Aki-Matilda: Nunarsuarmiut tusarnaaraangata Kalaallit Nunaata soqutigisai siuarsarneqartariaqarput

USA-p præsidentiata Donald Trumpip ulluni makkunani oqariartuutini uteqattaartarpai, tassa USA-p Kalaallit Nunaat pisariaqartikkaa.

Folketingimut ilaasortaq Aki-Matilda Høegh-Dam (N) Sermitsiamut oqarpoq Kalaallit Nunaata erseqqissumik oqarnera eqqortuusoq pisariaqavissorlu Kalaallit Nunaat ersersinnissaa, Amerikamiuunatalu Danskiunngitsugut.

Aammali naliliivoq USA-p præsidentiata piaaraluni kamassaarisoq, maannakkullu Naalakkersuisut siulittaasuat, danskillu ministeriunerat EU-lu Trumpip kissaatigisaatut iliortut:

- Maannakkut Kalaallit Nunaat, Danmark EU-lu tusagassiuutillu Donald Trumpip ’pinnguaataanut’ peqataapput. Maligassiuinerlunnerallu utikattuarparput.

- Taanna tusarusuppaa

- Isumaqarpunga tamanna tusarusukkaa, tassami naggataatigut Amerikamiut innuttaasuinut qinersisartunullu takutissinnaavaa Kalaallit Nunaat Danmarkilu oqaloqateqarusunngilluinnartut isumaqatigiissuteqarusunngilluinnartullu, taamaattumillu sakkutuut atorlugit aaqqiinissaq pissutissaqarluartoq, Aki-Matilda Høegh-Dam oqarpoq.

Taamaattumik politikeri isumaqarpoq kalaallit partiini siuttuusut ataatsimeeqatigiinnissaat pisariaqartoq, pissutsit taamaatsillugit kalaallit kissaataat piumasaqaataallu paasiniarlugit:

- Kalaallit Nunaanni innuttaasut eqqarsaatigalugit matoqqasumik qanorlu iliorniarnerluta piaarnerpaamik paasiniartariaqarparput erseqqissumillu nassuiaallugu.

Isumaqanngilarlu Amerikamiut sakkutuuisa akuliunnissaat qanillisoq, aamma isumaqarpoq Kalaallit Nunaata diplomatii aqqutigalugu USA oqaloqatigisariaqaraa.

Nunarsuaq maanna tusarnaartillugu Kalaallit Nunaata soqutigisai nittarsaanneqartariaqarput

- Nunarput naaggaaannarani aamma angersinnaasariaqassaarli. Nunarsuup tusarnaarnerani Kalaallit Nunaata soqutigisai nittarsaanneqartariaqarput, folketingimut ilaasortaq oqarpoq.

Folketingimut ilaasortaq isumaqarpoq USA-mi innuttaasut Kalaallit Nunaata tigunissaanik tapersersuinissaat ilimanarluinnartoq, Donald Trumpip tunngavilersuutaanit sunnerneqarsput, tassami Kalaallit Nunaat USA-p nunap sillimaneranut pingaaruteqarmat.

- Kalaallit Nunaat Amerikamiut pinnguaataannut peqataajunnaartariaqarlunilu siulliulluni iliuuseqartariaqarpoq.

Apeqqut: Kalaallit Nunaata USA-mik isumaqatiginninniarnissaa ernumaginnginnerpiuk?

- Annilaangassutigaara, periarfissaqalissagaluarutta, Danmarkip kissaatigisai kisiisa eqqarsaatigalugit, suna kissaatiginersoq suli paasiniarsimanngikkaluarutsigu.

- Maanna Folketingimi issiavunga, takusinnaavaralu danskit naalakkersuisui USA-mik isumaqatigiissuteqartuartut. imaanngilarlu Kalaallit Nunaat apereqqaarneqartartoq.