73-inik ukiulik kuummi ajutoornermi kingorna toqukkut qimaguppoq

Angut 73-inik ukiulik Maniitsumi Qooqqut eqqaanni kuup marraani nikeriarsinnaajunnaartoq, Nuup napparsimmaviani ippassaq unnukkut nalunaaqutaq 18.04 toqukkut qimaguppoq.

Taamatut Kalaallit Nunaanni Politiit tusagassiutitigut nalunaaruteqarput.

Politiit naapertorlugit ilaqutaasut ilisimatinneqareerput, toqusullu timaata misissorneqarnera ullumi kingusinnerusukkut aallartissaaq.

Kalaallit Nunaanni Politiit suliaq pillugu maanna oqaaseqarsinnaanngitsut ilisimatitsissutigineqarpoq.

Politiit ataasinngornermi ualikkut pisoq siullermeerlutik nalunaarutigaat, tassanilu oqaatigineqarpoq angut annaassiniarnerup annertuup kingorna kuummiit annaanneqarsimasoq, perulunneranilu napparsimmavimmukaanneqaarsimasoq.

Angut Maniitsup kujataata kangiani Qooqqut eqqaanni aalisariarluni kuup maralluani sapaatiummat nikeriarsinnaajunnaarpoq.

Qatserisartut, peqqinnissaqarfik, Issittumi Sakkutooqarfik Air Greenlandilu suleqatigiillutik angut ataasinngornermi ullaakkut annaappaat.

Annaassiniarnermi atortorissaarutit immikkut ittut attartorneqarput, taakkulu timmisartoq atorlugu angut aniguisinniarlugu atorneqarlutik.