Atassutip Folketingimut qineqqusaartitaat maannamut pingasuusut, tassa: Malu Ostermann, Bentiaraq Ottosen Orla Joelsenilu Folketingimut isissagaluarunik ministeriunertut toqqagassaat kinaassanersoq nalunanngilaq.
- Siullertut soorunami Venstre suleqatigigatsigu Troels Lund Poulsen toqqagassani siullerpaasussaassaaq, Atassutip siulittaasua Aqqalu C. Jerimiassen oqarpoq.
Atassutip Folketingimut qineqqusaartitaat maannamut pingasuusut, tassa: Malu Ostermann, Bentiaraq Ottosen Orla Joelsenilu Folketingimut isissagaluarunik ministeriunertut toqqagassaat kinaassanersoq nalunanngilaq.
- Siullertut soorunami Venstre suleqatigigatsigu Troels Lund Poulsen toqqagassani siullerpaasussaassaaq, Atassutip siulittaasua Aqqalu C. Jerimiassen oqarpoq.
Imaanngilarli partiit allat mattukkaat.
- Nunatsinnut pinnatassaq annerpaaq eqqarsaatigalugu imaassanngilagut aappaluttut siuttunngussappata aallaqqaataaniik mattutereerlugit. Suleqataaffissagut ujartussaqqaarpagut.
Suleqatigisinnaanngisaannili ataaseq qularnanngilaq.
- Qanorluunniit Morten Messerschmidt toqqarunnanngilarput. Dansk Folkepartikkut suleqatigisinnaanissaat takorloorsinnaanngilarput, Aqqalu C. Jerimiassen oqarpoq.
Mette Frederiksen toqqaqqeriaannaagaat
Danmarkimi partiit pingasut: Socialdemokratiet, Venstre Moderaternekkullu ukiuni kingullerni naalakkersuisoqatigiipput.
- Mette Frederiksen taamannak naalakkersuisoqatigiiliorniarluni eqqarsassappat naatsorsuutigineqarsinnaavoq taperserneqarsinnaasoq, Aqqalu C. Jerimiassen oqarpoq.
Taassuma oqarnera malillugu Venstrekkut naalakkersuisoqatigiinniitillugit nunatsinnut pinnatassaq annertunerujuaannarpoq.
- Mette Frederiksenip iliuusai takuinnarsinnaavagut, Helle Thorning-Schmidtimut sanilliukkaanni qanoq annertunerutiginersut. Helle Thorning-Schmidtip taamani SF-ikkut suleqatigalugit naalakkersuisoqarpoq. Massakkut Mette Frederiksen qeqqaniittunik katersuilluni ingerlataqarnermini nunatsinnut angusaa annertunerujuuvoq, nunatsinnut inussiarnernerusunik suleqatiserinnillaqqittunik suleqateqarami, oqarpoq.
Qeqertarsuarmi mittarfik
Folketingimi ilaasortat 179-iupput, naalakkersuisoqatigiiliornermilu amerlanerussusiiniartoqartillugu nunatsinnit ilaasortat marluk pingaarutilimmik inississinnaasarput. Atassut Folketingimut ilaasortaatitaqalissagaluaruni amerlanerussusiiniarnermilu qulakkeerinninniassagaluaruni piumasaqaatissaqarpoq:
- Naalagaaffeqatigiinnerup ataani naligiimmik atugaqarnissatsinnut Atassutip pilersinneqaramili 1978-imi anguniagaa, maannakkut partiit tamarmik pilerngullugu uani tamangajammik aallartitaat, uagut nangeqqissaqqaarparput allannguuteqanngilluinnarluta.
Piumasaqaatissat tigussaasut apeqqutigigaanni Atassutip siulittaasua assersuutissaqarpoq. Ittoqqortoormiimmi mittarfittaarnissaanut Qaqortullu talittarfittaarnissaanut Danmark aningaasaliissasoq siorna aalajangiunneqarpoq. Ministeriuninngortussamut amerlanerussusiissagaluarunik assigusumik piumasaqaateqarniarput.
- Assersuutigalugu Qeqertarsuup Tunuani sumiiffiit ilai mittarfeqanngitsuusinnaapput, soorlu Qeqertarsuarmi. Taamannak peqalersinnaanissaanut aningaasaliisinnaanermut, tullinnguuttariaqarnerinut taakkua ilaatigut eqqarsaatigivakka, Aqqalu C. Jerimiassen oqarpoq.
