Akerliussutsimik takutitsiniartut amerliartortut

USA-p Kalaallit Nunaannik tiguaaniarneranut akerliussutsimik takutitsinissamut arfininngornermi nalunaaqutaq ataatsimut qaaqqusisoqarpoq, maannalu illoqarfinni allani marlunni aamma taamaaliortoqartussanngorluni.

Aasianni nal. 13 akerliussutsimik takutitsisoqassaaq, tassani timersortarfiup silataaniit kommunip allaffiata tungaanut ingerlaaqatigiittoqassalluni:

- Kaammattuutigaarput akerliussutsimik takutitsinermut erfalasorput nassarneqassasoq, ingerlaaqatigiinnerlu ataqqinnittumik eqqissisimasumillu ingerlanneqarnisaa. Kinaassusersiorneq, persuttaaneq aserorterinerlu akuerineqanngilluinnarput, aaqqissuisut Facebookimi nalunaarumminni taama allapput. 

Aamma Qaqortumi akerliussutsimik takutitsinermut qaaqqusisoqarpoq, taanna "Kalaallit Nunaat kalaallinit pigineqarpoq"-mik qulequtaqarluni, aaqqissuisut illoqarfinni allani akerliussutsimik takutitsinissamut tapersersuinissartik ersersikkusuppaat.

Akerliussutsimik takutitsineq illoqarfiup puilasuliaata eqqaani ingerlanneqassaaq, tassanilu oqalugiartoqassalluni. Peqataasullu Erfalasorput nassassagaat kajumissaarneqarput.