Aqqalu C. jeremiassen: Trumpip paasisariaqarpaa inuit tuniniagaanngitsugut
Kalaallit nunaat pigisat allanngortinneqarsinnaasutut isigineqassanngilaq. taama ersaritsigisumik atassutip siulittaasuata oqariartuutaa ersersinneqarpoq præsident trumpip nalunaaruteqarnerata kingorna, tassalu ataasinngornermi ullaakkut immikkut kalaallinut aallartitaq toqqarsimagamiuk.
Kalaallit Nunaat nammineq imminut aqqutissiuutissaaq, tamannalu Trumpip paasisariaqarpaa, Atassutip siulittaasua Aqqalu C. Jeremiassen oqarpoq.
Oscar Scott Carl
Præsident Donald Trump ataasinngornerup ullaassaani nalunaaruteqarpoq nunatsinnut immikkut aallartitamik toqqaasimalluni. Nunarpullu taamaasilluni nunat tamalaanit ukkatarineqaqqilerpoq.
Atassutip siulittaasua, Aqqalu C. Jeremiassen, politikerit siuttui allat assigalugit aamma qisuariaqarpoq, eqqaasitsissutigeqqippaalu Kalaallit Nunaat tuniniarneqarsinnaanngitsoq.
- Avissaartuutissanngilagut, ataatsimoorsunnaanerput takutitsigu. Illu pisiassaasinnaavoq, inuilli pisiassaanngillat, Trumpip tamanna paasisariaqarpaa, Aqqalu C. Jeremiassen taama allappoq.
Taama Naalakkersuisut siulittaasuat Jens-Frederik Nielsen (D) aamma Inuit Ataqatigiit siulittaasuat Múte B. Egede assigusunik aamma nalunaaruteqareerput, erseqqissarlugulu nunarput kalaallinit ineriartortinneqartussaasoq.
Kalaallit ataatsimoortariaqarput
Atassutip siulittaasua oqarpoq, USA-mit nalunaarutigineqartut pillugit inuiaqatigiinni avissaartuuttoqalernissaa aarlerinaateqarsinnaasoq.
- Ilutsinniit aserornissarput ujartorpaa. Uani inuiaqatigiittut pitsaanerusumik ajunnginnerusumilluunniit atungaqarnissarput pineqanngilluaasarpoq. Ataasiinnaavorli siunertaa. Tassalu ilutsinniit aserortissalluta avissaartuutsinniarluta, taassumallu ilarujussua iluatsisimaarlualereerpaa nunatsinni sakkutooqqinnertut ittunik nunaqqatitsinnik peqalereernikuunermigut, Facebookimi allappoq.
Aqqalu Jeremiassenip eqqaasitsissutigaa Kalaallit Nunaat innuttaasullu namminersornermut inatsimmi illersugaareertoq, inatsimmilu qulakkeeqqagaa kalaallit siunissartik nammineq ilusilersussagaat.
- Nunatta qanoq siunissaqarnissaa uagutsinniissooq, namminersornermut inatsisitta illersoreerpaatufut qanoq ingerlariaqqissinnaanitsinnut, USA-p tamanna allanngortinniarsarissanngilluinnarpaa, aaliangerneq uatsinniissooq. Suleqatigiinneq akuersaarparput, akerassarsiorneq akuersaanngilarput, avissaartuutissanngilagut, ataatsimoorsunnaanerput takutitsigu, Aqqalu C. Jeremiassen allappoq.
