup aqqanillit matuma siorna takornariat assigalugit nammineerlunga niaqqup saarnginik nassaassaanga.