Aleqa Jens-Frederillu ataatsimiipput:  Isumaqatigiinnginnerput isumaqatigiissutigaarput

Naalakkersuisut marluk Folketingimut qineqqusaarnerat Aleqa Hammondip isumaqataaffiginngittuarsinnarpaa. Naalakkersuisullu Siulittaasuat Jens-Frederik Nielsen ataatsimeeqatigigamiuk tamanna annguppaa.

- Erseqqissarpara naalakkersuisut akisussaanermut malittarisassai, tassani allaqqammat naalakkersuisoq 100 procentimik sulisussaavoq. Allanik soqutigisarsorsinnaanngilaq. Uanga imannak isigivara, naalakkersuisut susassaqarfimminni suliaqarlutik maannakkut angalanngillat. Angalapput allamik soqutigisarsorlutik. Naatsumik oqaatigalugu allamik suliffeqarusullutik.

- Taanna uagut inooqatiaaffigisinnaanngikkipput. Aamma paasisinnaanngilara sooq naalakkersuisut siulittaasuattut sulinngiffeqarnissaanut qinnuteqartissimanngikkai.

Anna Wangenheimip (D) Naaja H. Nathanielsenillu (IA) Folketingimut qineqqusaarnerat inatsisinik unioqqutitsinerunngitsoq, Inatsisartuni Qinigaanerup Misilinneqarnissaanut Ataatsimiititaliap siulittaasuata Iddimanngiiu Biancop KNR-imut nassuiaatigaa.

- Ataatsimiititialiaq atorfilittatsinnit inatsisinik naliliinermik tigusaqarpoq, tassani naalakkersuisoq Qinigaanerup Misilinneqarnisaanut Ataatsimiititaliamit akuersissuteqarfigineqaqqaartariaqanngitsoq naliliissutigineqarpoq, Iddimanngiiu Bianco KNR-imut taama oqarpoq.

Siulersuisuunerit ataatsimiissasut

Partiit siulittaasui taakkua marluk ippassaq ataatsimiinnerat naaperiarfiuallaanngilaq.

- Isumaqatigiinnginnerput isumaqatigiissutigaarput, Aleqa Hammond oqarpoq.

Naalakkersuisoqarfiit marluk, Mads Pedersenip Bentiaraq Ottosenillu naalakkersuisuuffigisimasaasa inoqannginnerisa saniatigut, naalakkersuisoqarfiit marluk naalakkersuisut marluk qineqqusaarneranni inoqanngikkallarneri Aleqa Hammondip ernummatigaa.

- Naalakkersuisoqarfiit sisamat inoqanngillat.

Siumullu siulersuisuuneri ullumi ataatsimiissapput.

- Taava takussuarput qanoq aalajangernerluta.

Ullumi qanoq ilinerani?

- Ullumi, naammagigallarniaruk taanna, Aleqa Hammond naggasiivoq.