Anguterpassuit soraarnerussutisiassanik ileqqaartussaatitaanertik naammassinngikkaat
Soraarnerussutisiassanik ileqqaartussaatitaaneq maanna allanngortinneqarnialersaarpoq, taamaalilluni innuttaasunut ataasiakkaanut aningaasatigut nanertuutaavallaartinneqassalluni. Innuttaasut 5000-it angullugit amerlassusillit ileqqaagaqarnissamik pisussaaffitsik naammassisimanngikkaat kisitsisit takutippaat, taakkualu amerlanerpaartaat angutaapput.
Arnat suliffeqartut soraarnerussutisiaqalernissamut ileqqaartussaatitaanermik inatsisitigut piumasaqaatigineqartunik malinnaalluartut, angutit taamaaliorpallaarneq ajortut soraarnerussutisiaqalernissamut ileqqaartussaatitaaneq pillugu misissuinermi kisitsisit takutippaat.
Toqqorsivimmit: Leiff Josefsen
Arnat 14.000-it angutillu 16.000-it missaanniittut nunatsinni assigiinngitsuni suliffeqarput.
Arnat sulisartut amerlanerit soraarnerussutisiaqalernissamut ileqqaarnissamik inatsisitigut piumasaqaatigineqartunik naammassinnilluartartut, akileraartarnermut aqutsisoqarfiup naatsorsuinerani paasinarsivoq.
Innuttaasut 5000-it missaanniittut pisussaaffitsik naammassinngikkaat
Innuttaasut 4.855-it ileqqaartussaatitaanermik naammassinninngitsuni 17 procentiinnaat arnaapput, taakku 2023-mi soraarnerussutisiassaminnik ileqqaarnissartik naammassisimanngilaat.
Angutilli 2023-mi 83 procentii naammassinnissimanngillat.
Ileqqaartussaatitaanerit eqqortinneqanngitsut amerlinerat pineqartut soraarninngorpata nammineq soraarnerussutisiassanut aaqqissuussineranni imminnut pilersorsinnaanerat appasinnerulissammat utoqqalinersianut aningaasartuuteqarnerulernikkut
takuneqarsinnaassaa, soraarnerussutisiassanik ileqqaartussaatitaanerup allanngortinnissaanut Naalakkersuisut siunnersuutaanni oqaaseqaammi erseqqissarneqarpoq.
Angutit 300.000 koruunit sinnerlugit isertitallit kinguussaasut
Kisitsisit naapertorlugit innuttaasut suliffeqartut 30.000-t missaanniittut akornanni 4855-it ileqqaartussaatitaanerminnik naammassinninngillat.
Ulluinnarni aningaasaqarniarnikkut ajornartorsiuteqarnerat pissutaanersoq ilisimaneqanngilaq, angutilli isertitakkaat 300.000 koruunit sinnerlugit isertitallit amerlanerit naammattumik katersuiumannginnerat maluginiagassaavoq.
