Kalaallit Nunaanni Folketingimut qinersinissaq ulluni kingullerni sammineqarnerulerpoq naalakkersuisunut ilaasortat marluk, Anna Wangenheim (D) aamma Naaja H. Nathanielsen (IA), qinigassanngortinniarlutik nalunaarmata.
- Qanorluunniit pisoqaraluarpat inuit oqallisigissavaat, Sermitsiami aaqqissuisuuneq pisortarlu Masaana Egede oqarpoq.
Kalaallit Nunaanni Folketingimut qinersinissaq ulluni kingullerni sammineqarnerulerpoq naalakkersuisunut ilaasortat marluk, Anna Wangenheim (D) aamma Naaja H. Nathanielsen (IA), qinigassanngortinniarlutik nalunaarmata.
- Qanorluunniit pisoqaraluarpat inuit oqallisigissavaat, Sermitsiami aaqqissuisuuneq pisortarlu Masaana Egede oqarpoq.
Kalaallit Nunaanni qineqqusaarneq arriitsumik aallartittoq taanna naliliivoq:
- Folketingimut qinersinerup aallartinnerata kingorna partiit arlallit qinigassanngortitaminnik saqqummiussiniaaluusaarput. Taamaammat kikkut qinigassanngortinnersut kingusinnerulaartumik paasineqarpoq, taanna oqarpoq.
Angusarissaartut kingoraarneqassasut
Kalaallit maannakkut folketingimi ilaasortat, Aaja Chemnitz (IA) aamma Aki-Matilda Høegh-Dam (N), qinigassanngorteqqinngillat. Taakku tamarmik qinersinerni kingullerni tusindilinnik taaneqarput, taamaammallu folketingimut ilaasortat misilittagartuut taakku marluk kikkut kingoraartigissaneraat immikkut soqutiginarpoq:
- Aaja Chemnitzip Aki-Matilda Høegh-Damillu kingoraartissaat kikkunnik inuttalerneqassanersut eqqarsaatigalugu qinigassanngortittut ilarpassui misilittagakitsuupput, Masaana Egede oqarpoq nangillunilu:
- Immaqa taamaammat misilittagartunerulaartunik qinigassanngortitsinissaq eqqarsaatigineqarlerpa? Anna Wangenheim aamma Naaja H. Nathanielsen taamaalillutik qinigassanngortipput, taanna naliliivoq.
Oqallitsitsillutillu akerlilersorneqartut
Masaana Egedep Naalakkersuisut marluk qinigassanngortinnerat tupaallaatigisimallugu erseqqissarpaa, taakkuli Folketingimut ilaasortanngornissaat ajornanngitsoq isumaqarpoq:
- Naalakkersuisut ilaasortaapput, taamaammat qinersisussaqarluarput.
- Imaanngilarli toqqaannartumik Folketingimi ilaasortanngssasut, Naalakkersuisunummi ilaasortat maannakkut atorfimminni sulinerminnik ingerlatitseqqittussaanerat ilimagineqarsinnaagaluartoq aamma qinigassanngortittarnerat oqallisigineqareerlunilu akerlilersorneqareerpoq.
Pissaanillit nikinnerat danskit kalaallillu attaveqatigiinnerannut sunniuteqarsinnaasoq
Folketingimut qinersisoqarnerani Danmarkimi naalakkersuisut allanngorsinnaammata tamannalu Kalaallit Nunaannut sunniuteqarsinnaammat Masaana Egedep aammattaaq maluginiarpaa.
- Pingaarutillit pineqarput, Folketingimummi qineqqusaarnermi Kalaallit Nunaata Danmarkillu attaveqatigiinnerat eqqartussallugu pissutissaqarluarpoq, oqarpoq nangillunilu:
- Naalakkersuisut maannakkut issiasut Kalaallit Nunaannut ammalluinnarput, Kalaallit Nunaallu namminersulivinniaraluarpat naalagaaffeqatigiinnermiiginnarniaraluarpalluunniit pingaartinnagu ikiorumaarlugu ersarissumik oqarsimapput.
- Naalakkersuisunngortussat maanna naalakkersuisuusutut Kalaallit Nunaata periarfissaanut ammanerattut ammatigissanersut nakkutigissavara, Masaana Egede naliliivoq.
