Ajussutsip oqapalaarsua

Oqarasuaatip angallattakkap qarasaasialluunniiluut naqitassartaa taannaalersimavoq inuit attaveqaqatigiittarfiini ingasappallaarujussuartumik ajussutsip kamaallu oqaasipalaavinik aniatitsiffik.

Taamatummi misinnartarmat inuit attaveqaqatigiittarfiini saqqummersut malinnaaffigalugit, pingaartumik Facebookimi. Ila oqaatsit atukkat sakkortullaraangamik ilaanni, kamassartorujussuit aniatitaat qinngarsuerujussuarnerillu akueriuminaattaqalutik. Pingaartumik sapaatip akunnerata naanerani unnulluartukkut unnuamilu killeeruttut sapiillilluinnarsimallutik, immaqami najoqqakkaminnik, soqqusaattassusii. Aamma maanna silassorissuusiap assitigut takussutissiai ilannguttaleramikkit mitalliutitut, taamaaliortullu takutiinnartarpaat qanoq iluanngitsiginertik.

Ilaannimi imminut apereqqajaanartarpoq: Suleqisoq-una, qinngarsuigaluassusia inummut allamut assuarlernini piinnarlugu?

Mingunnartut

Inuit ilaasa kakkaffigilluinnagaraat qarasaasiartik mobilertillu eqqortinnaveersaatitut assiaqutsiullugu qamuuna sorpajuussutsiminnik aniatitsisinnaanertik. Asugooq politikkikkut akerlerisatik inuilluunniit allat iluarinngisatik killeerullutik qinngarsorniassagamikkit.

Sapiillingaarsimallutik kingunissai soqutiginagit akerartuilinngaraata eqqarsarnartarpoq: Qanoq taamarsuaq?

Facebookimi inuillu attaveqaqatigiittarfiini allani akisussaasut nalunngittariaqaraluarpaat inoqatiminnik qinngarsuerujussuarlutik allattartut kikkuunersut killiliillutillu. Soorlu Facebookimi nalunaaruteqartoqarsinnaagaluarpoq, taannali iluaqutaarpiarneq ajorluni.

Ilaasa iIleqqorissaarnissartik puigorlugu inuit attaveqaqatigiittarfiisigut kamannerujussuartik nittarsaatiinnaleqqavaat. Allaanngilaq perorsarsimarpalaalaarnissannguarluunniit pissuserinnissarlu ileqqussaanngitsut.

Immaqa nalunaarutigineqarsimallutik politiinit aatikkunik kasuttorpaluk tusaaginnarlugu siniffiup ataanut skaavimmulluunniit sajuttuinnaallutik toqqorniassagamik, uffa soqutigisaarullutik kingunissaalu eqqarsaatigeqqajarnagit sapiitsorsuaasaarnikuullutik. Taakku kamaap inui, eqqortinnaveersaaserlutik akerartuiinnavissut.

Naammatsinneq

Nunatsinni isorartuumi imminnullu ungasissuni najugaqarfigineqartumi inuit attaveqaqatigiittarfii onlinekkut peqatigiinnermi sukkasuumillu attaveqatigiittarnermi atussallugit iluatinnarmata ulluinnarni amerlasuut atorusuttarpaat. Oqalorujuutilli amerlasaqimmata digitalikkullu peqataanissami perorsarsimaarpalaarnerunissaq amigaataammat pissutsit taamaalisimanerat ajoqusiisaqaaq.

Nittartakkami iluamik oqalunnissamut sapiissuseqarnissaq naapinnermilumi tamanut pitsaanerpaasarpoq. Taamaattumik oqalorujuinnavissunik killiliisariaqarpugut aamma iliuutsiminnut akisussaassuseqanngitsunik. Oqallinnermi isumaqatigiinngittoqarsinnaavoq qinngarsuinermut saatinngikkaluarlugu.

Uagut inersimasuusugut inuusuttagut peroriartortut ilinniartitassaraagut peqqissumik oqalliseriaaseqarnissaannik. Kamak ajornartorsiutinut aaqqiissutiginiassallugu iluaqutaavallaarneq ajorpoq. Pingaartumik qinngarsuinersuaq inoqatinut qunusaarutiginiaannaraanni.

Ussatip oqarneratut:” Kamak soorlu timip seernaa taqqami inuttaanik ajoqusiiginnartartoq, pisani pinnagit!”