Angut politiinik sulisunik kanngunarsaasimasutut unnerluutigineqartoq

Inuk oqartussani sulisunut kanngunarsaasimasutut sapaatip unnuaani tigusarineqarlunilu unnerluutigineqarpoq. Kalaallit Nunaanni Politiini pigaartut pisortaat Aputsiaq Hansen taamatut Sermitsiamut paasissutissiivoq.

Pigaartut pisortaat naapertorlugu inuk taanna politiit aalakoorluni biilersimasumik tigusarinnileruttortut akuliussimavoq.

- Aallaqqaammut pisut oqaluttuarissagutsigit, Ilulissani sapaatip unnuaani inuk aalakoornartulimmik imigassartorsimalluni biilertoq nalunaaqutaq 00.58 nalunaarutigineqarpoq. Politiinit orninneqarpoq, biilertorlu piffissap ingerlanerani nassaarineqarpoq, Aputsiaq Hansen oqaluttuarpoq nangillunilu:

- Tigusarinninnerup nalaani inuk alla suliamut attuumassuteqanngitsoq politiinut sakkortuumik suanngassuilerpoq. Suanngassuineq peqqarniitsutut nalilerneqarmat taanna aamma tigusarineqarlunilu unnerluutigineqarpoq, Aputsiaq Hansen oqarpoq.

Suliat marluk aallartinneqartut

Biilertoq aamma tigusarineqartoq, aalakoornartumillu imigassartorsimanera uppernarsarniarlugu aaversittoq Aputsiaq Hansen ilisimatitsivoq. Biilertup suliamut atatillugu eqqartuussivimmi suliap ingerlaqqinnissaanik naatsorsuuteqarsinnaavoq.

- Inuk alla aamma tigusarineqarlunilu suliamut atatillugu killisiorneqannginnermini isertitsivimmi unnuisinneqarpoq. Taassumattaaq pisup qanoq sualutsiginera unnerluussisussaatitaasup naliliiffigippagu kingorna eqqartuussivimmi sassartinneqarnissani naatsorsuutigisinnaavaa, Aputsiaq Hansen oqaluttuarpoq.

Suliat pineqartut saniatigut politiit imigassamut aalakoornartulimmut tunngasunik sulianik arlalinnik suliaqarsimapput, ilaatigut isumaginnittoqarfik angerlarsimaffinni eqqissiviilliortunut meerartalinnut arlalinnut suleqatigineqarsimalluni.