Alfredip Frederik aalisariaqatiserigaa

Kalaallini Siriusimi sakkutuujusimasuni siulleq, Alfred Olsen, ukioq manna aggustip 25-ani kunngikkormiut tikeraarnerannut atatillugu Skagenimi umiarsualivimmi kunngip umiarsuaani Dannebrogimi ilassinninnermut qaaqquneqarpoq.

Alfred Olsenip ilassinninnermut ataqqinartumut qaaqqusaanera immikkut ittumik pissuteqarpoq – aamma taanna immikkut ittumik ilassinninnermut takkuppoq. Tamanna aamma immikkut ittumik peqquteqarpoq.

Alfred Olsen Hundested Motorfabrikkimi maskiinalerisutut ilinniarsimavoq. Tamannalu 1970-imi ukiuni marlunni qimussimik alapernaarsuiartortitatut kiffartorniarluni Daneborgimut tikikkami iluaqutigingaarpaa.

Daneborgimi ataasiaannarluni unnuivoq. Taava Ella Ø-mut aallartinneqarpoq, tassani qimussimik alapernaarsuiartortitat pujortuleeraat Arnaq uninngavoq. Pujortuleeqqap morparpaartui ikuallassimammata ingerlasinnaanngilaq – Alfredilu immikkut ittumik maskiinalerisutut tunuliaqutaqarami iluarsaassinissamut piukkunnarluinnartoq alapernaarsuiffimmi pisortaq isumaqarpoq.

Tunup avannaani aasarsiorneq siulleq suleqateqarluni Ella Ø-mi ingerlanneqarpoq, tassanilu aserfallatsaaliuinernik assigiinngitsunik suliaqartarlutillu, aammali seqerngup kaaviinnarfiani pinngortitaq alutornartoq alutorsaatigisarpaat. Arnap iluarsaanneqarnera naammassipallappoq – aamma pujortuleeqqatoqqamik normulersorsimasumik, Svendborgip eqqaani Rantzausminde Bådebyggeri og Aarefabrikimi 1967-imi sananeqarsimasumik, uninngasuusivimmut ikaassisarnerit arlaqarput.

Arnaq 1992-ip tungaanut Siriusimit atorneqarpoq, tamatumalu kingorna tunineqarluni. Arnaq Danmarkimut pivoq, tassani umiatsialiortup Ole Stephansenip Aalborgimi Nørholmimeersup 2021-mi pisiaraa. Pujortuleeraq ullumikkut Nibemiippoq.

Pujortuleeqqat normulersorneqarsimasut nuannarigai

Ole Stephansenip pujortuleeqqat normulersorsimasut taakkualu nipaat immikkuullarilluinnartoq nuannarai. Uummannami peroriartorpoq, meeraanerminilu umiarsualivimmi motorit nipaat eqqarsaatigiinnarlugit killitsittarpoq.

- Arnaq pisiarigakku inuuninni takorluugara piviusunngortippara, taanna Sermitsiamut oqaluttuarpoq.

Arnaq ullumikkut suli Siriusip nalaanisut atortoqarpoq, pujortuleerarlu glasfiberi aluminiumilu Tunup avannaani suli atorneqanngikkallarmata sanaajummat katersugaasivittut ippoq.

Pujortuleeraq 7,5 meteriinnarnik takissusilik pissutigalugu Ole Stephansenip Alfred Olsen, ullumikkut Halsimi Limfjordenip paavani najugaqartoq, attavigaa.

Arnaq nalunaaquttap akunnerpassui najortarsimavaat - Kunngi Frederillu Dannebrogip aasaanerani angalaneranut atatillugu Jyllandip avannaanut tikeraarniartoq tusaramikkulu isumassarsipput, Kunngimi Siriusimut qanimut attaveqartoq ilisimaneqarpoq.

Kunngikkormiunut allakkat

- Kunngikkormiut allaffigalugit Kunngi Arnamut ilaalluni aalisariarnissaanut qaaqquarput, Alfred Olsen oqaluttuarpoq.

- Ataqqinartorsuaq suliassaqarpallaarami ajoraluartumik piffissaqanngitsoq Kunngikkormiut inussiarnersumik nalunaarput, Kunngilli Frederiup neqeroorutitsialak nuannaarutigingaaramiuk Dannebrogimi ilassinninnissamut qaaqquvoq.

Taava Alfred Olsen Ole Stephansenilu ulappuserput. Arnaq takullugu alutornassaqisoq isumaqaramik aggustip 25-ani Dannebrogip saniani pituttorsinnaanersoq Skagenimi umiarsualiviup pisortaanut allapput.

Tamanna ajornarluinnarpoq, illuatungaanili aalisariutaatillit talittarfianni pituttorfissinneqarput.

Angalaneq takisooq

Arnaq aggustip 22-ani Nibemi umiarsualivimmit Skagenimut aallarpoq. Angalaneq takivoq. Arnarmi 6 knobiinnarmik ingerlasinnaavoq – Limfjordenikkullu Skagenimut aqqutaa takivoq. Angalaneq ullup aappaa avillugu sivisussuseqarpoq, umiartortullu paarlakaajaallutik aquttarput.

Arnaq umiarsualivimmut pulagami, kunngillu umiarsuaa sanioqqutereeramiuk talippoq. Inuppassuit kunngikkormiut takuniarlugit talittarfimmiipput, aammali pujortuleeraq normulik takullugu nuannaarutigaat.

Ole Stephansen Alfred Olsenilu uivertunut sunnertinngillat. Pujortuleeqqap naqqani ineeqqami, aviisinit kipisanik eqqaamasanillu allanik Siriusip nalaaneersunik suli nivingasoqartumi, nalunaaquttap akunnialui sinipput.

Akunnialuit sinilereerlutik uffareerlutillu nalliuttorsiorpalaartumik ilassinninnissaq sioqqullugu pikipput.

- Peqataanerput soqutiginaqaaq - Kunngi Frederik Dronning Marylu oqaloqatiginninnissaminnut piffissaqarput. Ingammik Frederiup angalanerup qanoq ingerlasimanera soqutigivaa – aamma aalisariarnissamut piffissaqannginnini uggoraa, Alfred Olsen oqaluttuarpoq.

Alfred Olsenip Kunngi Frederik sapaatip akunnerata ataatsip ingerlanerani aappassaanik ilassivaa. Tassami illersornissaqarfiup Qimussimik alapernaarsuisut Siriusikkut aggustip 18-iani ukiunik 75-inngortorsiorneranut atatillugu nalliuttorsiortitsinerani kunngi aamma najuuppoq.

Taamani assammilaaginnarput, kunngilli Alfred Olsen inussiarnersumik isinnguaarlugulu qungujulalluni ima oqarfigaa:

- Arfininngorpammi takoqqikkumaarpugut.