Aleqa Hammond: Naalakkersuisoqataaginnassanerluta naliliiffigissavarput

Siumut siulittaasuata naalakkersuisunut ilaasortat marluk, tassaasut Anna Wangenheim aamma Naaja H. Nathanielsen Folketingimut qineqqusaarnerat iluarinngilluinnarpaa. 

- Naalakkersuisoqatiginukua susut? Uanga kisima taama aperinngilanga, inuiaqatigiit tamarmik taama aperipput, Aleqa Hammond taama oqarpoq. 

Taama sakkortutigisumik isornartorsiuiutigalutik  naalakkersuisoqatigiinniiginnarnissartik apeqquserpaat. 

Taava tassa imaappoq, naalakkersuisoqatigiinnit tunuarataannaavusi? 

- Uagut naalakkersuisoqatigiiginnarniarsarisinnaanngilagut nalunagu suleqatigisagut Inuit Ataqatigiit Demokraatillu malittarisassat avaqqullugit sassartitseqattaarpata. 

Saniatigooralugu naalakkersuisuusoqarsinnaanngilaq

Aleqa Hammondip taama isornartorsiuinermini naalakkersuisunut ilaasortat naalakkersuisuuneq tamakkiisumik suliffigisussaagaat tunngavilersuutigaa. 

-  Qinigassanngortikkusukkunik qinigassanngortinniarlik. Apeqqusernartua uaniippoq, naalakkersuisuni atuuffik 100 procentiuvoq tamakkiisumik suliffiusoq. Piumasaqaataavoq Nuummi najugaqassasut suliffik tamakkiisumik suliffiummat.

Inatsisartummi Naalakkersuisullu pillugit Inatsisartut inatsisaanni 2010-mi novembarip 18-ianneersumi kapitali 5-imi ima allassimasoqarpoq: 

"Imm. 4. Inatsisartut siulittaasuat, Naalakkersuisut siulittaasuat Naalakkersuisunilu ilaasortat atuuffinnik inuussutissarsiutinilluunniit pineqartunik ingerlatsinermik saniatigut atuuffinnik inuussutissarsiutinilluunniit nutaanik Qinersinerup Misilinneqarnissaanut Ataatsimiititaliaq akuersereersimatinnagu tiguseqqusaanngillat."

Inatsit isumaqarpoq naalakkersuisutut atuuffeqartoq qinigaaffiup iluani allamik atuuffeqarsinnaanngitsoq, qinersinerup misilinneqarnissaanut ataatsimiititaliq akuersisimatinnagu. Qinigaaffiulli nalaani atuuffinnut allanut qineqqusaarnissamut inatsit mattussinngilaq. Naalakkersuisuusorli atuuffimminit tunuartariaqassaaq assersuutigalugu Folketingimut qinigaalluni tassani atuuffeqarumassaguni. 

Tupigusuppoq 

Siumut naalakkersuisoqatigiinnut peqataaginnassanersoq siulersuisuunerit isummerfigisussanngorpaat. 

- Naalakkersuinermi inissisimaffipput siulersuisuunerni eqqartussavarput. Utaqqimaartariaqassaasi. 

Naalakkersuisunut ilaasortat Folketingimut qinigassanngortinnerat  siulittaasup tupigusuutigaa. 

- Naalakkersuisoq siulleq sassarmat tupigusuutigisorujussuuara. Aammalu aappermat suli tupiguttanneruvunga. Inuttai namminerisamik apeqquserneqanngillat. 

Aleqa: Qineqqusaarratilersunukua? 

Taamaammat naalakkersuisut siulittaasuat qanoq pisoqarniarneranik nalunaaruteqartariaqarnerarpaa. 

- 'Qinigaaguma qimassuara, qinigaanngikkuma uteqqikkumaarpunga naalakkersuisunngoqqikkumaarpunga'. Nunatta aqunneqarnera taama pineq ajorpoq. Naalakkersuisut siulittaasuat iliuuseqartariaqarpoq, Aleqa Hammond oqarpoq.

Naalakkersuisunummi ilaasortat amerlanerusut sassarsinnaanerat Aleqa Hammondip aarleqqutigaa. 

- Naalakkersuisut siulittaasuat oqaaseqartariaqarpoq: Susoqartoruna? Naalakkersuisuutitaajuukua susut? Qineqqusaarratilersunukua? Imaluunniit saniatigooraluguuna naalakkersuisuutitaqarniartoq?, Aleqa Hammond taama oqarpoq.

Jens-Frederik: Pisinnaatitaafigaat 

Naalakkersuisulli siulittaasuat Jens-Frederik Nielsen naalakkersuisoqatigiinnit aniniarlutik siorasaarisunut ugguarpoq.

- Uggorissaqaara naalakkersuisoqatigiinneq naalakkersuisut marluk Folketingimut sassarnerat peqqutigalugu apeqqusilersimassappassuk, Jens-Frederik Nielsen oqarpoq. 

Folketingimut qineqqusaarneq pisinnaatitaaffiunerarpaa. 

- Uanga naalakkersuisut siulittaasuattut inuit ataasiakkaat, naalakkersuisunut ilaasortat, Inatsisartunut ilaasortat innuttaasut allalluunniit pisinnaatitaaffiiarnavianngilakka. Taamaammat inatsisit maleqqissaarlugit suna tamaat maleqqissaarlugu kalluaanngitsumik sassarsinnaatitaapput. Taannalu pisinnaatitaaffik atorpaat. 

Naalakkersuisunut ilaasortat marluk sassartut Folketingimut isissagaluarunik naalakkersuisuujunnaassasut erseqqissaatigaa. Qineqqusaarnerminnili sulinngiffeqarnavianngitsut ilanngullugu oqaatigalugu. Aalajangiisussarli ataasiinnaavoq. 

- Innuttaasut aalajangissavaat, innuttaasullu aalajangerunikku taakkua arlaat piukkullugu nunarput sinnerlugu Folketingimi issiassasoq, taava innuttaasut aalajangigaat ataqqissavara.