Angut pinngitsaaliisimasutut pasineqartoq tigusarineqartoq
Arnap 20-t sinnerlugit ukiullip ataasinngornermi unnukkut pinngitsaalineqarnini politiinut nalunaarutigaa, tassungalu atatillugu angut tigusarineqarpoq. Biilit marluk pingasunngornerup ullaassaani aamma tillinneqarsimapput.
Foto: Oscar Scott Carl
Pinngitsaaliisoqarneranut suliaq ataasinngornermi unnukkut nalunaaqutaq 23.04 nalunaarutigineqartoq Kalaallit Nunaanni Politiit misissorpaat.
Pinngitsaaliineq Kujataani nunaqarfimmi pivoq, pinngitsaalineqartorlu arnaavoq 20-t sinnerlugit ukiulik, politiini pigaartut pisortaat Aqqalu Petersen Sermitsiamut oqarpoq.
Politiit misissuinerminni pasisaq, angut 50-it sinnerlugit ukiulik, tigusaraat. Taannalu pinngitsaaliisimasutut unnerluutigineqarpoq.
Angut suliamut atatillugu misissuiffigineqareerluni iperagaavoq, pigaartut pisortaat oqarpoq, sulilu misissuisoqartoq erseqqissarpaa.
Biilit marluk ukiukitsunit aallarunneqartut
Pinngitsaaliisoqarneranut suliap saniatigut, biilinik marlunnik aallarussisoqarsimasoq, pigaartut pisortaat aamma oqarpoq.
Aallarussineq siulleq Qaqortumi nalunaaqutaq 04.14 nalunaarutigineqarpoq. Biili aallarussaq politiit unitsippaat, biilertorlu 18-it inorlugit ukioqartoq paasineqarluni. Inuusuttuaqqat 18-it inorlugit ukiullit arlallit ilaasorai.
Tamatuma kinguninngua biilinik aallarussisoqaqqippoq, tamatumuuna Nuup ilaani Nuussuarmi.
Politiit biili aallarussaq nassaaraat unitsillugulu. Unitsitsiniarnerulli nalaani biilit qullersuarmut aportut pigaartut pisortaat oqarpoq.
Aamma tassani biilertoq 18-it inorlugit ukioqarpoq, taamaattumillu biilersinnaanermut allagartaqarani.
Inuusuttuaqqat allat 18-it inorlugit ukiullit aamma ilaasuupput, biilertorlu aallarussisutut aalakoorlunilu biilertutut unnerluutigineqarpoq.
