Angut kalaaleq Danmarkimi tigusarineqartoq

Ataasinngornermi marlunngornermilu assingusunik pisoqarpoq, Amagerimi Ørestads Boulevardimi niviarsiaqqat angummit pilerisaarneqarlutik qammarniarneqarput.

Taamaattumik Københavnimi politiit sumiiffimmi tassani annertusisamik nakkutilliipput, pingasunngornermilu ullaakkut angut kalaaleq 20-nik ukiulik tigusarineqarluni.

Ullormi tassani kingusinnerusukkut eqqartuussivimmi tunngaviusumik inatsit atorlugu killisiorneqarpoq, tassanilu pinngitsaaliilluni atoqateqariarsimasutut kinguaassiuutitigulluunniit kanngunartuliorniarsimasutut unnerluutigineqarluni.

Kingulleq nassuerutigaa, pinngitsaaliillunili atoqateqariarsimaneq miserratigalugu.

Pasitsaassineq naapertorlugu ataasinngornermi ullaakkut niviarsiaraq arfineq-pingasunik ukiulik siulleq Ørestads Boulevardimi biilit unittarfiannut ikiortariaqarnerarluni oqarfigalugu usserniarsimavaa.

Qimaapput

Marlunngornermi ullaakkut niviarsiaraq qulingiluanik ukiulik inissiap majuartarfiannukaqqullugu usserarsimagaluarpaa.

Usserniarneqartut marluusut tamarmik qimaasimasut Københavns Politi nassiuaapput.

Pingasunngornermi ullaakkut Amagerimi politiit angut 20-nik ukiulik niviarsiaqqat marluk angutip qanoq isikkoqarnerannik nassuiaanerannut assigusoq nassaaraat.

- Niviarsiaqqat taakku marluk angut taanna malinnagu qimaasimanerat pillugu pisullu pillugit inersimasumut ingerlaannaq oqaluttuarsimammata nersualaartariaqarpagut.

- Angut qanoq isikkoqarnera nassuiaatigilluarpaat, tamannalu ilisarineqarneranut tigusaaneranullu pissutaaqataaqataavoq, Københavnimi politiit X-mi allapput.

Pingasunngornermi inatsisit tunngaviusoq naapertorlugu killisiuineq matoqqasumik ingerlanneqarpoq, taamaattumillu ilisimaneqanngilaq angut 20-nik ukiulik sukumiinerusumik qanoq nassuiaasimanersoq.

Eqqartuussisoq aalajangerpoq angut ulluni 20-ni tigummigallarneqassasoq.

/ritzau/