Amerikamiut politikerii Kalaallit Nunaannut tunngatillugu iliuuseqartut
USA-mi senatorit arfineq-pingasut, taakkunannga marluk republikaneriusut kiisalu USA-p kongressianut ilaasortat pingasut, Folketingimi Kalaallit Nunaat pillugu ataatsimiititaliaq aamma Inatsisartut nunanut allanut sillimaniarnermullu ataatsimiititaliami ilaasortanik ataatsimeeqateqarnissaat sapaatip-akunnerata naanerani naatsorsuutigineqarpoq. Ataatsimiinneq Alaskami senatorimit Lisa Murkowskimit "Kalaallit Nunaannut ikinngutaalluartumit" siulersorneqassaaq.
Alaskami senatori Lisa Murkowski (talerpiata tungaani ittoq) Danmarkimut aallartitat siulersussavai, tassanilu ilaatigut Kalaallit Nunaat pillugu ataatsimiititaliamut ilaasortat, Nunanut allanut tunngasunut ataatsimiititaliamut ilaasortat kiisalu Inatsisartut nunanut allanut isumannaallisaanermullu ataatsimiititaliaannut ilaasortat ataatsimeeqatigissavaat.
Assi: IA
USA-mi senatorit kongressimilu ilaasortat Danmarkimut sapaatip-akunnerata naanerani tikeraartussat maannakkut inaarutaasumik allattorsimaffiat naammassisimalerpoq.
Inuit Ataqatigiit sinnerlugit Folketingimut ilaasortap Aaja Chemnitzip tikeraartoqarnissamik pilersaarusiortup uppernarsarpaa.
Aallartitat assigiinngitsunik isumallit
Aallartitat Alaskami senatorimit Republikanerimit Lisa Murkowskimit siulersorneqassapput.
Lisa Murkowskip saniatigut aallartitanut peqataasut tassaapput senatorit Chris Coon (Demokraatit), Thom Tillis (Republikanerit), Dick Durbin (Demokraatit), Jeanne Shaheen (Demokraatit) kiisalu kongressimi ilaasortat Gregory Meeks, Madeline Dean aamma Sara Jacobs.
Inatsisartut ataatsimiisitaliaanit peqataasoqassasoq
Pilersaarut malillugu aallartitat Kalaallit Nunaat pillugu ataatsimiititaliap tallimanngornermi arfininngornermiluunniit ataatsimiinneranut peqataassapput, tassani nunanut allanut tunngasunut ataatsimiititaliamut ilaasortat kiisalu Inatsisartut Nunanut Allanut Sillimaniarnermullu Ataatsimiititaliaannut ilaasortat aamma qaaqquneqarput.
– Aallartitat Nuummut tikinissaat kissaatigaara, Inatsisartulli Nunanut Allanut Sillimaniarnermullu Ataatsimiititaliaani ilaasortat Danmarkimut tikeraarnissaat ataatsimiinnermilu najuullutik peqataanissaat sulissutigaarput, Aaja Chemnitz oqarpoq.
Kalaallit Nunaannut ikinngutaalluartoq
Senatori Lisa Murkowski Nuummut qanittumi tikeraarpoq, tassanilu aamma inuussutissarsiornermik ingerlatsisut politikerillu naapippai.
– Kalaallit Nunaannut ikinngutaalluarpoq, aamma uannut ikinngutaalluni. Taamaattumik taassuma aallartitanik siulersuinissaa neriuuteqarfigaara. Issittumi pissutsinik ilisimasalimmik ataatsimeeqateqarnissarput pingaaruteqarluinnarpoq, Aaja Chemnitz oqarpoq, taannalu ataatsimiinnissamik pilersaarusiornermik suliaqaleruttorpoq.
Ulrik Pram Gadip, DIIS-imi ilisimatusartup, tikeraarnerup pilersaarusiorneqarnerani Aaja Chemnitzip inissisimaffia erseqqissarpaa. – Taassuma sivisuumik Lisa Murkowski attaveqarfigisimanngitsuuppagu tikeraarneq piviusunngornavianngikkaluarpoq.
Assi: DIIS
Kalaallit Nunaata nammineq aalajangiisinnaanera tapersersorneqartoq
Republikanerit sinnerlugit senatori Thom Tillis ataatsimiinneq Kalaallit Nunaata nammineq aalajangiisinnaaneranik tapersersuinermik takutitsinerusoq oqarpoq.
"Aallartitat qanoq katitigaanerannut - pingaartumik republikaneriusunit peqataaffigineqarnerat - sanilliullugu maluginiarnarnerpaaq tassaasinnaavoq inatsisartut nunani tamalaani sulinerminni pinertusaarsimanerat: Aaja Chemnitzip Lisa Murkowski sivisuumik attaveqarfigisimanngikkaluarpagu tamanna piviusunngornavianngikkaluarpoq." DIIS-imi ilisimatusartoq Ulrik Pram Gad Sermitsiamut oqarpoq
