Aaja Chemnitz demokratii, oqaloqatigiinneq politikkikkullu eqqortumik oqallinneq pillugit suliniuteqarnini pillugu nersornaaserneqarpoq

Inuit Ataqatigiit sinnerlugit Folketingimut siusinnerusukkut ilaasortaq Aaja Chemnitz nersornaammik Plenum-imik (siornatigut Columbus-imik taaneqartartumik) sisamanngornermi unnukkut tunineqarpoq, taannalu ilinniarnertuunngorniarfinni HF-inilu inuiaqatigiilerinermi ilinniartitsisut peqatigiiffianniit aamma naqiterisitsisarfimmit Forlaget Plenum Fondimit tunniunneqartarpoq. Nersornaat 50.000 koruuninik aningaasartaqarpoq.

Aaja Chemnitz demokratii, oqaloqatigiinneq politikkikkullu eqqortumik oqallinneq sulissutigiuarsimagamigit nersornaaserneqarpoq.

"Aaja Chemnitz politikkikkut akuunerup tunngavilersuinerullu ataqatigiinnerannik maligassiuilluarnerpaavoq. isumaqatigiinnginnerit annertugaluarpataluunniit oqaloqatigiinneq ataqqeqatigiinnerlu pimooruttuarpai. Tamatuma saniatigut Kalaallit Nunaata Danmarkillu akornanni pissutsit tamanut ammasumik oqallinnermi qitiutinnissaannut peqataavoq. Taamatut oqartussaaqataanikkut akuuneq tassaavoq, nersornaasiuttakkamik Plenum-imik nersornaaserneqartussaq," oqarpoq Janne Bisgaard Wikman, Aarhus Katedralskolemi inuiaqatigiinnik ilinniarnermut lektori aamma Forlag Plenum Fondimi siulittaasoq.

Nersornaaserneqarneq annertooq

Aaja Chemnitzimut nersornaat tamanna annertuvoq, aamma Kalaallit Nunaata ullumikkut tamanut ammasumik oqallinnermi inissisimaffiunerulerneranut ersiutaavoq.

– Kalaallit Nunaat ukiuni arlaqanngitsuni soqutigineqarnerulermat, tulluusimaarutigeqaara. Nersornaammillu tamatuminnga Kalaallit Nunaata oqaluuserineqarnissaa ukiorpassuarni sulissutigisara ataqqiniarneqarpoq, taamaalilluni qallunaat tusarnaartut aamma tusarnaarsinnaallutillu paasisinnaavaat. Danmarkimi meeqqat atuarfiini ilinniarnertuunngorniarfinnilu ilinniartitsisunik meeqqanik inuusuttunillu Kalaallit Nunaata oqaluttuarisaaneranik ilinniartitsisinnaasunik pisariaqartitsivugut, pingaartumik Kalaallit Nunaanni ullumikkut pissutsit pillugit.

– Oqaluttuarisaanermi ataatsimoortumi immikkoortoq nutaaq pingaarutilik aallartipparput, tassani kalaallit peqataatinneqarnerat annertunerujussuarmik aaqqissuussaasumik ingerlanneqarpoq. Immikkut ittuinnaajunnaarsimavugut, nalinginnaasumilli peqataatitaalerpugut, isumaqarpungalu nersornaaserneqarneq akuerineqarnerlu allarpassuarnillu ersersitsinermut takussutissaasut. Naalagaaffeqatigiinnermi pissusissamisoortumik naligiimmik inissisimalerneq. Qujanarlu taamaaliornerusariaqarpugut, Aaja Chemnitz Sermitsiamut oqarpoq.

Plenum nersornaat pillugu

Ilinniarnertuunngorniarfinni inuiaqatigiilerinermi ukiunik 25-nngortorsiornermut atatillugu, Nersornaat tamanna Columbus Fondenimit aamma Foreningen af Lærere i Samfundsfag-imit (Fals) pilersinneqarpoq.

Nersornaat inummut imaluunniit suliffeqarfimmut tamanut ammasumik oqallinnermi demokratiimik, politikkimut ilumoortumut akuliulluinnarnermik tunngavilersuutinillu piviusunik pingaartitsisumut tunniunneqartarpoq taamaalillunilu inuiaqatigiilerinermi ilinniartitsisuuneq pissanganartuutillugu.

Nersornaaserneqarnikut ilagaat tusagassiortoq Matilde Kimer, tusagassiorfimmit Zetlandimit, oqallissaarisartoq Emma Holten, tusagassiortoq Nagieb Khaja, nunat tamalaat politikkiannik lektori Peter Viggo Jacobsen aamma tusagassiortoq Martin Krasnik.