Ajoraluarpoq. Ajorluinnarpoq. Ingerlatsisup Qulu Heilmannip sisorarfiup aallartinnissaanut pingaaruteqarluinnartoq ataaseq amigaataasoq allaffimminiit teqeqqumiittumiit majuartaammut naannermut takinermullu isikkulimmiit takusinnaavaa: aput.
– Paarnartarsinnaagaluarpugulluunnit, taanna Quassussuup ataani piffissami matumani seeqqoq tikillugu aputeqartaraluarluni maanna ivigaqarlunilu paarnaqutilimmi takuniaatitsinermini oqarpoq.
Ajoraluarpoq. Ajorluinnarpoq. Ingerlatsisup Qulu Heilmannip sisorarfiup aallartinnissaanut pingaaruteqarluinnartoq ataaseq amigaataasoq allaffimminiit teqeqqumiittumiit majuartaammut naannermut takinermullu isikkulimmiit takusinnaavaa: aput.
– Paarnartarsinnaagaluarpugulluunnit, taanna Quassussuup ataani piffissami matumani seeqqoq tikillugu aputeqartaraluarluni maanna ivigaqarlunilu paarnaqutilimmi takuniaatitsinermini oqarpoq.
Qulu Heilmann Nuummi majuartaammi ukiup aappaa avillugu ingerlatsisuusimavoq. Taanna naapertorlugu ukioq manna sila nalinginnaanngitsumik unammillernartoqarsimavoq.
- Maannakkut ajornakusoorluinnarpoq, ingammik sila pissutigalugu. Juullip nalaani apeqqaaraluarpugut, annikippallaarporli. Ammassagutta apingaatsiaqqaartariaqassaaq, taanna nassuiaavoq.
- Paarnartarsinnaagaluarpugulluunniit, Qulu Heilmann sisorartarfiup naqqaniitilluni oqarpoq.
Assi: Oscar Scott Carl
Ukiuusarnera allanngorartuaannartoq
Sisorarfiup qaqugukkut ammarneqartarnera ukiut tamaasa allanngortarpoq. Sisorarfik 2024/2025-mi juullip ukiortaallu akornanni – decembarip 29-anni 30-anniluunniit – ammarneqarpoq apriilillu qiteqqunnerata tungaanut ammalluni. Upernaakkut kingusinnerusukkut apeqqippoq, maajimilu majuartaat ulluni marlunni ammatinneqarpoq.
– Ukiut assigiinngillat. Ilaannikkut kingusissukkut, ilaannikkulli siusissukkut apisarpoq. Eqqaamanngilarali kingullermik qanga taama ajortigisumik pisoqarsimanersoq, Qulu Heilmann oqarpoq nangillunilu ukiuni 20-ni kingullerni aputip pitsaassusia unammillernartuusoq oqaatigaa.
Majuartaat sisorarfimmi matumani suli ammanngilaq, taamatuttaaq Nuussuup Mannguani Annersuullu eqqaani ujakkaarfiit suli piareersarneqanngillat.
Aputeqanngilaq – aamma ujakkaarfinni
Ujakkaartarfiit suliarineqarnerat arlaleriarluni ingerlanneqartarpoq. Siullertut aqqutit atorneqarsinnaalerniassammata ATV-t assallatserutit atorlugit aput nutaaq manngersarneqartarpoq. Kingusinnerusukkut apeqqissimatillugu – sukuutsernermut ujakkaarnermullu - aqqutit silinnerulersillugit pitsaanerulersillugillu maskiinat qimussillu anginerusut atorneqartarput.
– Maannali ajoraluartumik iliuuseqarsinnaanngilagut. Aput naammanngilaq, Qulu Heilmann oqarpoq.
Maannakkut sisorarfiit naammattumik aputeqanngimmata maskiinat inissiisarfimmiipput.
Assi: Oscar Scott Carl
Illoqarfitsinni sisorartartut — sisoraatinik sangusaartartut, freestylertut, snowboardertartut ujakkaartartullu — ingammik eqqugaasarput.
– Sisorartartunut pikkorissunut sunniuteqangaatsiartarpoq. Taakku sungiusarfissaqanngillat, tamannalu uggornarpoq. Ujakkaartarfiit piareersarusukkaluarpagut, silali apeqqutaavoq, taanna oqarpoq.
Aputiliuutit naammanngillat
Sisorarfik marlunnik aputiliuuteqarpoq, taakkuali sisorarfiup naqqaniinnaq atorneqarsinnaagamik naammanngilluinnarput.
– Aputiliuut issittumi aputiliorsinnaalertarpoq, uagulli aputiliuutitta sumiiffik annikitsuinnaq qallersinnaavaat. Sisorarfimmi qullasinnerusumi aputiliuutitaarluta siunissami inerisaasinnaanissarput neriuutigaarput, taanna nassuiaavoq.
Tamatuma nalaani aput aattoq qaqqamit kuuttoq tusarsaavoq.
– Tappikani imeqarluarpoq. Aput aappoq, sisorarfillu imiinnaavoq. Maskiinat aputikkoorsinnaapput - immassimasukkoorsinnaanngillalli, taanna oqarpoq
Illoqarfimmi ukiuunerani ornigarneqarluartartoq
Ullormi ammaanersiorfimmi nalinginnaasumik inuit 300-t missaanniittut majuartaammut orniguttarput. Sisorarfik sisorartartunuinnaanngilaq, aammali ilaqutariinnut isiginnaarianullu katersuuttarfiuvoq.
Nerisarfik maanna inoqanngilaq. Siorna decembarip 29-ani ammaanersiornermi inuit 300-t missaanniittut takkussimasut Qulu oqaluttuarpoq.
Assi: Oscar Scott Carl
– Illoqarfimmi ornigarneqarluartut ilagaat. Inuit kaffisorniarlutik, fransk hotdog-itorniarlutik toastitorniarlutilluunniit aammalu qitornat ernuttallu sisorartut isiginnaarniarlugit aggertarput, Qulu Heilmann oqaluttuarpoq.
Ukiorli manna atuisut sulisullu naammagittartariaqarput. Sulisut — katillugit sisamaasut — utaqqinerminni sannavik torersarlugulu, kingoraartissat piareersarlugillu atortut iluarsartarpaat.
– Silassaq ullut tamaasa malinnaavigisarlugulu ullut tulliuttut qulit qanoq issanersut misissortarparput. Sapaatip akunnerani tulliuttumi sila kiassangatinneqarpoq, pingasunngornermili januaarip qulingani nittaassasoq ilimagineqarpoq. Neriuppugut apingaatsiassaasoq, taanna oqarpoq.
Tungaanut majuartaat naanneq annerlu suli uninngapput. Najummisui suli inissiisarfimmiillutillu majuartaatip takinerup illuarartaaniipput - piareeqqallutik atorneqaratilli.
– Soorunami qanittukkut apinissaa neriuutigaarput, Qulu Heilmann sisorarfimmi taartumi aputeqanngitsumilu oqarpoq.
Qamuteralaat peqatigiiffiup illuutaata saavani uninngaannarput.
Oscar Scott Carl
