Aaja Chemnitz UPN-imi ataatsimeereernermi: Upalungaarsimanermut pilersaarut pisariaqarpoq
Inuit Ataqatigiit sinnerlugit Folketingimut ilaasortaq Aaja Chemnitz Nunanut allanut tunngasunut ataatsimiititaliami marlunngornermi ataatsimiinnermi peqataavoq, tamatumalu kingorna Kalaallit Nunaanni upalungaarsimanermut pilersaarusiortoqartariaqartoq oqarpoq. –Innuttaasut toqqissisimanissartik pisariaqartippaat, oqarpoq.
Folketingimi nunanut
allanut tunngasunut ataatsimiititaliaq marlunngornermi
ataatsimeeqqippoq, tassanilu "Kunngeqarfiup USA-mut
attaveqarnera“ oqaluuserisassatuaavoq.
Nunanut
allanut tunngasunut ministeri Lars Løkke Rasmussen (M)
illersornissamullu ministeri Troels Lund Poulsen (V) ataatsimiinnermi
peqataapput.
Ataatsimiinnermi
eqqartorneqartut avammut saqqummiuteqqusaanngillat, taamaattumik
ilaasortat oqaaseqarsinnaanerat killeqarpoq. Lars Løkke Rasmussenili
præsidentip tullia J.D. Vance Washingtonimi nunanut allanut
tunngasunut naalakkersuisoq Vivian Motzfeldt aamma USA-mi nunanut
allanut ministeri Marco Rubio pingasunngorpat ataatsimiinnissaannut
qaaqqusisuussasoq ataatsimiinnerup kingorna oqarpoq.
Malitassat
arlaqartut
Inuit
Ataqatigiit sinnerlugit Folketingimut ilaasortaq Aaja Chemnitz aamma
Nunanut allanut tunngasunut ataatsimiititaliami ataatsimiinnermi
peqataavoq, Rubiomik Vancemillu ataatsimeeqateqarneq qanoq
inerneqassanersoq apeqqutaalluni arlalinnik paasiniaanissamut
piareersimanissaq pingaaruteqartoq Sermitsiamut kingorna oqarpoq:
– Washingtonimi
politikkikkut ataatsimiinneq pingaarutilik annertooq aqagu
pissaaq. Amerlasuujulluta politikkikkut pissuserissaarneq
aqqutigalugu iliuuseqartoqarnissaa tapersersorparput,
kisiannili aamma sioorasaartuarneqarnerput
eqqumaffigaarput, taamaattumillu assigiinngitsutigut
iliuuseqarsinnaanissarput pingaaruteqarpoq, Aaja Chemnitz oqarpoq.
Upalungaarsimanissaq
pisariaqartoq
Aaja
Chemnitz Kalaallit Nunaanni upalungaarsimanermut pilersaarut
piaartumik pilersinneqartariaqartoq isumaqarpoq.
– Inuiaqatigiit
toqqissisimasussaapput. Amerlasuut piareersalereerput, tamannalu
pitsaasuuvoq. Kisianni aamma Naalakkersuisut pimoorussillutik
pisortatigoortumik qanoq pisiniartoqassanersoq qanoq
piareersartoqassanersorluunniit nalunaaruteqarnissaat
pingaaruteqarpoq.
– Sakkutuullu
aqqusinermi takugaanni uagutsinnik paarsillutillu
pissutsini
makkunani illersoraatigut eqqaamanissaa
pingaaruteqarpoq.
Aamma Kalaallit Nunaata
illersornissaanut
tunngassuteqarnera,
tamannalu tapersersussavarput.
-
Aammali ulluni makkunani Facebookimi politikki annertuallaartoq
mianersorfigisariaqarparput. Naalakkersuisut siulersuisuupput,
uagullu sapinngisatsinnik tapersersortussaavagut, Aaja Chemnitz
oqarpoq.
