KL

DK

Amerikamiunik illersornissamut isumaqatigiissuteqarneq Folketingimi oqaluuserisassanngortinneqartoq

USA-p, Kalaallit Nunaata Danmarkillu akornanni isumaqatigiissut Folketingimi sisamanngornermi novembarip aqqaneq-aappaanni siullermeerneqassaaq.

USA-p, Kalaallit Nunaata Danmarkillu illersornissamut isumaqatigiissutaat FN-ip allaffeqarfiani New Yorkimiittumi septembarip 22-anni atsiorneqarpoq. Tamatuma kingorna isumaqatigiissut Inatsisartuni siullermeerneqarlunilu maannakkorpiaq Nunanut Allanut Sillimaniarnermullu Ataatsimiititaliami suliarineqarpoq. Novembarip pingajuanni Inatsisartuni aappassaaneerneqassaaq. Isumaqatigiissut aamma danskit folketingianni suliarineqassallunilu novembarip aqqaneq aappaanni siullermeerlugu oqaluuserineqassaaq.
Trine Juncher Jørgensen Tusagassiortoq / tusagassiortoq
Saqqummersinneqarpoq

Folketingimi ilaasortat USA-p, Kalaallit Nunaata Danmarkillu akornanni Kalaallit Nunaata illersorneqarnissaa pillugu isumaqatigiissummik allannguutissaqarlunilu ilassutissiisoq pillugu isumaqatigiissut sisamanngornermi novembarip 12-ianni nal. 10.00 siullermeerlugu oqaluuserissavaat. Tamanna Folketingip sapaatip akunnerani ataatsimiiffiusumi pilersaarutaani takuneqarsinnaavoq. Nunanut allanut ministeri Lars Løkke Rasmussen isumaqatigiissummik Folketingimi saqqummiussissaaq.

Isumaqatigiissut aqqutigalugu Amerikamiut Narsarsuarmi Mestersvigimilu sakkutooqarfittaarnissaat ilaatigut ammaanneqarlunilu Kunngeqarfiup kisimi oqartussaanera kalaallillu namminneq aalajangiisinnaatitaanerat akuerineqarput.

Inatsisartut ataatsimiinneranni oqaluuserineqartoq

Illersornissamut isumaqatigiissut Inatsisartuni oktobarip aqqaneq-aappaanni siullermeerneqarlunilu tamatuma kingorna Nunanut allanut Sillimaniarnermullu Ataatsimiititaliamut ingerlateqqinneqarpoq.

Siullermeernerani isumaqatigiissut sillimaniarnermut politikkimik ilungersunartumik atugaqarnermi diplomatit pingaarutilimmik iliuuseqarsimanerisa kingunerigaat nunanut allanut naalakkersuisoq Múte B. Egede (IA) ilaatigut oqarpoq.

Isumaqatigiissut Kalaallit Nunaannut aalajangersimasumik aningaasatigut akiliuteqartarnissamik qulakkeerinninngikkaluarluni USA-mut annertuumik pisinnaatitaaffiliissasoq isumaqartoqarmat Naleqqamit isornartorsiorneqaraluartoq, Inatsisartuni akuerineqarniarpasippoq, tassami IA-mit, Siumumit, Demokraatinit Atassummillu tapersersorneqarluni nalunaarutigineqarpoq.

Isumaqatigiissut Inatsisartuni novembarip pingajuanni aappassaaneerneqassaaq. Isumannaallisaanermut illersornissamullu isumaqatigiissutip pingajussaaneerneqarnerani aatsaat taasisitsisoqassaaq.

danmarki illersornissamut isumaqatigiissut folketingi usa inuiaqatigiit kalaallit nunaat

Atorfiit tamaasa takukkit

PODCASTI

Powered by Labrador CMS