Ane Lone Bagger Dubaimiit aallarnaveeqqavoq: Annilaangavugut

Israelip USA-llu Iranimut qaartartumeerinerisa kingorna Dubaimi takornariarpassuit tusindillit aallarnaveeqqapput.

Taakkua ilagaat Ane Lone Bagger, taanna inersimasut allat sisamat ernuttanilu pingasunik ukiulik ilagalugit timmisartuutileqatigiiffimmiit Emiratesimiit nunamiit isumannaatsumik angallanneqarnissartik utaqqillugu akunnittarfimmiipput.

- Akerleriinnerup qeqqaniilluni rakettit silaannarmi qaarpaluttarneri tusaallugit soorunami toqqissisimananngeqaaq, Ane Lone Bagger oqaproq, taassuma 60-iliinini ilaquttani ilagalugit eqqissisimasumik avatangiiseqarluni nalliuttorsiornissani qilanaarinikuugaluarpaa.

Dubaip Iranimiit saassunneqarnissaa sioqqullugu februaarip 22-ani tikipput, marsillu aallaqqaataani uternissaat pilersaarutaagaluarluni. Sorsunnerli aallartimmat angerlamut timmisartussarsinissaq ajornarsivoq, maannalu ullut sisamassaat qaqugu isumannaatsumik angerlarsinnaalissanerlutik tusarsiillutik utaqqipput.

Annilaarnarnerpaaq

Ulloq taanna aallarfissaanni unnuami pisoq annilaarnarnerpaavoq.

- Innareerluta mobilitsinni kalerrisaarut aallartippoq. Sumiiffinnut isumannaatsunut qimarguiffissarsioqqusaavugut. Igalaanit matunillu ungasissumut. Iranip nunat eqqaaniittut saassuttaarlugit aallartippoq, Dubailu saassunneqartussat ilagalugu, Ane Lone Bagger Sermitsiamut oqaluttuarpoq.

- Unnuaq taanna pissutsit ajornerulersinnaanersut ilisimanngilarput. Taamaattumik tamatta annilaangasorujussuuvugut. Akunnittarfik qaartinneqartoq uagutsinniit kilometerinik tallimanik qanitsigaaq, Ane Lone Bagger oqarpoq.

- Innarnissarput sioqqullugu pisariaqartitavut piareersareerpaugt, soorlu passit, batterilersuutit, powerbanksit, aqaguanimi angerlarnissarput pilersaarutaagaluarami. Atortut isumannaatsumut qimaaffitsinnut nassarpavut. Akunnerit marluk qaangiummata timmisartut saassussisaarnerat annikillivoq ineeqqatsinnullu uteqqissinnaalerluta, Ane Lone Bagger unnuaq taanna sinippiarsimanngitsoq oqaluttuarpoq.

Silaannakkut illersuilluartoqartoq

Ullut ingerlanerini toqqissisimannginneq annikilliartorpoq.

- Illersornissaqarfiup sakkutuui sunniuteqarluartut paasiartuaarparput, dronimmi rakettillu illoqarfimmut aallartinneqartut amerlanersaat ajoqusiinnginneranni aallaarsarineqartarpoq, naalakkersuisuusimasoq Siumullu sinnerlugu Folketingimut qinigassanngortinniarluni sapaatip-akunnialuit matuma siorna nalunaartoq oqaluttuarpoq.

Aamma nunami najugallit eqqissisimanerat taakkunanngaanniillu "illersorneqarnitta isumannaarneqarnerat" iluaqutaaqaaq.

Ilaqutariit timmisartortitseqatigiiffik Emirates ataavartumik attaveqarfigisaarpaat, taakkualu timmisartumut allamut inniminniinissamut ikiuunniarlutik sapinngisartik tamaat iliuuseqarput. Aamma nunanut allanut ministereqarfik aqqutigalugu paasissutissanik malinnaallutik.

Timmisartut angallannerat annikitsumik aallartikkiartuaaqqilerpoq, inuppassuilli tusindillit nunamit sukkanerpaamik aallarlutik isumannaatsumukarusupput. Nunarsuarmi timmisartoqarfiit annersaat angalasunit angerlarusuttunit ulikkaavippoq.

Nutaarsiassat eqqunngitsut

Ane Lone Baggerip pissutsit qanoq innerannut piffissarujussuaq atorlugu malinnallutik, aamma tusakkat atuakkallu mianersuuttariaqarnerat oqaatigaa.

- Nutaarsiassanik eqqunngitsunik maani ulikkaarpoq, oqarpoq.

Ilaqutariit angerlarnissaat arlaleriarluni kinguartinneqarpoq. Maanna nalunaarutigineqartoq kingulleq eqquukkumaartoq naatsorsuutigaat, tassa marsip tallimaanni angerlarsinnaanerat nalunaarutigineqarnikuuvoq. Kangianili akullermi pissutsit ilungersunartut eqqarsaatigalugit allanngortoqarsinnaalluni.

Ilassut: Allaaserisap saqqummerneranit akunnialuit qaangiutiinnartut Ane Lone Bagger ilaqutaalu ilisimatinneqarput siusinnerpaamik 7. marts aallarsinnaasut.