Ammallorissumut siulittuisarfimmut qiviarneq

Nuka K. Godtfredsen, Narsami 1970-imi inunngortoq, Københavnimi katersugaasivissuarmut Nationalmuseumimut ukiorpaalunni attuumassuteqarsimavoq, tassanilu Nunatsinni itsarnisarsiornermi nassaat avatangiiseralugit qanga pisimasut pillugit titartakkat nangeqattaartut sisamat nersualaarneqarluartut saqqummersippai: »Tutineq Siulleq«, »Ukaliatsiaq«, »Tunissut« aamma »Qileroq«, 2009-mit 2018-imut saqqummersinneqartut. Nuka K. Godtfredsenip siunissaq maanna qiviarpaa. Titartakkani nangeqattaartuni »Nordpol 2121«-mi, Hans Egedep Nunatsinnut tikeqqaarneranit ukiut 400-t qaangiunneranni pisimasuutitaasumi, Nunarput inuiaqatigiittut sakkutooqarfiusutut suliffissuaqarfiusutullu illersornissamut atortutigut »Nordpol«-imik taaguutilimmit illersugaasutut takutippaa.

Paw Krogsbæk Mathiasen Københavnimi titartakkanik nangeqattaartunik naqiterisitsisarfimmi Fahrenheit-imi aaqqissuisuuvoq. – »Nordpol 2121« sapaatip akunnerani matumani naqiterneqalissaaq, taamalu oktobarip aallaqqaataanni saqqummersinnaassalluni. Kalaallit Nunaanni atuagaarniarfeqarunnaarsimasoq ilisimavarput. Najukkani atuakkanik tuniniaasartut maannakkut ujartorpavut; aammali internetikkut atuakkanik nioqquteqarfinni pissarsiarineqarsinnaassalluni, Paw Krogsbæk Mathiasen Sermitsiamut oqarpoq.  
 

Inuttat pingaarnerit pingasut

Titartakkani nangeqattaartuni inuttat pingaarnerit pingasut tassaasut kommandør Rico, kaptajnløjtnant Laasi aamma løjtnant Iisaaq, qamussuaq sorsuut »Nanoq« ilaaffigalugu Sermersuarmi misissuillutik angalaarput. Siullermik Sikublok tikippaat, tassani nunarsuarmut mingutsinneqaleraluttuinnartumut sermeq imerlu tunisassiarineqarput, suliffissuarlumi taanna aamma taaneqartarluni „nunarsuup imermut tankia“-nik. Taavali pisut sukkatsikkaluttuinnalerput.  

 
 Taava ammallorissumut siulittuisarfimmut qimerluuivoq. Qaqortumi mittarfik upernaaq atorneqalermat, Qaqortup Narsallu akornanni ikaartaammik aqquteqalernissaa kissaatigineqarpoq, Nuka K. Godtfredsenilli angallannermi ajornartorsiut aaqqiivigaa: Kaptajnløjtnant Laasi suliartoraangami Narsap Qaqortullu akornanni aqqusinersuaq ikaartarfik sisamanik ingerlaarfilik biilerfigisarpaa. Tamanna qanoq ajornakusoortigisinnaava?
 
Illersornissamut aaqqissuussineq Nordpol Narsarsuarmi qullersaqarfeqarpoq. Nunaqarfik siunissami ataannarsinnaanerminik aarlerinartorsiortoq ukiut 100-t qaangiuppata suli piussaaq. Nunaqarfik 1941-mi sakkutooqarfittut aallartinnerminut utersimavoq – maannalu nammineq naatitsiveqarluni! Titartakkat nangeqattaartut naqiterisitsisarfimmit Fahrenheitimit aallaqqaammut Qallunaatut saqqummersinneqassapput. – Nunatsinni atuakkanik naqiterisitsisarfiit mikisut ilaat suliassamik soqutiginnissasoq neriuppunga. Taamaalilluni »Nordpol 2121« aamma Kalaallisut saqqummersinneqarsinnaaniassammat, Nuka K. Godtfredsen Sermitsiamut oqarpoq. Taamaalilluta aamma eqqaasinnaavarput Sermitsiap tunuani Nuka K. Godtfredsenip titartaasartutut nuannarineqarluartoq Andala nangeqattaartumik siullerpaamik saqqummersimmagu.