Angut 30-nik ukiulik Blok M-imi toqutsisimasutut pisuutinneqarpoq

Angut 30-nik ukiulik unataallunilu qimitsilluni toqutsisimasutut Nuummi Eqqartuussisoqarfik Sermersuumi marlunngornermi ualikkut pisuutinneqarpoq. Toqutaasoq aapparaa arnaq 44-nik ukiulik.

Eqqartuussisut angut ulorianaateqartutut nalilerlugu sakkortunerpaamik pineqaatissiissutaasinnaamik aalajangiiffigalugu, killiligaanngitsumik paarisassanngortippaat.

- Toqutsisutut pisuutippatsigit. Toqusup timaanik misissuinermit uppernarsaatit tunngavigaavut. Toqutaasup qiminneqarnini toqqutigisimagaa takussutissaqarpoq, eqqartuussisoq eqqartuussutip marlunngornermi ualikkut kingusissukkut atuarnera oqarpoq.

Angutip 30-nik ukiullip arnarlu aaqqiagiinngissuteqarnermik kingorna toqusimasoq eqqartuussivimmi nassuerutigaa. Nuummi najugaanni blok M-imi 2025-mi augustip arfernata arfineq-aappaatalu akornanni pivoq.

Angulli toqutsisimasutut nassueruteqanngilaq. Arnap savilerluni saassuneranut imminut illersorsimalluni oqarpoq, tassa toqunnissaa siunertarisimanagu. Uummarsarsimagaluarlugu marlunngornermi aamma nassuerpoq.

- Nassuiaatini allanngortippaa, unnerluussisussaatitaasoq Kristian Buskov angutip 30-nik ukiullip suliap ingerlanerani qanoq pisoqarsimaneranik assigiinngitsunik nassuiaateqarnera pillugu oqarpoq.

Eqqartuusseqataasut unnerluutigineqartup nassuiaatai nutaat aamma upperinngilaat. Arnap unatareernerata qimereerneratalu kingorna uummarsarsimanngikkaa eqqartuussisoq isumaqarpoq.

Immikkut ilisimasallit piffissaligaanngitsumik paarineqarnissaanut tikkuussisut

Ilisimannittut sisamat suliamut assigiinngitsutigut attuumassutillit marlunngornermi nassuaataat aamma tusarpagut. Arnap toqutaasup pania taakku ilagaat, taassumalu pinerlineqartup pinerluttullu aappariinneranni nakuusertoqartarnera uppernarsarpaa.

- Anaanaga unatarneqakulasarpoq, oqarpoq.

Arnap sinittarfimmi toqutaanerani allanik takunnittoqanngilaq. Arnap toqutaasup anaanaa qaninnerpaamiippoq, taanna iggavimmiilluni.

Piffissaligaanngitsumik paarisassanngortinneqarnera tarnip pissusaanik ilisimasallit naliliinerat tunngavigalugu ilaatigut pivoq.

Inuit allat eqqarsaataat misigissusaallu soqutiginngikkat, allallu qanoq innerannut misiginneqataasinnanangitsoq ilaatigut allassimavoq. Aammattaaq imigassamik cannabisimillu atornerluisuunerata pissutigalugu angut ulorianarsinnaanera ilimanaateqarnerusoq immikkut ilisimasallit nalilerpaat.

Pissusaa allaanerusoq

Eqqartuussaasoq "inuttut pissusilersornerminit allaanerulluinnartuusoq" nalilerneqarpoq. Niaqulaartuunngilaq poqersuullunilu.

Unnerluussisup aamma siusinnerusukkut pisimasoq eqqaavaa, tassa angutip maanna eqqartuunneqartup aapparisimasaminik qimissisimallunlu savimmik kapisinikuunera. Toqqutiginngisaanik.

Illersuisup Finn Meinelip sullitani imminut illersorsinnaajumalluni taamaaliorsimasoq tunngavilersuutigaa. Aamma eqqartuussivimmit pisuutinneqassappat piffissaligaanngitsumi paarisassanngortinneqarnissa ingasappallaartoq isumaqarluni.

Eqqartuussivimmili aalajangiinermut sunniuteqanngilaq. Angutilli 30-nik ukiullip eqqartuussut Nunatta Eqqartuussisuuneqarfianut suliareqqitassanngortissinnaavaa. Qanoq aalajangernissami eqqarsaatiginissaanut sapaatip-akunneri marluk piffissarai.