Amerikamiut tikeraarnerat pillugu tusagassiortunik katersortitsineq

Amerikamiut politikerit aqqanillit, tassa Demokratit kongressimi ilaasortat qulingiluat aamma republikanerit Senatimi ilaasortat marluk Københavnimi ullumi ataatsimeeqateqarput.

Aallartitat Folketingimi aamma Inatsisartuni ilaasortanik ataatsimeeqateqaqqammerput.

Tusagassiortunik katersortitsinermi Chris Coons, demokraatit sinnerlugit senatoriusoq, oqarpoq Kalaallit Nunaata siunissaa kalaallit pigigaat.

- Kalaallit siunissartik pillugu namminneq aalajangiisinnaanerat pingaaruteqartoq erseqqilluinnartumik oqaloqatigiissutigaarput, oqarpoq.

Oqaloqatigiinneq pingaaruteqarpoq

Pipaluk Lynge (IA) Inatsisartut sinnerlugit aamma ataatsimiinnermi peqataavoq. 

- Inatsisartunit ataatsimiinnermi peqataanissarput uagutsinnut pingaaruteqarluinnarsimavoq, suut kissaatiginerigut paasitissallugit oqaloqatigiinnerullu aallartissallugu uagutsinnut aamma pingaaruteqarmat. Taamaammat uagutsinnut pingaaruteqarpoq, neriuutigaarpullu tamanna nangeqqinneqassasoq, oqarpoq.

Lisa Murkowski, republikanerit sinnerlugit senatoriusoq oqarpoq oqaloqatigiinneq ullumi ingerlanneqartoq pitsaasumik ingerlasimasoq, aammali nunanut allanut tunngasunut naalakkersuisoq Vivian Motzfeldt (S) aamma nunanut allanut tunngasunut ministeri Lars Løkke Rasmussen (M) Washington DC-mi ippassaq ataatsimeeqatigineri ingerlalluarsimasut.

Aaja Chemnitzip (IA) tusagassiortunik katersortitsinermi oqariartuutit naammassillugit oqarpoq kalaallit inuiaat kikkuuneri amerikamiunut oqaluttuarissallugit pingaartissimallugu. 

- Inuiaqatigiit qanoq ittuuneri sunillu suliaqarnigut pillugit oqaluttuuppakka, oqarpoq.

Trump qanoq unitsinneqassava?

Sermitsiamit aperineqarpoq Trumpip Kalaallit Nunaannik tigusiniarsarinera qanoq unitsinniarsarineqarsinnaanersoq.

Lisa Murkowskilli tamanna oqaloqatigiissutigerusuppallaanngilaa. Oqarporli amerikami politikkikkut aaqqissuussaanermi aalajangiisinnaasut arlallit aqqusaaqqaarneqartussaassasut.

- Maani tikeraarnitsinni anguniagarput allamut saasarneqaqattaarpoq. Maani tikeraarnitsinnut siunertaavoq Kalaallit Nunaannit inuiaqatigiit oqaloqatigissallugit, Murkowski oqarpoq.

Pipaluk Lynge KNR-imit aperineqarami oqarpoq Kalaallit Nunaannit oqariartuutigineqartut tusartinnissai pingaartilluinnarlugu.

- Kalaallit sorusunnersugut paasineqartariaqarpoq. Taamaattumik aamma kissaatigut nunaqqatiminnut anngutissagaat oqarfigaagut.

- Tassami misigivugut tusaaneqarluta, oqaloqatigiinneq ingerlalluarpoq, aamma misigivugut paasineqarluarluta, oqarpoq.