Sermitsiap Washington D.C-mut aallartitaa apuukkami Amerikamiut arlallit præsidentip Kalaallit Nunaat pillugu tupaallannartumik oqaaseqarneranut qanoq isumaqarnersut paaserusullugu oqaloqatigai.
Apersorneqarsimasut tamarmik præsidentimik Kalaallit Nunaannut tunngatillugu iliuuserisimasaanut qularuteqarput.
Sermitsiap Washington D.C-mut aallartitaa apuukkami Amerikamiut arlallit præsidentip Kalaallit Nunaat pillugu tupaallannartumik oqaaseqarneranut qanoq isumaqarnersut paaserusullugu oqaloqatigai.
Apersorneqarsimasut tamarmik præsidentimik Kalaallit Nunaannut tunngatillugu iliuuserisimasaanut qularuteqarput.
- Silanngajaartup oqaasii
Apeqqut: Trumpip Kalaallit Nunaat tiguarusullu arlaleriarluni oqarpoq, illit qanoq isumaqarfigaajuk?
- Ingasattajaarnerusoraara. Sooq taamaaliornersoq paaserusuppara, Elisabeth Morris 31-nik ukiulik oqarpoq.
Eugene Nandwa silanngajaartup oqaasiitut nipaqarnerarlugit nangilluni oqarpoq:
- Taamaaliorneq iluaqutaasinnaarpasinngilaq, taamaammat naak ’siunertaqarluni iliuusaagaluartut’, unneqqarilluni oqaatigissagaanni silanngajaartup oqaasiitut ipput, Eugene Nandwa oqarpoq.
Eugene Nandwa, naatsorsueqqissaartartoq, aamma Elisabeth Morris, naatsorsuuserisoq
Oscar Scott Carl
Apeqqut: isumannaallisaanissaq pineqartoq oqarpoq — tamanna qanoq isumaqarfigaasiuk?
- Kalaallit Nunaat uagutsinnut qanoq ulorianartorsiortitsisinnaanersoq paasinngilara, taamaammat naluara. Paasiuminaappoq, Elisabeth Morris oqarpoq.
Apeqqut: Trumpip Kalaallit Nunaannik tiguaaniarnera tusagassiuutitigut sammineqarpa?
- Aap, sammineqarluarpoq, inuilli paasiuminaatsippasippaat. Amerlanerit sianiilliornerusoriinnarunarpaat.
- USA-mi ajornartorsiuterpassuaqarmat sooq taama piffissarujussuaq nukippassuillu tamatumunnga atornerigut naluara, Elisabeth Morris oqarpoq.
Bobby Vanderhoof: - Allanut saasaarineruvoq
Apeqqut: Trumpip Kalaallit Nunaannik tiguaaniarnera qanoq isumaqarfigaajuk?
- Tamanna ilumut kissaatigigaa isumaqanngilanga. Allanili angorusutaminiit inuit allamut saasarniartarai isumaqarpunga, Bobby Vanderhoof 64-inik ukiulik oqarpoq.
Apeqqut: Suna allamut saasaarutigisoraajuk?
- Nunarsuarmi paasineqarunik aseruisussanik iliuuserisarpassuaqarpoq. Taamaammat nunarsuaq allamut saasartikkaanni taava allamik iliuuseqarniarnissaa ajornannginnerulissaaq. Iliuuserisai eqqortuunersut eqqunngitsuunersulluunniit apeqqutaanngilaq. Inuit allamut saasarnissaat pingaaruteqarnerpaavoq. Tamanna iluatsippaa.
Bobby Vanderhoof, 64-inik ukiulik, teknikkimut tunngasunut siunnersorti
Assi: Oscar Scott Carl
- Nunassinnut oqarnissarput pingaaruteqarpoq. Tamanna piviusuunngilaq, allamut saasaataannaavoq, Bobby Vanderhoof oqarpoq.
Apeqqut: Kalaallit Nunaata tiguarneqarusunnera illit nammineerlutit qanoq isumaqarfigaajuk?
- Tamanna akuliuffigissanngikkipput isumaqarounga. Europami nunat namminneq naalakkersuissapput.
- Maanna nunarsuarmi pisut tassaapput allanngorarneq allamullu saasaateqarniarluni nalunaaruterpassuit siammarterneqartarnerat. Eqqumagitsi, uippallernasili inuunersi ingerlatiinnarsiuk, Bobby Vanderhoof oqarpoq.
George Tabora: - Tamanna uannut peqqusiileqinarpoq
George Tabora, 64-inik ukiulik, USA-mi illersornissamut ministereqarfimmi siornatigut atorfeqarsimasoq, maannali soraarnerusoq, issiavimmi allami naapipparput.
Trumpip kissaatai silanngajaarnerarpai:
- Natomut ilaasortaasumut taama oqalunneq silanngajaarnerusoraara. Ukiuni arlalinni uagutsinnut ikiuisartumut maannalu akeqqatut pineqartumut, oqarpoq nangillunilu:
– Sakkutuujunanga sakkutuut sullinnikuuakka, ataatagalu ukiuni 30-ni imarsiortutut sakkutuujusimavoq, naalagaaffiillu allat sorsunnitsinni ikiuuttartut ataqqingaartuaannarnikuuagut. Danmark tapersersortigiuaannarnikuuarput.
George Tabora, 64, soraarninngortoq (siusinnerusukkut illersornissamut immikkoortortaqarfik)
Oscar Scott Carl
Apeqqut: Sooq kissaat tamanna silanngajaarnerua?
- Nunarsi tiguassagipput Trumpi kunngitut oqaannapajummat. Tassa arlaata oqaaseqarfigisariaqaraluarpaa. Nunami, ingammik USA-mi, taamaaliortoqarsinnaanngilaq.
- Isumaqartuaannarnikuuvunga tamat oqartussaaqataanerat kiffaanngissuseqarnerlu illersoratsigit nunatut allanit pingaartinneqartugut, taamaammat tamanna peqqusiileqinaraara.
Apeqqut: Nunat pineqartut Washingtonimi ataatsimiinnissaat tusarnikuuiuk?
- Aap, pissutsillu eqqissisimanarnerulerniassammata maanna ataatsimiittoqartalermat nuannaarutigaara.
Ataatsimiinnerup kingorna pissutsit eqqissiallassinnaasut isumaqarpit?
- Aap, taama isumaqarpunga. Pingaarutilinnik allanik, soorlu Marco Rubiomik Vancemillu, peqataatitsinissaq pingaaruteqartoq isumaqarpunga. Taakkumi Trump akuliutsinngikkaluarlugu pissaaneqarnerpaapput.
- Neriuppunga aaqqiissutissarsiumaartugut. Nunat allat ataqqisariaqarpagut. Tiguaannarsinnaanngilagut, George Tabora oqarpoq.
