Amerikamiut angalaqatigiit Danmarkimut tikeraarnerminni Kalaallit Nunaat pillugu paasisaqartut

ATUARUK AAMMA

Ekspertip amerikamiut aallartitaat pillugit: Trumpimut sunniuteqarsinnaanngillat

Amerikamiut politikerit aqqanillit Danmarkimut tikeraarnerat naammasseqqajarpoq. Ullaarnanit Københavnimi tusagassiortunik katersortisipput, tassanilu tikeraarnermi suut ilikkarsimanerlugit oqaluuseraat.

Delawarimi senatori demokraatineersoq Chris Coons, tikeraarnermik aaqqissuisoq Danmarkimut tikinnissani sioqqullugu Kalaallit Nunaat pillugu ilisimanngisaminik annertuumik ilikkagaqarluni oqarpoq.

- Innuttaasut avatangiisini immikkuullarissumik ajornakusoortuni inuusinnaanermik pilersitsisinnaasimapput, taanna oqarpoq.

Taannalu Lisa Murkowskimit, Alaskami republikanerit sinnerlugit senatorimit taperserneqarpoq.

- Taamaallaat kalaallit oqaluttuarisaanerminnik inuusaatsiminnillu avitseqatigiissuteqarsinnaapput, qanorlu avatangiisini unammillernartuni inuusinnaanermik oqaluttuarlutik, taanna oqarpoq Danmarkimilu angalaarnermini oqaluttuarineqartut innersuussutigalugit.

Tikeraarneq piffissami USA-p Kunngeqarfik Danmarkillu attaveqatigiinnerisa ilungersunarnerata nalaani pivoq. Amerikamiut aallartitaasa tikeraarsimasinnarlutik angerlarunik Kalaallit Nunaannik tapersersuinissamik Senatimi Kongressimilu suleqatiminnik oqaloqateqartarnermik nangitsisinnaajumaarlutik neriuutigalugu oqaatigaat.

Inuit puigussanngilagut

Kalaallit Nunaata kalaallillu suliamut qanoq ilillutik ikiuisinnaanerat, politikerillu qanoq kalaallinut oqaasissaqarnersut, Sermitsiap apeqqutigaa.

Lisa Maurkowskip Alaskap kalaallillu innuttaasa akornanni suleqatigiilluarneq pioreersoq akissutigaa, inuimmi imminnut paasisinnaalluarput.

Washingtonimi qanorluunniit pisoqaraluarpat, oqaloqatigiittarnerit suleqatigiittarnerillu ammatinneqarnissaat kaammattuutigaa.

Taamattaarlu kalaallit nipaasa tusarneqarnissaat pingaartoq isumaqarpoq. Piginnittuunermik oqaatsip nunap inoqqaavinut qanoq isumaqarnersoq, Inatsisartunut ilaasortanik oqaloqateqarnermini annertuumik maluginiarpaa.

- Oqaluttuat tamakku ingerlatseqqissigit, USA-miinnaanngitsoq, nunarsuarmulli tamarmut. Nunarsuup maanna Kalaallit Nunaat kalaallillu ukkataraa. Inuit puigussanngilagut, Lisa Murkowski oqarpoq.

Oqaatigisat pitsaanngitsut

Præsident Donald Trumpip naalagaaffiup isumannaatsuunissaanut Kalaallit Nunaat pisariaqartillugu, kiniserillu russillu sorsuutaat Kalaallit Nunaata avataani imartamiittut oqaatigaa.

Senator Coonsilli tamanna upperinngilaa.

- Maannakkorpiaq isumannaallisaanikkut Kalaallit Nunaat ulorianartorsiortinneqanngilaq, qanorli pitsaanerusumik aningaasaliisinnaanitta misissornissaa pissutissaqarluarpoq, Chris Coons oqarpoq.

- Washingtonimut uterutta taakani qanoq suliamik nangitsisinnaanermik pilereqqilerluta utissaagut.

Tigusinissamik oqaatigineqartut pitsaanngitsuusut isumaqarpoq.

- Tutsuiginassutsitsinnik aarlerinartorsiortitsisunik oqaaseqarneq USA-mut ajorluinnartuuvoq. Isumannaatsuunerput amerlanertigut tutsuiginassutsitsinnik toqqammaveqartarpoq, Chris Coons Trumpip Kalaallit Nunaannik piginnilernissamut ”taarnikkut pisariaqartitsineq pillugu oqaaseqarneranut aperineqarami akivoq.

Amerikamiut Danmarkimut tikeraarnerat sapaatip akunnerani matumani suliami ineriartornernut arlalinnut ilaaginnarpoq. Pingasunngormat nunanut allanut naalakkersuisoq Vivian Motzfeldt (S), nunanullu allanut ministeri Lars Løkke Rasmussen (Moderaterne) Amerikamiut nunanut allanut ministeriannik Marco Rubiomik præsidentillu tullianik J.D. Vancemik ataatsimeeqateqarput.

Tamakkulu saniatigut ippassaq naalakkersuisut Folketingimi partiit siulittaasunik atlantikullu avannaani ilaasortanik pissutsit pillugit ilisimatitsisoqarpoq.