Amerikamiut akitsuutaasa sapaatip-akunnerani matumani atuutilernissaa naatsorsuutigineqartoq

USA-p nunanit tamalaanit nioqqutigineqartunut 15 procentimik akitsuusiinissaata sapaatip akunnerani matumani atuutilernissaa naatsorsuutigineqarpoq.

USA-mi aningaasaqarnermut ministeri Scott Bessent nutaarsiassaqartitsivik Reuters naapertorlugu taama oqarpoq.

Tamanna Trumpip siorna akitsuutinik qaffaanera unioqqutitsinerusoq USA-mi eqqartuussiviit qullersaannit aalajangerneqarmat pivoq.

Trump tamanna pissutigalugu nunarsuaq tamakkerlugu 10 procentimik akitsuusiiniarluni nalunaaruteqarpoq, akitsuulli 15 procentimut qaffanniarlugu kingusinnerusukkut oqaatigaa.

Nunarsuaq tamakkerlugu akitsuutit 10 procentiusut nalunaarutigineqartut siullersaat februaarip naanerani atuutilerpoq.

USA-p tunngaviusumik inatsisaa naapertorlugu præsidenti pinnani Kongressi akitsuusiisinnaallunilu nunanut allanut niuernermik malittarisassaliorsinnaavoq.

Akitsuutit maannamuugallartoq ullut 150-it atuutissapput.