Aqutsisoqarfimmi pisortaq: Sapinngisatsinnik pitsaasumik ingerlatsivugut

Ukioq ilivitsoq affangajallu sivisutigisumik peqqinnissaqarfimmi kommuninilu sulisut kattuffiisa arfineq marluusut isumaqatigiinniartitaasa illuatungsaanilu namminersornerullutik oqartussaqat isumaqatigiinniartitaasa akornanni isumaqatigiissuteqartoqarnissaasa tungaanut isumaqatigiinniartoqarpoq.

Isumaqatigiinniarnerit aallartinneqarput marsip qulingiluaani 2024-mi, naammassillutillu aggustip sisamaani 2025-mi. Tamatuma kingorna taasisitsineq ingerlanneqarpoq, ullumikkullu septembarip qulingani 2025-mut killippugut. Isumaqatigiissutip inernerata, akuerineqareeraluartup, suli atsiorneqarsimannginnera pissutaalluni isumaqatigiissut suli atuutilersinneqanngilaq. Isumaqatigiissut atsiorneqareerpat, nalinginnaasumik qaammatit pingasut tikillugit isumaqatigiissutip atuutilerfissaaniit akissarsiat iluarsineqartarput - tassami akissarsialeriffimmi iluarsiissutit eqqortumik nalunaarsornissaat piffissartornartarmat.

AAMMA ATUARUK:

Peqqissaasut kattuffiat: Sivisuumik ingerlaneq tatiginninnginnermik toqqissisimannginnermillu pilersitsivoq

Peqqinnissaqarfimmi sulisut sinnerlugit isumaqatigiinniarnerni aqutsisoq, Peqqinnissaq Pillugu Kattuffiit (PPK) siulittaasua aammalu Peqqissaasut Kattuffianni (PK) siulittaasoq siulittaasua, Ken Jensen, isumaqatigiinniarnerit sivisoorujussuarmik ingerlanneqarsimanerat pillugu namminersorlutik oqartussanut isornartorsiuivoq, sivisoorujussuarmimmi ingerlanneqarnera pissutaalluni peqqinnissaqarfimmi sulisut pakatsinermik, tatiginninnginnermik toqqissisimannginnermillu kinguneqarmata.

Sulisut amigaataapput

Namminersornerullutik oqartussat aningaasaqarnermut sulisoqarnermullu aqutsisoqarfiani pisortaq, André Steenholdt-Guttesen, pakatsisimaartoqarneranut paasinnissinnaanerarpoq, taassumali aamma erseqqissarpaa, sapinngisaq malillugu pitsaanerpaamik ingerlatsisoqarsimasoq:

- Sulisut amerlassusitsigut taakkuuvugut, aamma allat assigalugit sulisussanik amigaateqarpugut, pingaartumik aamma pisortani sulisut kattuffii 30-it missaanniittut isumaqatigiinniaqatigisussaasaratsigit. Atorfiit inuttassarsiukkagut amerlasuutigut inuttalerniarneri ajornakusoortarput, aammalu sulisooreersut, assersuutigalugu, erninermut atatillugu sulinngiffeqartarput imaluunniit qimagullutik nuunnissaminnut atatillugu sulinngiffeqartoqartarluni. 

AAMMA ATUARUK:

Isumaqatigiinniarnerit inernerat akuersaanngilluinnaraat

- Tamatuma saniatigut erseqqissaatigineqartariaqarpoq, isumaqatigiinniarneq naammassineqaqqammersoq pillugu aaqqissuusseqqinneq aamma aqqusaarneqarmat. Assersuutigiinnarlugu isumaqatigiinniutit arfineq marluk taakkulu iluanni isumaqatigiissutit 30-it sinnerliugit amerlassusillit ataatsimut kattunneqarnikuummata. Tamatumalu saniatigut tunngaviusumik isumaqatigiissut aammalu piffissaq suliffiusoq pillugu isumaqatigiissuteqartoqarmat. Tamatuma malitsigisaanik naatsorsuinerpassuit, isumaqatigiissutip qanoq allaqqanissaa, naleqqussaanerit aammalu isumaqatigiinniutit pillugit oqaluttuartassat tamarmik ingerlanneqartarput. Suliassat tamakku tamarmik uagutsinniipput. Taamaammat suliarujussuusarput, tamakkulu isumaqatigiinniaqatigisartakkatsinnut tamanut atuupput. Aaqqissuusseqqinneq ukiuni pingsasuni ingerlasimalereerpoq nanginneqassaarlu suliassaqarfinnut aaqqissuusseqqiffigineqartunut tamanut tunngatillugu.

Taamanna isumaqarpa suliassassinnut sanilliullugu ikippallaartusi?

- Tassunga pissutaaneruvoq atorfiit inuttaqanngitsut nalaateqqagatsigit, taakkulu atorfiit ilaatigut inuttalerniaruminaatsittaratsigit.

Maanna Naalakkersuisut aamma nalunaarutigereerpaat annertuumik sipaarniartoqassasoq, pingaartumik allaffissornikkut sipaarniartoqarluni, tungissinniit piumasaqaateqarniarpisi, isumaqatigiinniarnermut immikkoortortaqarfimmi sulisussaqarnikkut pissutsit ajorseriaateqartinneqassanngitsut, imaluunniit kattuffiit isumaqatigiinniaqatigisartakkassi naatsorsuutigissavaat isumaqatigiinniarnerit suli sivisunerusumik ingerlanneqartalissasut?

- Tamanna pillugu oqaaseqarsinnaanngilanga, politikerit pingaarnersiuinerminni qanoq tulleriaarinissaat pillugu taakkununnga apeqqutigisariaqassavat.

Peqqinnissaqarfimmi sulilersinnaagaluartut tunuartitiinnartartut

Peqqinnissaqarfimmi sulisut kattuffiisa isumaqatigiinnartitaasa annertuumik ernummatigaat peqqinnissaqarfimmi sulilersinnaagaluartut pisariaqartinneqaqisullu, aammalu aalajangersimasumik atorfinissinnaanissaminnut soqutiginnikkaluartut, akissarsiatigut sulinermilu atugassatigut pissutsit iluarsineqarsimannginneri pillugit sussaaginnartartut amerliartulersinnaanissaat.

AAMMA ATUARUK:

Peqqissaasup isumaqatigiissut nutaaq isornartorsiorpaa: – Kamaatigaara

Innuttaasut peqqinnissaqarfiup pitsaasumik ingerlanissaa pisariaqartilluinnarpaat, siunissami qulakkeersinnaavisiuk, peqqinnissaqarfimmi sulisut pillugit isumaqatigiinniarnerit sivisuallaamik ingerlasinnaanerat pinngitsoortinniarlugu, tamatumami kingunerisinnaammagu, atorfinissinnaagaluartut nutaat sussaaginnartarnerat?

- Tamanna Aningaasaqarnermut Sulisoqarnermullu immikkoortortaqarfimmit sulissutigiuaannarusupparput, taamaattorli aqutsisoqarfiup kisimiilluni tamanna qulakkeersinnaanngilaa. Isumaqatigiinniarnerit ingerlagaangata pilersaarusiornikkut aaqqissuussamik ingerlatsisoqartarpoq. Upperaara, tassa illuatungeriit tamatta, isumaqatigiissutigisimasatsinnik piffissaliussagut malinnissaannik soqutiginnilluta, taamaattorli uagutsinnut tunngatillugu isumaqatigiinniarnerit arlallit ataatsikkut ingerlanneqartarput, Aningaasaqarnermut Sulisoqarnermullu aqutsisoqarfimmi pisortaq, André Steenholdt-Guttesen naggataatigut akivoq.