USA-p Kalaallit Nunaannik tiguaanissaa Danmarkip pinngitsoortissappagu Kalaallit Nunaata Danmarkimiiginnarumalluni nammineq nalunaaruteqarnissaa pingaaruteqarpoq.
Konservativit sinnerlugit Folketingimut ilaasortaq Rasmus Jarlov taama isumaqarpoq.
USA-p Kalaallit Nunaannik tiguaanissaa Danmarkip pinngitsoortissappagu Kalaallit Nunaata Danmarkimiiginnarumalluni nammineq nalunaaruteqarnissaa pingaaruteqarpoq.
Konservativit sinnerlugit Folketingimut ilaasortaq Rasmus Jarlov taama isumaqarpoq.
Jarlov nunani tamalaani tusagassiuutinit apersorneqartarsimalluni, tassanilu Kalaallit Nunaata Danmarkimut ilaanini naammagiunnaarmagu kalaallit USA-mut ilanngunneq iluarissaneraat aperineqartarluni Facebookimi allappoq.
Oqariartuut tamanna USA-p tiguaaniarluni pilersaarutaanut tunngavissiilluartuusoq Rasmus Jarlov isumaqarpoq.
- Nunamik tiguaanerunani iperaanerussaaq
Amerikamiut tiguaaniarnerat Danmarkip Jarlov naapertorlugu sapinngisani tamaat pinngitsoortinniarpaa, iluatsissappalli Kalaallit Nunaat peqataasariaqarpoq:
- Danmark nunasiaatilittut ajortutut pissaaneqartuuppat Amerikamiut Kalaallit Nunaannik tiguaanissaat innarliinerunani iperaanerussaaq.
- Amerikamiut politikkeriisa tamanna imminut nunanullu allanut illersorsinnaavaat, nunarsuarmioqatigiillu tamanna akiorsinnaanngilaat, Danmarkilu assuariinnarnagu Amerikamiut paatsuugassaanngitsumik assuarinissaannut ikiuisimasuugussi taamaaliorsinnaagaluarput, Rasmus Jarlov kajumissaarivoq.
Danmarkip Kalaallit Nunaatalu akornanni isumaqatigiinnginneq sakkortusiartuinnartoq ulluni kingullerni ersersinneqareersoq taama nalunaaruteqarpoq.
Vivian Motzfeldt siuttuusariaqartoq
Danmark Kunngeqarfimmi nunanut allanut sillimaniarnermullu politikkimut akisussaasuugaluartoq Nunanut allanut tunngasunut naalakkersuisoq Vivian Motzfeldt (S) sapaatip akunnerani matumani USA-mik ataatsimeeqateqarnissami siuttussaasariaqarluni tallimanngormat DR-imut oqarpoq.
Parteeqataa Siumumilu siulittaasup tullia Ineqi Kielsen assingusumik Radio 4-mut sapaatiummat nalunaaruteqarpoq, taamatuttaarlu kalaallit danskillu politikkeriisa USA-mi pissutsit pillugit Teamsikkut ataatsimiinnerat sukannersumik oqalliffiusimasoq DR sapaatip akunnerani siusinnerusukkut oqaluttuarpoq.
Aammattaaq Kalaallit Nunaanni USA-p Kalaallit Nunaannik tiguaaniarnera aarlerinartorsiortitsinertut isiginagu periarfissatut isiginnittunik politikereqarpoq.
Assersuutigalugu Naleqqamit Inatsisartunut ilaasortaq Kuno Fencker USA-mik kiffaanngissuseqarlunin suleqatigiinnermmik isumaqatigiissuteqarnissaq Kalaallit Nunaata namminiilivinnissaanut aqqutissatut isigalugu Amerikamiut tv-qarfiannut CNN-imut oqarpoq.
Naalakkersuisut sapaatip akunnerani matumani ataasinngornermi ullup-qeqqata siornatigut erseqqissumik nalunaaruteqarput, tassani Naalakkersuisut siulittaasuata Jens-Frederik Nielsenip (D) Kalaallit Nunaat Kunngeqarfiup Danmarkip ilagigaa tusagassiuutinut nalunaarummi naatsumi naqissuserpaa.
