Aalisartut kattuffii: Atuinissamut piusaqaat atuukkunnaarallarlunilu qaleralittassiissutit oqilillik

Kalaallit Nunaanni aalisartut piniartullu kattuffiisa tamarmik ataatsimoorussamik oqaaseqartarnerat akuttuvoq. Tassami kattuffiit taakkua aalisarnerup iluani soqutigisanut assigiinngitsunut tamarmik allatut isummersortarnerat tusartuarparput.

Kattuffiilli siulittaasuisa Qeqertarsuup Tunuani, Uummannami Upernavimmilu, aamma aqutsiveqarfik 47-mik taaneqartartumi, qaleralittassanik niuerutigineqarsinnaasunik nammineq pigisanik pigisaqartut pigisaasa ilanngartuunneqarsinnaanerat aarleqqutigalugu aarlerinertik maanna ataatsimoorfigaat. 

Aalisarnermut inatsit maanna atuuttoq naapertorlugu qaleralittassanik nammineq pigisaqarnermi pisassaatigisat minnerpaamik 75 procentia aalisarneqarluni qaqinneqartussaatitaavoq. Ukiut pingasut iluanni tamanna angusimanngikkaanni pisassaatigisat nammineq pigisat, nalillit, Naalakkersuisoqarfimmit arsaarinnissutaasussaapput.

Sumiiffinni taakkunani pisassaatilinni 694-ini 50-it piumasaqaammik ukioq manna maannamut naammassinneqqasut, Sermitsiap paasivaa. Taamaalilluni aalisartorpassuit namminneq pigisaminnik pisassaqalersimasut pisassaatiminnik aappaagumit ilanngartuunneqarsinnaanerat ilimanaateqarluarsinnaavoq. 

Kattuffiit siulittaasuisa aarleqqutitik kissaatitillu, Aalisarnermut, Piniarnermut, Nunalerinermut Imminullu Pilersornermut Naalakkersuisumut, Peter Borgimut (D), Ilulissani sisamanngornermi tunniuppaat. Kissaatinut atuisussaatitaanerup atuukkunnaarallarnissaa ilaavoq.

- 75 %-imik atuinissamik pisussaaffik ukiuni tallimani, maanna 2031 ilanngullugu, unitsinneqarallassaaq. Piffissami tassani atuinissamik pisussaaffimmik naammassinninnginneq kisimi pissutigalugu aalisartut pisassaminnut piginneqataassutiminnik annaasaqartinneqassanngillat, kattuffiit siulittaasui allapput.

Aalisarnermut Naalakkersuisoq: Naalakkersuisut aaqqiisariaqarput

Aalisartut kattuffiisa kissaataat, Naalakkersuisup akisussaasup qanillattorpaa. Taanna nammineerluni Sermitsiamut oqarpoq. Naalakkersuisullu aaqqiinissaminnik isummereersimasut, taassuma aamma nassuerutigaa.

- Aalisartut kattuffiisalu sumut ingerlarusunnerat ersarinnerusumik maanna ilisimasaqarfigilerpara. Naalakkersuisunit 75 procentimik qalluisussaatitaanermi apeqqummi aaqqiisariaqarnerput killiffigereerparput. Maannakkullu aaqqiissutissaq sorlerpiaassanersoq naniniagassarilerparput, Peter Borg oqarpoq.

Inatsisartuni amerlanerussutillit atuisussaatitaaneq illersoraat 

Inatsisartunut ilaasortat septembarip 30-ni ataatsimiinnerminni aalisarneq pillugu Inatsisartut inatsisaata allanngortinnissaa pillugu Inatsisartut inatsisissaattut siunnersuut oqaluuseraat. Oqallinnermi tassani amerlanerussuteqartut qaleralinniat 75 procenti angullugu tulaassuissasut kissaatigigaat oqariartuutaavoq. Tassa kattuffiit kissaataata akerlia Naalakkersuisullu maanna qanillattungaata aamma akerlia. Inatsisartut suliassaq tamanna ataatsimiititaliami suliarissavaat. Tamannalu aamma tusaaneqartariaqartoq Naalakkersuisoq oqarpoq. 

- Inatsisartuni ataatsimiititaliap sulinera taanna aamma utaqqimaartussaavara. Kisianni nipi maanna pingaarutilik tusaavarput. Aaqqiisoqartariaqarpoq. Taannaalu aamma Naalakkersuisuni suliassatut ingerlatissavarput, Peter Borg oqarpoq.

Kattuffiit: Qaleralittassiissutit oqilillik

Aqutsiveqarfik 47-mi sinerissap qanittuani qaleralinniarneq pisassiissutaasut eqqarsaatigalugit naapertuuppallaanngilaq. Sumiiffimmimi tassani qalerallit pisassiissutaasut ukioq manna 33.997 tonsiupput. Pisassiissutinit taakkunannga oktobarip aallartilaarnerani pisarineqartut 12.500 tonsit missaannaaniipput. Taamalilluni pisassat 37 procentiisa missaannaat maannamut aalisarneqarput. 

Kattuffiit siulittaasuisa ilaasa oqariartuutaat aamma tassaavoq, qanorluunniit aamma suulluunniit piniutit atorlugit aalisaraluarunik pisassiissutaasut tamakkerlugit ukioq manna qaqinneqarsinnaassanngitsut. Tamanna ilaatigut peqqutigalugu kattuffiit qaleralittassanik ukiuni tallimani tullerni oqilisitsiartornissaq kissaatigalugu Naalakkersuisumut aamma tunniussipput.

- Sumiiffimmi 47-mi qaleralittassat TAC-at ukiumut 15 %-imik annikillisarneqassaaq, aallaavigalugu 34.000 tonsit missaannik annertussuseq. Taamatut annikillisaanermut periusikkut TAC 2031-mi 15.000 tonsit missaannut appassaaq, kattuffiit siulittaasui Naalakkersuisumut allapput.