Apersorneqaqqittoq: Trumpip Kalaallit Nunaannut pilersaarutini ‘pimooruppaa’
Kalaallit Nunaata tigunissaanut tunngatillugu piffissamik aalajangersimasumik pilersaaruteqanngikkaluarluni, siunertanili pimoorukkini, Donald Trump apersorneqarnermini oqaatigaa.
- Nalunngilarsi Europamut ilumoorfiginnittuusunga.. Nunatta isumannaatsuunissaanut (Kalaallit Nunaat aaqq.) maannakkut pisariaqartipparput, Donald Trump oqarpoq
Assi: Elizabeth Frantz/Reuters/Ritzau Scanpix
USA-p præsidentia Donald Trump marlunngornerup unnuaani Kalaallit Nunaat pillugu oqaaseqaqqippoq.
USA-mi tusagassiorfimmit NBC Newsimit apersorneqarnermini taamatut oqartoq tuluit tusagassiorfiat Sky News allappoq.
Tassani Trumpip uteqattaarpaa USA-p isumannaatsuunissaa eqqarsaatigalugu Kalaallit Nunaat pumallugu:
- Nalunngilarsi Europamut ilumoorfiginnittuusunga. Nunatta isumannaatsuunissaanut maannakkut pisariaqartipparput, Donald Trump oqarpoq nangillunilu:
- Isumaqarpunga USA-mi, Europami nunanilu kiffaanngissuseqarfiusuni allani isumannaatsuunissaq pillugu Kalaallit Nunaat pingaaruteqarluinnartoq.
Pimoorussisoq
Aamma apeqqutigineqarpoq Donald Trump aalajangersimasumik piffissalimmik pilersaaruteqarnersoq, akivorlu "piffissamik killilimmik“ pilersaaruteqannginnerarluni, iliuuseriniakkaminilli "aalajagiusimalluinnarluni".
Tuluit Nunaanni illersornissamut siusinnerusukkut ministeriusoq Ben Wallace Sky Newsimut oqarpoq USA-p Kalaallit Nunaata ilanngunnissaa pillugu sioorasaarinini pimooruppagu Natomi ajornartorsiortoqangaassasoq.
Trumpip oqaaseqaatai Naalakkersuisut Siulittaasuata Jens-Frederik Nielsenip (D) tusagassiortunik katerortitsinermini USA-mut 'aqqutit eqqortutut atorlugit' attaveqaqatigiinneq utertinneqarnissaanik qinnuiginninnerata kingorna, Trump Kalallit Nunaata tigunissaanik kissaateqarnini tusagassiutitigut uteqqippaa.
Ministeriuneq Mette Frederiksen arlaleriarluni assingusumik oqariartuuteqarpoq, Donald Trumpilli naalakkersuisut siuttui taakku marluk tusaaniarpasinngilai.
