Aningaasanut inatsimmi mittarfinnut aningaasaliissutit millionikkaat amerlanerit aningaaserivinnut ingerlateqqinneqassasut

Aningaasanut inatsimmi Naalakkersuisut Greenland Airportsimut aningaasaliissutiginiagaanit 250 millionit koruuniusunit, 188 millionit koruunit missaat taarsigassarsianut atorneqassapput.

Tamanna mittarfinnik ingerlatseqatigiiffiup Sermitsiamut uppernarsarpaa.

Aningaasat politikikkut saqqummiunneqarmata Qaqortup mittarfiata “naammassinissaanut” atorneqartussatut politikikkut tunniunneqarput. Aningaasalli amerlanersaat amigaatigineqartunut akiliutaassanngillat. Sanaartornermut taarsigassarsiat 180 millionit koruuniusut, mittarfiliornermi atorneqartut akilerneqassapput. Greenland Airports-imit nalunaarutigineqarpoq taarsigassarsiat tamarmik atorneqarsimasut.

180 millionit taarserneqareeriarpata, aningaasat sinneruttut Qaqortumi mittarfiup apriilimi ammarneqartup suli amigaataannut atorneqassapput. 

Ilaatigut biilinut inissiisarfimmik amigaateqartut 

Mittarfik atorneqalereeraluartoq suli naammassivinneqanngilaq, aningaasaqarnermut pisortaq Per Stjærnholm Trærup nassuiaavoq:

AAMMA ATUAKKIT

Hercules siulleq Narsarsuarmut mippoq

- Aningaasaliissutigineqartut 250 millionit koruuniusut sanaartornermi taarsigassarsianut taarsiinermut aamma naammassiniagassanut atorneqassapput. Naak mittarfik atorneqalereeraluartoq, kisianni suli suliarineqartussat annikitsut naammassiniagassaagamik, soorlu biilit orsersuisartut inissiisarfissaannik amigaateqartoqarami, oqarpoq.

Ingerlatseqatigiiffik Greenland Airports Regional, taarsigassarsianik atuisimavoq, taarsiiffigineqartussallu tassaasut Grønlandsbanken aamma Bankivik amerlaqatigiinnik taarsiiffigineqartussaallutik.

Greenland Airports Regional Naalakkersuisut kisimik pigisaraat Nunatsinnilu mittarfiit amerlanerpaartaat, aamma Qaqortup mittarfia, ingerlataralugit. Nuummi Ilulissanilu mittarfiit nutaat allat Greenland Airports Internationalip ingerlatarai naalagaaffiup piginneqataaffigisai.

Mittarfiit siunissamilu aningaasatigut tunngaviusussat pillugit 2026-mi isumaqatigiinniaqqittoqarnissaa pilersaarutaavoq.