Akileraartarnermut Aqutsisoqarfik Suila-tapit kukkuneqarneri pillugit: Kukkunerput nassuerutigaarput

Innuttaasut 7.161-it, Suila-tapisivallaarsimallutik akiligassaqalernerminnik Akileraartarnermut Aqutsisoqarfimmit aggustip 20-anni allagarsisut amerlaneroratanngikkunik ikinneroratarsinnaapput.

Akileraartarnermut Aqutsisoqarfimmi naatsorsuinerliortoqarnerani kukkunerit iluarsiniarlugit maanna ulapputtoqarpoq. Taamaammat tapinut tunngatillugu akiligassallit utertoorutissallillu siornatigornit nalunaarutigineqartunit amerlanerunngikkunik ikinnerupput.

- 5.000-unersut 9.000-unersulluunniit naatsorsuisoqareertinnagu oqaatigisinnaanngilara, Akileraartarnermut Aqutsisoqarfimmi attaveqatigiinnermut pisortaq Søren Würtz oqarpoq.

Akileraartarnermut Aqutsisoqarfik Suila-tapit pillugit ukiumoortumik naatsorsuutit iluarsiniarlugit ulapputigaat. Naatsorsuinerillu taakkua qulakkeerluaqqaarlugit qassit akiligassaqarlutillu utertoorutissaqarnersut oqaatigisinnaavaat.

- Kukkunerput nassuerutigaaput, tamannalu ajuusaarutigaarput, Søren Würtz oqarpoq.

Naatsorsuinerni kukkunerit amerlanerusut

Søren Würtzip oqarnera naapertorlugu tapiissutit naatsorsorneqarneranni kukkunerit arlallit nassaarineqarput.

Siullermik innuttaasut 2025-p ilaannaani akileraartussaatitaasut pillugit kukkusoqarsimavoq. Aammali nunatsinni soraarnerussutisiassanut tunngatillugu kukkusumik nalunaarsuisoqarsimalluni.

Aammali suliffik aqqutigalugu soraarnerussutisiassanut katersisut pillugit nalunaarsiuffik kukkusoq aallerfigineqarsimavoq. Taamaalilluni innuttaasut ataasiakkaat soraarnerussutisiassatut katersaat naatsorsuinermi ilanngunneqarsimanatiked i borgernes indkomstgrundlag.

Innuttaasut ataasiakkaat isertitaat pillugit paasissutissat aallaavigalugt Suila-tapisisinneqartarput. Taava ukiup tulliani kingumoortumik naatsorsuisoqarnerani qasserpianik tapisiassaqarsimanersoq paasineqartarluni.

Kikkut akiliissanersut suli ilisimaneqanngilaq

Akileraartarnermut Aqutsisoqarfik innuttaasut qanoq amerlatigisut akiligassaqarlutillu Suilasiaminnik utertoortussaanersut suli ilisimanngilaa.

- Aatsaat sapaatip-akunnera una naalerpat, tulliataluunniit aallartilaarnerani paasissavaarput. Paasissutissat eqqortut qulakkeerluaqqaartariaqaratsigit, Søren Würtz oqarpoq.

Akileraartarnermut Aqutsisoqarfiup naatsorsoqqitatik qulakkeerlugit misissoqqaassavaat. Taassumalu kingorna innuttaasut tamarmik naatsorsuutaat paasineqarsinnaalissapput.

Innuttaasunut ajuusaartut

- Naatsorsuinerni siullerni kukkuneq paasineqarsimanngimmat assut ajuusaarutigaarput. Innuttaasummi paasissutissanik eqqortunik apuussiffigerusukkaluarpagut, Søren Würtz oqarpoq.

Innuttaasut akiligassaqarlutik nalunaarfigineqariarlutik ilumut akiligassaqarnerlutik paasiniarlugu utaqqeqqittariaqalerlutik naammagittaalliorpata paasisinnaallugit oqaatigaa. Kukkunerullu kingorna Akileraatarnermut Aqutsisoqarfimmut tatiginnikkunnaarnermik kingunneqarsinnaanera nassuerutigaa.

- Innuttaasut tatiginnissanersut uagut aalajangersinnaanngilarput. Kukkunerpulli nassuerutigaarput, aamma aaqqinniarlugu tamaviaarluta sulivugut, taanna oqarpoq. 

Suila-tapinut naatsorsuutit nutaat septembarip qulingani nassiussuunneqassapput. Tassanilu kikkut akileeqqissanerlutik utertuussanerlutilluunniit paasissavaat. Akiligassaqaraanni ullut 30-t iluanni akilerneqassapput.