Aalisakkat avammut tunisat nalingi qaffariarujussuartut

2026-mi qaammatini pingasuni siullerni aalisakkat aalajangersimasut avammut tunisat nalingi 1.618 millionit koruuniupput, tamannalu 2025-mi piffissamut tassunga sanilliullugu 550 millionit koruuninik, tassa 51,4 procentimik, qaffariarneruvoq.

Tamanna Naatsorsueqqissaartarfiup kisitsisaataani nutaani takuneqarsinnaavoq. Kisitsisilli utaqqiisaagallartumik naatsorsugaanerat eqqumaffigineqassasoq Naatsorsueqqissaartarfiup erseqqissarpaa.

Qalerallit avammut tunisat nalingi qaffakkiartuinnarput

Qalerallit ukioq manna januaarimiit marsimut avammut tunisat nalingi siorna piffissamut tassunga sanilliullugit 77,3 procentinik qaffariarsimasut kisitsisit misissoqqissaaraanni takuneqarsinnaavoq. Qalerallit avammut tunisat 49,8 procentimik akilu 19,9 procentimik qaffariarsimapput.

Raajat tunisassiarineqartut nalingi ukioq manna januaarimiit marsimut siorna piffissamut tassunga sanilliullugit 24,4 procentimik qaffariarput.

Saarulliit saattuallu avammut tunisat nalingi 55,4 procentimik aamma 39,7 procentimik qaffariarput. Saattuat kiilumut akii 10,8 procentimik saarulliillu 26,3 procentimik qaffassimapput.