Arlallit aningaasatigut ajornartorsiorput
Naatsorsueqqissaartarfiup naatsorsuinerata takutippaa innuttaasut aningaasaqarnikkut ajornartorsiortut ukiut arlallit ingerlaneranni amerliartortut.
2024-mi Tasiilami innuttaasut 13 procentii aningaasatigut ajornartorsiorsimapput.
Assi: Oscar Scott Carl
2023-mi innuttaasut aningaasaqarnikkut ajornartorsiortut
2.066-iullutik 2024-mi 2.264-iupput. Innuttaasut 1870-it
aningaasatigut ajornartorsiorput.
Tamanna Naatsorsueqqissaartarfiup nalunaarusiaani kingullermi ersersinneqarpoq.
Politikkikkut aalajangersimasumik piitsuussutsip killigititaa
aalajagersaavigineqanngilaq, taamaattumillu Naatsorsueqqissaartarfiup
oqaaseq "aningaasaqarnikkut ajornartorsiortut“ nalunaarusiamini atorpaa.
Inuttaasoq ukiut pingasut ingerlaneranni isertitarineqartartunit nalinginnaasunit 50 procentinik isertitakinneruppat nalunaarusiami tassani aningaasatigut ajornartorsiortutut taaneqarpoq.
- Aningaasaatikilliortutut inissisimasuni 20-niit 29-nut ukiullit annertunerpaapput.
Nunaqarfinni atugarliortut amerlanerupput
Takussutissami tulliuttumi illoqarfinni nunaqarfinnilu aningaasatigut ajornartorsiortut amerlassusaat takuneqarsinnaapput:
- 2024-mi nuna tamakkerlugu illoqarfinni aningaasaatikilliortutut inissisimasut 4 pct.-iupput, nunaqarfinnilu savaateqarfiit ilanngullugit 9 pct.-iullutik.
Nunap immikkoortuini agguataarineq eqqarsaatigalugu Tasiilami, Qaanaami, Kangaatsiami Upernavimmilu 2024-mi aningaasatigut ajornartorsiortut amerlanerpaapput.
Tasiilami innuttaasut 13 procentii aamma Qaanaami innuttaasut 14 procentii aningaasatigut ajornartorsiorsimapput.
Naatsorsueqqissaartarfiup nalunaarusiaa tamaat uani atuarneqarsinnaavoq.
