Angut 14-inik ukiulimmik pinngitsaaliisimasutut pineqaatissinneqartoq
Angut 49-nik ukiulik assigiinngitsunik pinerluuteqarnermigut, ilaatigut pinngitsaaliisimasutut, pisuusutut eqqartuunneqarluni ukiuni sisamani pineqaatissinneqarsimasunut inissiisarfimmiittussanngortinneqarpoq. Pineqaatissinneqartoq suliareqqitassanngortitsissanerluni eqqarsaartigaa.
Arkivfoto: Tôrtia Reimer-Johansen
Politiit paasissutissiinerat ilanngullugu allaaserisaq nutarterneqarpoq
Pinngitsaaliisimasumut isumapiloqarlunilu tatiginnilersitsiniaarnermut tunngasumi eqqartuussut Qeqqata Eqqartuussisoqarfiani aalajangerneqaqqammerpoq.
Kalaallit Nunaanni unnerluussisussaatitaasoq ataasinngornermi paasissutissiivoq.
Angut 49-nik ukiulik niviarsiaqqamik 14-inik ukiulimmik pinngitsaaliisimasutut, isumapiloqarluni tatiginnilersitsiniaasimasutut, meeqqamik akiliilluni kujannissimasutut meeqqanullu tunngasunik pornonik peqarsimasutut pisuutinneqarpoq.
Angut pineqaatissinneqarsimasunut ukiuni sisamani inissiisarfimmiittussanngortinneqarpoq.
Apriilimi tigummigallarneqalertoq
Pineqaatissinneqartoq apriilip 16-iani 2025-mi tigummigallarneqalersoq, tallimanngornermilu eqqartuussut naammassimmat tigummigallarneqaannartoq, Kalaallit Nunaanni Politiit tusagassiuutitigut nalunaarummi ilisimatitsipput.
Angut 49-nik ukiulik eqqartuussut suliareqqitassanngortissanerlugu eqqarsaatigaa.
Angutip 49-nik ukiullip niviarsiaraq 14-inik ukiulik piffissami sivisuumi isumapiloqarluni tatiginnilersinniariarlugu arlaleriarluni pinngitsaalisimagaa eqqartuussivimmi nalilerneqartoq, politiit ilisimatitsissutigaat.
Angut Sisimiuneersuusoq pinngitsaaliinerillu juulimi 2024-miit apriilimi 2025-mut pisimasut, politiit ilanngullugu ilisimatitsissutigaat.
Unnerluussisussaatitaasup Kristian Buskov Nierhoffip angut suut pissutigalugit pineqaatissinneqarnersoq itisilerpaa:
- Isumapiloqarluni tatiginnilersitsiniaaneq tassaavoq inersimasup ukiuni misilittakkanilu patsisigalugit meeqqamut attaveqarniartarnera, taamaaleriarluni kinguuaassiuutitigut atornerlullugu. Angut 49-nik ukiulik ilaatigut taamaaliorsimasutut eqqartuunneqarpoq, unnerluussisussaatitaasoq oqarpoq.
